المساعد الشخصي الرقمي

مشاهدة النسخة كاملة : رابطة ملاك الكيا برايد


المناور
30-04-2011, 08:37 PM
السلام عليكم ورحمة الله يا أهل مصر موتورز

الموضوع ده أنا فتحته فى منتدى تانى للسيارات وكنت ناوى افتحه هنا بس اللى كان مخلينى متردد ان هناك البرايد مظلومة ومش واخدة حقها من النقاش أو السؤال حتى انما هنا أبو نورا قايم بالواجب وزيادة - يمكن علشان هيا عشرة عمر معاه فهو بيردلها الجميل - فعامل قسم وحاطط معلومات تحفة خلتنى مش عارف لو فتحت نفس الموضوع هنا ممكن ازيد ايه على اللى هو قاله بس فى النهاية قلت لازم احط الموضوع هنا علشان أنا ياما استفدت من المنتدى .

وأنا عايز انبه انى مش خبير قوى بس العربية معايا بقالها دولقتى حوالى سنة ونص والحمد لله مرتاح معاها واعرف بعض الامور عنها ان شاء الله ناوى اعرف الناس بيها .

واثناء تحضيرى لذلك ياريت اصحاب الكيا برايد يشرفونا هنا ويشاركونا بخبراتهم .

المناور
30-04-2011, 08:39 PM
نبدأ بتجربتى مع العربية من موضوع سابق

أنا معايا كيا برايد 96 هاتش باك 1100 سى سى والعربية كويسة معايا والحمد لله حتى انى فكرت فى وقت من الاوقات لما اغير اجيب السيدان منها اللى هيا 1300 سى سى بإذن الله .

بالنسبة للبنزين العربية يادوب بتشم بنزين هى المفروض بتعمل من 5.5 إلى 6 لتر فى ال 100 كيلو لو ماشى طوالى وحوالى 7 لو ماشى فى المدينة ، ممكن تمشى العربية ببنزين 80 عادى خالص بس من حين لاخر ابقى حط 90 علشان تفوق العربية لان كتر ال 80 بيخليها تسقف وسحبها بيبقى زفت ولو مشيتها على 92 زى ما أنا عامل حتلاقى عربيتك جراية بشكل غريب ، قطع الغيار رخيصة جدا يعنى لو اشتريت العربية وغيرت طقم السيرفس حاتصرفلك بتاع من 200 إلى 350 جنيه أول عن اخر ويمكن أقل كمان كمثال سير الكاتينة ب 45 جنيه سير الدينامو ب 15 جنيه فلتر الهواء 20 البوجيهات 35 المساعدين صينى ب 290 والاصلى ب 400 تيل الفرامل القدمانى ب 45 والخلفى ب 60 طقم الدبرياج كله على بعضه يعمله بتاع 350 والطنابير بالبلى بالتيل الخلفى يعملوا بتاع 300 جنيه الفانوس الامامى أو الخلفى ب 70 جنيه وفانوس الاشارات ب 15 جنيه وعامة قطع الغيار متوفرة فى شارع دمشق عند الجندى وده احسنهم وعند حلمى سليمان فى التوفيقية ، العربية سهلة فى الميكيانيكا فمش محتاج حد مخصوص بس ماتعملش زيى وتروح لاى حد لانى اتلسعت فى الأول مع ميكانيكى مابيفهمش بهدلى الدنيا ولعبلى فى التاكيهات والكربراتير وخربلى الدنيا وكرهنى فى العربية حتى انى نزلت اعلانات لبيعها وحتلاقيها هنا بس ربنا كرمنى بواحد تانى رجع ظبطلى الدنيا كلها وساعتها حسيت بقيمة العربية .

العربية واسعة من قدام وورا يعنى أنا طويل شوية 183 وبرجع الكرسى لورا وعلى الرغم من كده اللى بيقعد ورا لو طوله عادى بيبقى مش محشور بل لو الكرسى اللى ورا راجع سنة ممكن واحد طويل يقعد ودى أنا جربتها بنفسى ولقيتنى قاعد مرتاح ورا ، العربية عريضة شوية عن الاونو فده بيديها ثبات احسن بس هى برضو ما تصنفش من الانواع الثابتة على الارض يعنى ماتتهورش وتزيد عن 100 العربية أنا جيبت بيها مرة 140 من قبيل التجربة وماكررتهاش تانى بس كتير كنت بامشى بيها على 120 ده ايام الشقاوة ، العربية عالية عن الارض وعمرى ماحكيت فى اعلاها مطب حتى لما كنت محمل العربية على اخرها وفيه تلاتة على الكنبة ورا برضو ما بحكش لان العربية عالية فعلا ، العفشة ناشفة شوية فأى هبد أو تكسير فى الأرض حاتحس بيه جوا ، ابعاد العربية كويسة جدا سواء من قدام أو ورا فسهل تحفظه بسرعة ، بالنسبة لاعادة البيع العربية بياعة ولو حبيت تبيعها الف من تلاقيه يشتريها على سبيل المثال أنا لسه من قيمة اسبوع لقيت الكهربائى بيسألنى لو عايز ابيع العربية

عيوب العربية أولا مافيهاش باور فبتعذب عذاب السنين فى الركن ثانيا مافيهاش تكييف فبتسلق جوا العربية ودى حاجة مرتبطة بفترة الصيف ثالثا الصاج خفيف شوية والعربية بوجه عام خفيفة يعنى لو ماشى على 80 أو 90 وجت من جنبك عربية ماشية على سرعة كبيرة أو نقل حجم كبير تحس ان الهوا بيهز العربية رابعا الشنطة تعتبر مفيش علشان هاتش باك خامسا المرايات الجانبية ثابتة مابتتقفلش فاللى رايح واللى جاى بيلطش فيها بس هى والحق يقال ناشفة قوى كذا مرا تتخبط المرايات منى خبطات جامدة ولا كأن حاجة حصلت اصلا .

أنا جيبت العربية وهى عاملة 170000 الف كيلو وفيه ناس حذرونى منها لان الموتور كده خلاص فى اواخره وكلام من ده بصراحة العربية كسفتهم كلهم وعمرها ما قلت بأصلها معايا ولا وقفت فى طريق وصوت موتورها لسه كويس على الرغم من عدد الكيلومترات الكتير بل وساعات بتجرى معايا جرى بابقى مستغربه من عربية 1100 وعلشان هيا مراعيانى أنا كمان براعيها وبحس ان كل قرش بصرفه فيها مش خسارة .

المناور
30-04-2011, 08:40 PM
محلات قطع غيار الكيا
1- الجندى وده من افضل الناس وبيقولك وهو بيبيع ده اصلى ولا تقليد والمنشأ منين وليه كذا فرع واحد فى شارع دمشق وفيه فرع تانى فى جسر السويس قدام فندق السلام تليفونه 24516008 - 0123916567

2- حلمى سليمان مكانه فى التوفيقية هو على الشارع من برة قدام سنترال رمسيس علطول تليفون 25742326

3- سامى وكرم على نفس ناصية حلمى سليمان كانك رايح ناحية ميدان رمسيس قدام مستشفى الهلال الأحمر تليفون 25783118 – 25791742

4- بيبو مكانه فى معروف قدام ناصية أبو طارق بتاع الكشرى

المناور
30-04-2011, 08:41 PM
دلوقتى حاحط المراكز اللى رجحها أهل الثقة وأنا مجربتهاش بس سمعت فيهم كلام كويس وأنا باحطها لو فيه حد مبتدئ ولسه مايعرفش ميكانيكى كويس يشتغله فى العربية أو فيه مشكلة كبيرة احتار فى حلها فالمراكز دى بتبقى فيها ناس واكلة وشاربة العربية وعندهم كل حاجة بس بتبقى اغلى شوية فى المقابل

1- مركز وليد توفيق (توكيل الكيا برايد سابقاً)

الشركة المصرية للصيانة والتوكيلات
ك 24 طريق مصر الاسماعيلية الصحرواي -العبور
ت - 6565953 - 6565952

23أ اول طريق السلام الزراعي - الزهراء ت:5240894 - 5240893

69 ش النصر - المعادي الجديده - القاهرة ت: 0103046400 - 5168019


2 - الورشة الكورية لاصلاح السيارات (ميكانيكا - عفشة ) اصحابها اتنين كانوا شغالين فى التوكيل القديم
محمد حنفى - 0125634933
بطرس شنودة - 0101196221
العنوان : 4 ش عبد الحليم محمود متفرع من ناصية ش الحرية خلف فيلات 23 يوليو بعد فندق السلام جسر السويس - امام محطة كهرباء هليوبليس


ورشة الاصدقاء
وده العنوان: 34 ش عبد الرحمن نصر - الزيتون
خلف قصر القبة
وده التليفون: 0100209293
22843866

المناور
30-04-2011, 08:43 PM
نيجى بقى للمواصفات الفنية والموديلات اللى نزلت مصر

مواصفات العربية تلاقوها على الرابط ده

Kia • Pride - Technical specifications, fuel consumption (http://auto-specifications.eu/?f=showSubModel&modeli_id=300)

بالنسبة للموديلات اللى نزلت مصر فأنا حقول اللى اعرفه ولو فيه حاجة غلط ياريت حد يصححلى

الهاتش باك موديلاتها من 96 لغاية 99 واغلبها 1100 سى سى 52 حصان بس فيه واحد - زميلنا فى المنتدى محمد زكى - معاه واحدة 1300 سى سى اظنها 64 حصان ولما دورت عرفت انه كان فيه موديل نزل منها 1300 سى سى وده نادر وجوده فى مصر

بالنسبة للسيدان فهى 1300 سى سى وبتبدأ موديلاتها من 98 لغاية 99 تقفيل كورى وفيه موديلات من 2000 لغاية 2004 تقفيل مصرى وبرضو الشكل القديم بعد 2004 وحتى الان فيه الشكل الجديد وده ايرانى واسمها سابا ودى لسه بيتباع منها جديد لغاية دلوقتى

المناور
01-05-2011, 09:18 AM
كتالوجين العربية

http://rapidshare.com/files/456718633/KIA.zip

http://rapidshare.com/files/456719788/KIA_PRIDE_Illustrated_Parts_Catalogue.rar

الكتالوج التانى غنى بالمعلومات




اسعار بعض قطع الغيار

سير كاتينة 45
سير دينامو 15
فلتر هواء 25
فلتر بنزين 20
فلتر زيت 30
تيل فرامل امامى 40
تيل فرامل خلفى 60
بوجيهات 35
مساعد امامى صينى 290
مساعد خلفى صينى 290
فانوس امامى 70
فانوس خلفى 70
فانوس الاشارات 15
بلى العجل امامى 40
بلى العجل خلفى 40
اسطوانة الدبرياج 350
طنابير 200
جوز كبالين صينى 200
جوز كبالين يابانى 350

اسعار العربية فى السوق

بالنسبة للهاتش باك فتتراوح ما بين 25 الف إلى 28 الف
وبالنسبة للسيدان الكورى أو المصرى ما بين 30 الف وحتى 35 الف


اماكن قطع الغيار

روحت الحرفيين علشان كنت عايز اجيب طنابير وتيل خلفى للعربية وحاقولكم على اسماء المحلات اللى لقيتها فى سكتى لبيع قطع غيار البرايد ومعلش يا جماعة أنا حاقول اسماء المحلات بس لان دى اول مرة اروح الحرفيين وماعرفش اسماء الشوارع

محلات الكيا الاستيراد : محل الصعيدى ، محل المصرية الاسيوية ، محل الاسراء دول كلهم جنب بعض بس مالقيتش عندهم أى حاجة من اللى بسأل عليها ، اللى لقيت عنده حاجات البرايد مخصوص محل اسمه محمد مهران وده جبت عنوانه من الكارت : ش/ د. أحمد ممدوح امام بلوك 8 وعلشان ملقيتش غيره والراجل شكله حس انى دوخت عقبال ما لقيت الحاجات اللى عايزها فكان مش راضى ينزل نكلة ، وزى ماكنت قلتلكم أنا كنت بدور على طنابير خلفى وتيل فمالقيتش عنده غير طقم الفرامل كامل التيل بالطنابير بالبلى بكل حاجة والجوز ب 250 جنيه وكنت عايز عصاية الغيارات كاملة ودى لقيتها عنده ب 175 جنيه

ولقيت محل واحد بيبع قطع غيار الكيا جديد واسمه الاستاذ بس مغلوانى شوية جوز الطنابير كورى عامل 270 جنيه والتيل ب 70 جنيه

بس أنا فضلت اشترى الاستيراد علشان ماكنتش عايز اجيب جديد تعبان وكمان غالى وعلشان اجرب الاستيراد وقبل ما اشترى اتفقت مع الراجل ان الحاجة لو طلع فيها حاجة حرجعهاله علطول ، والحمد لله الحاجات كانت كويسة حتى الشحم كان من النوع النضيف ويادوب لقينا جزء كان مصدى من كتر الركنة فبدلناه من الفرامل القديمة .

--------
وأنا ماشى بالعربية مرة واحدة لقيت عداد السرعة والكيلو متر مش شغالين روحت للميكانيكى لقى السلك بتاعهم اتقطع روحت جيبت واحد من حلمى سليمان ب 35 جنيه ركبهولى الميكانيكى واخد 5 جنيه..... عندى ملحوظتين حابب اقولهم الأولى بوادر القصة دى بدأت بان عداد السرعة وهو طالع ونازل بيفضل يرعش الملحوظة التانية السير اللى بيتباع دلوقتى بيحتاج يتعمل بالمطرقة لان الاصلى بيبقى طرف السلك مربع والجديد بيبقى دائرى شوية فلازم يتخبط عليه شوية لغاية اما ياخد شكل القديم علشان يشتغل مظبوط



دى مشاركة كنت كتبتها لواحد بيدور على عربية فى الفئة السعرية بتاعة البرايد بس كلامى كله كان عن السيدان حاحاول انى اعمل مقارنة بين البرايد الهاتش باك ومنافسيها

1- الكيا برايد سيدان 1300 سى سى فيها التكييف والباور اللى انت طالبهم وواسعة واستهلاك البنزين يادوب واعتمادية وقليلة الصيانة وقطع غيارها رخيصة الثمن وسعر اعادة البيع كويس جدا وفى منها اتوماتيك كمان واهم شىء انها ارخص واحدة فى الاختيارات لان اعلى حاجة فيها مش حايتعدى 36 الف عيبها انها فقيرة من حيث الشكل من جوة لو انك بتهتم .

2- هيونداى اكسنت 1500 سى سى بلاش ال 1300 لانه مافيهوش باور ، عربية كويسة وبرضو اعتمادية وقليلة الصيانة وقطع غيارها رخيصة وسعر اعادة البيع كويس جدا بس ما فيهاش اتوماتيك وكمان العربية واطية شوية من الارض التابلوه بتاعها حلو بس للاسف بيشقق بسرعة من الشمس وبما اننا بنتكلم عن 1500 فسحب البنزين حايبقى اعلى شوية وكمان حاتبتدى معاك فى السعر من حوالى 38 الف .

3- رينو كليو 1200 سى سى فيها تكييف وباور اعتمادية جدا امان جدا انت عارف بقى الاوربى شيك جدا من جوة يادوب بتشم بنزين مشكلتها فى سعر قطع الغيار غالية شوية مقارنة بالباقيين بس هى معمرة وكمان اعادة البيع مش قد كده واهم حاجة الصيانة اللى مش اى حد يعرف يشتغل فيها وممكن غلطة تدفعك قد كده ده غير انها ضيقة شوية فى صالونها وسعرها ممكن يبتدى معاك من 34 اللى هو الشكل القديم .

4- الكيا سيفيا 2 مش 1 ودى 1500 سى سى فيها برضو تكييف وباور واعتمادية جدا وثابتة جدا وامان وشكلها شيك وواسعة من جوا وقليلة الصيانة وقطع غيارها رخيصة وفيها اتوماتيك وسعر اعادة البيع كويس بس مش زى البرايد والاكسنت كمان العربية واطية شوية ودى ممكن تبتدى معاك من 39 الف .

shtaher2368
01-05-2011, 11:36 AM
عيبها الوحيد تخبيط دائم بالأبواب وزنة دائمة فى الأبواب

أقصد زنة فى التابلوة معايا موديل 1999

حاول تتبع الصوت وتعرف فين المشكلة وعامة دى شكلها مشكلة فردية يعنى مسمعتش اجماع بوجودها فى كل البرايد أو حتى اغلبها .

joophy
02-05-2011, 05:23 PM
السلام عليكم
اولا احب اشكر صاحب الموضوع لأني من ملاك البرايد سيدان وكنت بالاحظ انها بالفعل مش واخدة حقها
ثانيا بالنسبة لموضوع تخبيط الأبواب أنا برده عندي نفس المشكلة في الأبواب والتابلوه فيه زنه غريبه

المناور
03-05-2011, 05:02 AM
يا مرحب بيك يا joophy فى الرابطة

بالنسبة لصوت الزنة فى التابلوه ده أنا مش لاقيه عندى أو ممكن مكنتش واخد بالى منه فأنا حاحاول اركز كده واشوف الحاكية دى وياريت لو بقية الملاك يقولولنا لو عندهم نفس المشكة ولا لأ .

joophy
03-05-2011, 09:43 PM
مرحب بيك يا مناور باشا
بصراحة قطع الغيار مفيش احسن وارخص من الجندي اللي في شارع دمشق

المناور
04-05-2011, 12:44 PM
نفسى من فترة اجيب من عنده بس بكسل اروحله لأن حلمى سليمان جنب بيتى

joophy
06-05-2011, 01:08 AM
علي فكرة تقريبا دي من مشاكل البرايد لأني كان عندي نفس المشكلة وجبت سلك زي بتاعها مفيش كام شهر ورجعت المشكلة تاني

muhamedaly
11-05-2011, 11:33 PM
يشرفني الانضمام للرابطة .عندي كيا برايد 2002 اوتوماتيك.سيارة جميلة خاصة انني اشتريتها بعد 11سنة من استعمال الفيات .الاول 127 لمدة 7 سنين.ثم شاهين 3 سنين بس بصراحة عربية مش حلوة من ناحية النعومة والرفاهية.انا بعتبرها سيارة اجرة فقط مع احترامي لمالكي الشاهين.ثم اشتريت 128 لمدة اسبوع وحسيت بفرق لانها كانت 1100 سي سي وبيعتها علي طول.ولما قراءت عن الكيا حبيتها وربنا كرمني بالسيارة اللي معايا والحمد لله.السيارة اقتصادية للبنزين.جراية وصلت بيها لل150 بس بعد كده ندمت لان بحب السرعة 100 مش اكثر.ناعمة .صالون واسع .واهم حاجه انها عالية عن الارض.ويا رب يبارك فيها خاصة اني مكنتش احلم اركب سيارة كوري.الحمد لله.وشكرا

joophy
12-05-2011, 09:55 AM
اهلا وسهلا بيك يا استاذ محمد والجروب نور بيك وربنا يبارك لك في العربية ان شاء الله

بدر بسيونى
12-05-2011, 10:20 AM
موضوع متميز اسمحلى احييك عليه وبالتوفيق

ABD_CHEMIST
12-05-2011, 10:41 AM
السلام عليكم
بعد طول بحث الحمد لله ربنا كرمني وجبت برايد سيدان اوتوماتيك كامله2002 ب 38000 هل السعر ده كويس؟
بس أنا عايز اعرف مكان كهربي كويس في الجيزةاو المعادي عشان الكهربا بتاعهتا حاسس ان فيها مشاكل ومش عايز اي حد يلعب فيها عاوز حد كويس وشكرا

المناور
12-05-2011, 10:23 PM
يشرفني الانضمام للرابطة .عندي كيا برايد 2002 اوتوماتيك.سيارة جميلة خاصة انني اشتريتها بعد 11سنة من استعمال الفيات .الاول 127 لمدة 7 سنين.ثم شاهين 3 سنين بس بصراحة عربية مش حلوة من ناحية النعومة والرفاهية.انا بعتبرها سيارة اجرة فقط مع احترامي لمالكي الشاهين.ثم اشتريت 128 لمدة اسبوع وحسيت بفرق لانها كانت 1100 سي سي وبيعتها علي طول.ولما قراءت عن الكيا حبيتها وربنا كرمني بالسيارة اللي معايا والحمد لله.السيارة اقتصادية للبنزين.جراية وصلت بيها لل150 بس بعد كده ندمت لان بحب السرعة 100 مش اكثر.ناعمة .صالون واسع .واهم حاجه انها عالية عن الارض.ويا رب يبارك فيها خاصة اني مكنتش احلم اركب سيارة كوري.الحمد لله.وشكرا

مرحبا بيك يا استاذ محمد ياريت لو تنقلنا تجاربك مع العربية من حيث الاعطال اللى واجهتك وحليتها ازاى وهل فيه كماليات ضفتها للعربية وكل حاجة عن العربية

والكلام ده مش موجه لاستاذ محمد بس ياريت كل ملاك البرايد يعملوا نفس الحكاية للافادة

المناور
12-05-2011, 10:33 PM
السلام عليكم
بعد طول بحث الحمد لله ربنا كرمني وجبت برايد سيدان اوتوماتيك كامله2002 ب 38000 هل السعر ده كويس؟
بس أنا عايز اعرف مكان كهربي كويس في الجيزةاو المعادي عشان الكهربا بتاعهتا حاسس ان فيها مشاكل ومش عايز اي حد يلعب فيها عاوز حد كويس وشكرا

وعليكم السلام ورحمة الله
بالنسبة للسعر فهو غالى شوية بس مش مشكلة المهم الحالة ولو كانت كويسة فيغور القرشين الزيادة المدفوعين المهم العربية تبقى مريحة معاك ومتقرفكش أنا برضو كنت جايب عربيتى غالية عن السوق بالفين جنيه بس الحمد لله العربية عمرها ما قلت بأصلها معايا وده المهم ، وكمان ادينا بنتعلم.

ياريت تقولنا اخبار الاوتوماتيك معاك ايه ؟ واستهلاك البنزين بيعمل كام ؟

بالنسبة لكهربائى فأنا معرفش حد للاسف بس بإذن الله تلاقى حد فى الرابطة يفيدك

وأهلا بيك معانا فى الرابطة

المناور
12-05-2011, 10:44 PM
شكرا لمشرفنا بدر بسيونى على تنسيقه الموضوع

ABD_CHEMIST
21-05-2011, 04:55 AM
وعليكم السلام ورحمة الله
بالنسبة للسعر فهو غالى شوية بس مش مشكلة المهم الحالة ولو كانت كويسة فيغور القرشين الزيادة المدفوعين المهم العربية تبقى مريحة معاك ومتقرفكش أنا برضو كنت جايب عربيتى غالية عن السوق بالفين جنيه بس الحمد لله العربية عمرها ما قلت بأصلها معايا وده المهم ، وكمان ادينا بنتعلم.

ياريت تقولنا اخبار الاوتوماتيك معاك ايه ؟ واستهلاك البنزين بيعمل كام ؟

بالنسبة لكهربائى فأنا معرفش حد للاسف بس بإذن الله تلاقى حد فى الرابطة يفيدك

وأهلا بيك معانا فى الرابطة
ربنا يبارك فيك
بالنسبة للاوتوماتيك فهوا جميل جدا ولو عاوز تشد بيجيب معاك
واستهلاك البنزين تقريبا عامل 185 كم فى الصفيحة
لكن فى صوت زنة خفيفة فى التابلوه بتروح وتيجى مش عارف ليه
كمان فى صوت كركبة من العجل والعربية على سرعة بطيئة
اتمنى لو تفهمنى الحاجات دى من ايه وشكرا

mostafa hussen
08-06-2011, 02:39 PM
اولا احب احييكم علي الموضوع الشيق ده وانا فعلا استفدت منكم بس انا كان عندي سوال هي البرايد السيدان موديل 2001 تحت اسم كيا ولا سايبا ويا تري لو هي تحت اسم سايبا هل قطع غيارها هي هيي قطع غيار الكيا ونفس السعر كمان لو اشتريتها مستعمل اوتو ماتيك ايه الحاجات الي اخذ بالي منها وشكرا جزيلا

المناور
08-06-2011, 10:56 PM
موديل 2001 دى تبقى كيا وحتى لو كانت العربية سابا قطع الغيار هيا نفسها البرايد والاختلاف بينهم فى حاجات بسيطة فى الهيكل من برا زى الفانوس وكده
بالنسبة للعربية الاوتوماتيك فأهم حاجة الحالة وتتأكد ان الفتيس حالته كويسة علشان ماتدفعش دم قلبك فى صيانته أو لا قدر الله تغييره وانصحك خليك فى المانيوال اوفر فى استهلاك البنزين واسهل فى الصيانة وارخص فى قطع الغيار

mostafa hussen
09-06-2011, 01:06 AM
السلام عليكم ورحمه الله وبركاته اولا شكرا جزيلا لك استاذ مناور بس انا اصلا عايز اشتري عربيه لاختي وانت عارف البنات الي اول مره يسوقوا اهم حاجه عندهم الراحه وانا بصراحه كنت بفكر في الابيزا والاوبل كورسا الهاتش و البولو وكلهم تسعينات بس المشكله ان انا عرفت ان كلهم قطع غيارهم غاليه ومش اي حد بيفهم فيهم وحاجات تانيه وانا بصراحه من فتره كانت عيني علي البرايد عامه بس لما لقيت في منها اوتوماتيك وقطع غيارها كويسه واي حد يفهم فيها وسيدان بس تحس الي هي لما نفسها ومع ذلك انا كنت عايز اعرف هي واسعه من جوه ولا لا وشكرا جزيلا
:fun_car:

eltop
17-06-2011, 08:32 PM
السلام عليكم ورحمه الله وبركاته

انا شاري كيا برايد سيدان موديل 99 كامله اتومتيك منذ حوالي شهرين بصراحه العربيه جميله جدا بس في مشكله صغيره هل الاتومتيك بتاعه عند الضغط علي دوسه البنزين لازم ارفع رجلي وادوس تاني علشان ا نقل ممكن حد يكون عنده خبره يرد عليه ده في حاله اني دوست جامد علي البنزين فقط واذا دوست خفيف يتم النقل مباشره بدون رفع ودوس مره اخري

joophy
18-06-2011, 11:57 AM
اعتقد ده عيب في الفيتيس لان الفتيس الاوتوماتيك لو سليم 100 في ال100 يحرك العربية بمجرد ما تشيل رجلك من علي الفرامل وأي حاجة بتحصل غير كده يبقي فتيس والله اعلم

المناور
18-06-2011, 02:42 PM
كان بودى افيدك بس للاسف الاوتوماتيك أنا ماعرفش عنه حاجة وأهلا بيك معانا فى الرابطة

وائل فؤاد
02-10-2011, 09:16 AM
عندى كيا برايد العصفورة استهلاكها عالى فى البنزين الصفيحة بتعمل 200كم البوجيهات بتكربن بصرعة وتقطع وكمان الشكمان فيه دخان اسود مش عارف ايه المشكلة وابدا الحل منين .
لو سمحتم لو فية حد يعرف السبب والحل يساعدنى سواء الاخ ابونورا او اى حد متخصص من رابطة ملاك كيا

وائل فؤاد
03-10-2011, 09:23 AM
انا عربيتى مش اوتوماتيك دى مانيوال 1100 cc

us_ahmedsamir
19-11-2011, 03:03 PM
انا عربيتى مش اوتوماتيك دى مانيوال 1100 cc

ياباشا انا كان عندى المشكلة دى......... ظبط الكاربيتير وغير البوجيهات انا كان عندى نفس المشكلة وهاتظبط معاك ان شاء الله .....فيه واحد متخصص كاربيتير بس موجود فى السلام جنب الحرفيين

nawwara
19-11-2011, 03:54 PM
جزاك الله خيرا على المعلومات المفيدة , انا مقتنعة بالكيا برايد وبدور حاليا على واحدة حالتها كويسة فى حدود 24000 ولونها فاتح , يا ريت لو حضرتك تعرف حد عايز يبيعها او الاستاذ ابو نورا او بقية الأعضاء , ياريت تبلغونى , لانى بقالى فترة بدور عليها .

hamaad
19-11-2011, 05:03 PM
نظف الموتور كويس ونظف حوالين الحوض

sharooo
24-11-2011, 09:22 PM
عيبها الوحيد تخبيط دائم بالأبواب وزنة دائمة فى الأبواب

أقصد زنة فى التابلوة معايا موديل 1999

حاول تتبع الصوت وتعرف فين المشكلة وعامة دى شكلها مشكلة فردية يعنى مسمعتش اجماع بوجودها فى كل البرايد أو حتى اغلبها .
السلام عليكم
تخبيط دائم في الابواب ممكن يكون عند حضرتك اطار تالف(كوتش ملووح)او محتاج ترصيص او كوبلن ملحوم غلط وعامل رفه او حتى قاعده متور مكسوره
بالنسبه لزنه التابلوه ممكن تكون ناتجه من احتكاك الدركسيون بعلبه دراع المساحه وده علاجه بتفك العلبه والدركسيون وتركبهم صح من اول وجديد

sharooo
24-11-2011, 09:31 PM
عندى كيا برايد العصفورة استهلاكها عالى فى البنزين الصفيحة بتعمل 200كم البوجيهات بتكربن بصرعة وتقطع وكمان الشكمان فيه دخان اسود مش عارف ايه المشكلة وابدا الحل منين .
لو سمحتم لو فية حد يعرف السبب والحل يساعدنى سواء الاخ ابونورا او اى حد متخصص من رابطة ملاك كيا
السلام عليكم
غير فلتر الهوا والبوجيهات وفلتر النزين وراجه على خراطيم البنزين وممكن يكون التنك فيه خرم صغير او شرخ
ولاحظ لما تفول العربيه للاخرخالص بتشم بنزين؟ممكن يكون خرطوم الفايز متأكل...
موضوع بسيط محتاج ميكانيكي شاطر ويحلهولك بسهوله
لكن لرجع واقولك غير فلتر الهوا متنضفهوش وحاول تجيبه اصلي
ياريت اكون افدتك

may_moon911
18-12-2011, 04:10 PM
مساء الخير يا استاذ مناور
و انا جاي من المنتدي التاني لهنا لقيت الموضوع هنا كمان و دا شيء كويس عشان الكل يستفيد باذن الله
اخبارك حضرتك ايه ... عسي ان تكون بخير ان شاء الله

معلش عندي سؤال
هيا البرايد السيدان 2000 اللي هيا 1323 سي سي كام حصان بقي لاني مش عارف العربيه كام حصان للاسف
و دروت علي جوجل ما لقيتش حاجة تفيدني

رمضان5
15-01-2012, 08:05 PM
السلام عليكم ورحمة الله .اولا شكرا لصاحب الموضوع واتشرف بانضمام لرابطة ملاكى الكيا
ارجوا المساعدة يا جماعة انا اشتريت كيا برايد 2000 لاكن عايزة شغل كتير .مطلوب اعملها عفشة كاملة لانها بتشخشخ وانا ماشى بيها .والصالون عايز اجددة بالكامل وبالذات الابواب الامامية لان الازاز الكهرباء فية مشكلة واليدات عايزة تتغير .الفتيس فى الغيار الثانى بتترج اول ما اجا اطلع بيها.ودة واحد صاحبى قالى تلاقيها بوجيهات .وعايز اغير جميع السيور والفلاتر والزيوت.
من الاخر يا جماعة انا دخلت فيها لانى كان معايا 128 موديل 75 بقالها شهرين وقرفت منها ومش عارف ابيعها فدخلت فى دى ودفعت 12000 جنية وانا من الغردقة فعاوز اعرف رايكم وابدا باية قبل اية والتكلفة قد اية لانى عايز اظبطها بصراحة واعرف كل المطلوب علشان ابعت اجيبة من مصر فى الشحن
وشكرا يا جماعة وطولت عليكم انا اسف:fun_36_1_7[1]:

sharooo
15-01-2012, 10:12 PM
السلام عليكم ورحمة الله .اولا شكرا لصاحب الموضوع واتشرف بانضمام لرابطة ملاكى الكيا
ارجوا المساعدة يا جماعة انا اشتريت كيا برايد 2000 لاكن عايزة شغل كتير .مطلوب اعملها عفشة كاملة لانها بتشخشخ وانا ماشى بيها .والصالون عايز اجددة بالكامل وبالذات الابواب الامامية لان الازاز الكهرباء فية مشكلة واليدات عايزة تتغير .الفتيس فى الغيار الثانى بتترج اول ما اجا اطلع بيها.ودة واحد صاحبى قالى تلاقيها بوجيهات .وعايز اغير جميع السيور والفلاتر والزيوت.
من الاخر يا جماعة انا دخلت فيها لانى كان معايا 128 موديل 75 بقالها شهرين وقرفت منها ومش عارف ابيعها فدخلت فى دى ودفعت 12000 جنية وانا من الغردقة فعاوز اعرف رايكم وابدا باية قبل اية والتكلفة قد اية لانى عايز اظبطها بصراحة واعرف كل المطلوب علشان ابعت اجيبة من مصر فى الشحن
وشكرا يا جماعة وطولت عليكم انا اسف:fun_36_1_7[1]:
السلام عليكم
اولا الف مبروك
تانيا ابدا بالي ميخليش العربيه تعطل منك في الطريق او تسخن
راجع على المتور والعفشه والكونش والبطاريه وغير كل السيور وكل الفلاتر وكل الزيوت
لما تخلص المرحله ده رشها لو كانت محتاجه عشان محدش يسحب الرخصه (صلاحيه فنيه)
بعد كده ازبط الصالون
بعد كده ازبط بقا التكييف والزجاج الكهربا....وياريت ترفع صور عشان احددلك مزبوط

رمضان5
15-01-2012, 11:35 PM
السلام عليكم
اولا الف مبروك
تانيا ابدا بالي ميخليش العربيه تعطل منك في الطريق او تسخن
راجع على المتور والعفشه والكونش والبطاريه وغير كل السيور وكل الفلاتر وكل الزيوت
لما تخلص المرحله ده رشها لو كانت محتاجه عشان محدش يسحب الرخصه (صلاحيه فنيه)
بعد كده ازبط الصالون
بعد كده ازبط بقا التكييف والزجاج الكهربا....وياريت ترفع صور عشان احددلك مزبوط
شكرا لحضرتك على سرعة الرد وانا ححاول ان شاء الله اصورها من برة وجوة وارفع الصور للافادة اكتر

M. Ebid
12-03-2012, 12:09 PM
السلام عليكم و رحمة الله و بركاته
انا عضو جديد في مصر موتور
و حبيت انضم لرابطة ملاك كيا برايد لان الحقيقة الموضوع ممتاز جدا
و اشكر صاحب الفكرة بشدة علي هذه الرابطة
انا معايا كيا برايد سيدان 2001 اتوماتيك
و عملت فيها تقريبا كل حاجة
عمرة موتور كاملة خلصت الخراطة و هي حاليا لسه عند الميكانيكي ما استلمتهاش
و من فترة عفشة كاملة و فرش جلد و طقم كوتش و بطارية و سيرفيس كامل
انا ذكرت كل ما سبق علشان لو حد من السادة الاعضاء المحترمين عاوز يستفسر عن اي شئ انا تحت امركم و هذا من باب عموم الفائدة
تحياتي للسادة الاعضاء

شريف كامل
12-03-2012, 08:11 PM
السلام عليكم و رحمة الله و بركاته
انا عضو جديد في مصر موتور
و حبيت انضم لرابطة ملاك كيا برايد لان الحقيقة الموضوع ممتاز جدا
و اشكر صاحب الفكرة بشدة علي هذه الرابطة
انا معايا كيا برايد سيدان 2001 اتوماتيك
و عملت فيها تقريبا كل حاجة
عمرة موتور كاملة خلصت الخراطة و هي حاليا لسه عند الميكانيكي ما استلمتهاش
و من فترة عفشة كاملة و فرش جلد و طقم كوتش و بطارية و سيرفيس كامل
انا ذكرت كل ما سبق علشان لو حد من السادة الاعضاء المحترمين عاوز يستفسر عن اي شئ انا تحت امركم و هذا من باب عموم الفائدة
تحياتي للسادة الاعضاء
اهلا بيك في مصر موتورز وشكرا علي محاولتك افادة الاعضاء ولي سؤال
هل قطع غيار عمرة الموتور من التوكيل ام متوفرة في المحلات واين مع الشكر ؟

muhamedaly
13-03-2012, 02:25 AM
السلام عليكم و رحمة الله و بركاته
انا عضو جديد في مصر موتور
و حبيت انضم لرابطة ملاك كيا برايد لان الحقيقة الموضوع ممتاز جدا
و اشكر صاحب الفكرة بشدة علي هذه الرابطة
انا معايا كيا برايد سيدان 2001 اتوماتيك
و عملت فيها تقريبا كل حاجة
عمرة موتور كاملة خلصت الخراطة و هي حاليا لسه عند الميكانيكي ما استلمتهاش
و من فترة عفشة كاملة و فرش جلد و طقم كوتش و بطارية و سيرفيس كامل
انا ذكرت كل ما سبق علشان لو حد من السادة الاعضاء المحترمين عاوز يستفسر عن اي شئ انا تحت امركم و هذا من باب عموم الفائدة
تحياتي للسادة الاعضاء
ياريت تقولنا اخبار الفتيس ايه؟وعملت فيه شغل ولا لا.وبتستخدم زيت فتيس نوعه ايه؟ومنين اشتريت قطع الغيار.وشكرا

AbOnOrA
13-03-2012, 02:33 AM
اهلا بيك في مصر موتورز وشكرا علي محاولتك افادة الاعضاء ولي سؤال
هل قطع غيار عمرة الموتور من التوكيل ام متوفرة في المحلات واين مع الشكر ؟
حاجة العمرة متوفرة استيراد فى الحرفيين بكثرة بس مش عارف مدى توفر كل الحاجة جديد ولا لاء
بس ممكن الاويل سيلات مثلا والجوانات والرفائع تلاقيها جديدة طبعا

ومع ملاحظة ان فى قطع غيار خاصة للموتور والفتيس هى هى بتاعة المازدا 121 والفورد فيستيفا فممكن تبقى نازلة باسم تانى ومتوفرة بس البياع مش عارف انها هى

AbOnOrA
13-03-2012, 02:35 AM
وبالنسبة لقطع الغيار زى ماقولت متوفرة استيراد فى الحرفيين
والجديد موجود عند الجندى وده ليه فرعين واحد قدام فندق السلام فى جسر السويس بجوار الشرقاوى
والشرقاوى نفسه عنده قطع غيار ليها
وفيه فرع تانى فى شارع دمشق
وفى شارع دمشق برضو فيه ( نافع ) قدام الجندى الناصية التانى وبرضو عنده حاجات كتير ليها
بس الاكثر تخصصا فى الكيا القديم عموماً هو الجندى

روبرت مجدي
13-03-2012, 10:48 AM
عندس استفسار ......
هل من الممكن اضيف على كيا برايد هاتشباك ( فوانيس امامية ) أو اضافة اضاءة ضعيفة ليها دون التأثير على الكهرباء و منين؟؟ .
شكرا.....

muhamedaly
16-03-2012, 12:22 AM
ياريت لو في حد معاه كيا برايد اوتوماتيك يقولنا بيستخدم زيت فتيس نوعه ايه؟وبيغيير كل كام كيلو؟وتقييمه لفتيس البرايد الاوتو؟وشكرا

mostafa fawzy
16-03-2012, 01:37 AM
انا عندى كيا برايد سيدان مو 1999 سنتر وزجاج كهرباء امامى و تكييف -وطبعا انا من الاسكندرية وارجو لو حد يعرف اماكن تواجد قطع الغيار الاستيراد فى الاسكندرية يعلن عنها ثانيا هل من الممكن يركب اسكاترا باور وتتكلف كام وكذلك اريد تغيير العفشة الامامية وكذلك الخلفية هى عندى حالتها معقولة لكن بقى ليها 4 سنوات لم اجدد فبها شى وكم تتكلف يعنى ركبتين كاملين بالطنابير وخلفى 2 ياى بالمساعد لانى ركبت مساعدين خلفى جداد كورى وعمرهم كان قصير لذا سوف اجرب الاستيراد

AbOnOrA
16-03-2012, 03:20 AM
جيب مساعدين Kyb يابانى ممتازين

M. Ebid
18-03-2012, 07:28 AM
اهلا بيك في مصر موتورز وشكرا علي محاولتك افادة الاعضاء ولي سؤال
هل قطع غيار عمرة الموتور من التوكيل ام متوفرة في المحلات واين مع الشكر ؟
السلام عليكم و رحمة الله و بركاته
اولا اعتذر عن عدم الرد بسرعة لاني كنت بعمل تليين للموتور
ثانيا كل قطع غيار عمرة الموتور اشتريتها من محل اسمه ابو زيد متخصص كيا
و ده مكانه المريوطية فيصل ناس محترمين جداااا و بيقولوا علي الحاجة الوحشة وحشة و الكويسة كويسة
و بالنسبة للخراطة في ورشة خراطة بردة في المريوطية فيصل بس تحت الدائري اسمها حمادة الاسمر
ناس في منتهي الاحترام و الادب و الحرفية لدرجة اني حاولت ادفع اكرامية قبل شغل الخراطة ردوا عليا : احنا مش في حكومة يا بيه لما موتورك يخلص احنا عاملين صندوق للعمال
ارجو ان اكون اضفت .
تحياتي

AbOnOrA
18-03-2012, 07:36 AM
السلام عليكم و رحمة الله و بركاته
اولا اعتذر عن عدم الرد بسرعة لاني كنت بعمل تليين للموتور
ثانيا كل قطع غيار عمرة الموتور اشتريتها من محل اسمه ابو زيد متخصص كيا
و ده مكانه المريوطية فيصل ناس محترمين جداااا و بيقولوا علي الحاجة الوحشة وحشة و الكويسة كويسة
و بالنسبة للخراطة في ورشة خراطة بردة في المريوطية فيصل بس تحت الدائري اسمها حمادة الاسمر
ناس في منتهي الاحترام و الادب و الحرفية لدرجة اني حاولت ادفع اكرامية قبل شغل الخراطة ردوا عليا : احنا مش في حكومة يا بيه لما موتورك يخلص احنا عاملين صندوق للعمال
ارجو ان اكون اضفت .
تحياتي
اضافه قيمة تسلم ايدك :GROWIN~12:

M. Ebid
18-03-2012, 09:11 AM
اضافه قيمة تسلم ايدك :GROWIN~12:
شكرا لذوقك يا أستاذ وائل
و فعلا انا مستعد لتقديم اي مساعدة للسادة الاعضاء فيما يخص الكيا برايد سيدان اتوماتيك
إن خير الناس انفعهم للناس
تحياتي .

hamaad
18-03-2012, 09:26 AM
انا عندى كيا برايد سيدان مو 1999 سنتر وزجاج كهرباء امامى و تكييف -وطبعا انا من الاسكندرية وارجو لو حد يعرف اماكن تواجد قطع الغيار الاستيراد فى الاسكندرية يعلن عنها ثانيا هل من الممكن يركب اسكاترا باور وتتكلف كام وكذلك اريد تغيير العفشة الامامية وكذلك الخلفية هى عندى حالتها معقولة لكن بقى ليها 4 سنوات لم اجدد فبها شى وكم تتكلف يعنى ركبتين كاملين بالطنابير وخلفى 2 ياى بالمساعد لانى ركبت مساعدين خلفى جداد كورى وعمرهم كان قصير لذا سوف اجرب الاستيراد
قطع غيار الاستيراد بتاع كيا برايد عند واحد فى صلاح الدين اسمه ياسر وشغال فى سوزكى مكانه فى اخر شارع صلاح الدين فى العطارين وانت جاى من عند الكورنيش( قبل اخر شارع يمين) وركب مساعدين kyb اشتريهم من عند الراشد مساعدين يعيشوا بجد

احمد غالى
20-03-2012, 12:48 AM
السلام عليكم موتور الكيا برايد بتاعتى بياكل زيت ووديتها للميكانيكى قال عايزه عمرة اعمل العمرة ولا موتور استيراد ولا ابيعها واخلص هى موديل 2000 وعاملة 170000كم ولو عاشترى الموتور استيراد تنصحنى منين يا ابو نورا وشكرا لأهتمامكم

AbOnOrA
20-03-2012, 04:51 AM
شكرا لذوقك يا أستاذ وائل
و فعلا انا مستعد لتقديم اي مساعدة للسادة الاعضاء فيما يخص الكيا برايد سيدان اتوماتيك
إن خير الناس انفعهم للناس
تحياتي .
شكر وتقدير وربنا يجعله فى ميزان حسناتك يارب

AbOnOrA
20-03-2012, 04:56 AM
السلام عليكم موتور الكيا برايد بتاعتى بياكل زيت ووديتها للميكانيكى قال عايزه عمرة اعمل العمرة ولا موتور استيراد ولا ابيعها واخلص هى موديل 2000 وعاملة 170000كم ولو عاشترى الموتور استيراد تنصحنى منين يا ابو نورا وشكرا لأهتمامكم
اولاً اهلاً بيك فى مصر موتورز

ثانياً المواتير بتاعتها موجودة فى الحرفيين سواء ال 1100 سى سى او ال 1300 وكذلك قطع غيار الموتور

ثالثاً العمرة ممكن تجيب نتيجة كويسة لو اتعملت صح وبقطع غيار صح ومتحتاجش تروح المرور تثبت موتور جديد

احمد غالى
24-03-2012, 11:38 PM
شكرا يا ابونورا على الرد ولكن تقريباً الموتور 1300 فى الحرفيين عامل كام تقريباً وهل لازم يكون ماشى مع الفتيس الأوتوماتيك ولا مالوش علاقة بالفتيس والعمرة الكاملة تقريباً بردو تتكلف كام ومعلش عاملينلك ازعاج بس زى انت اخونا الكبير واستحملنا وشكرا يا باشا

muhamedaly
25-03-2012, 07:04 PM
ياريت لو حد يعرف سعر الكبالن كاملين بالاكوسه بتاعتهم وفين الاقيهم.وهل في طريقه اعرف افرق بيها بين الحلو والتعبان.عربية كيا برايد اوتوماتيك.وشكرا

AbOnOrA
26-03-2012, 12:20 AM
شكرا يا ابونورا على الرد ولكن تقريباً الموتور 1300 فى الحرفيين عامل كام تقريباً وهل لازم يكون ماشى مع الفتيس الأوتوماتيك ولا مالوش علاقة بالفتيس والعمرة الكاملة تقريباً بردو تتكلف كام ومعلش عاملينلك ازعاج بس زى انت اخونا الكبير واستحملنا وشكرا يا باشا
ولا يهمك يا باشا انا يشرفنى انى اساعد باى معلومة بس للاسف معنديش فكرة عن الاسعار الخاصة بالموتور وقطع غياره الافضل تنزل تشوف بنفسك وتقولنا لقيت ايه SLAM

AbOnOrA
26-03-2012, 12:22 AM
ياريت لو حد يعرف سعر الكبالن كاملين بالاكوسه بتاعتهم وفين الاقيهم.وهل في طريقه اعرف افرق بيها بين الحلو والتعبان.عربية كيا برايد اوتوماتيك.وشكرا
اساءل عند الجندى حاجتة كلها اصلية ولو مفيش الاصلى بيقولك وليه فرعين واحد فى جسر السويس قدام فندق السلام والتانى فى شارع دمشق فى روكسى جمب بنزينة التعاون

joophy
13-05-2012, 10:38 PM
يا جماعة انا معايا برايد سيدان موديل 2000 وعاوز ابيعها هيا حالة فوق المتوسط يعنى عاوزة شوية شغل خفيف يعنى مثلا رفرف عاوز سكمرة خفيفة ومكنة زجاج كهرباء للباب اليمين بس كاوتش جديد وتكييف شغال وسنتر ولسه عامل لها طقم شمبر من كام شهر ممكن حد يقوللى تعمل كام ولو فى حد عاوز يشتريها يقوللى

toto_hoho82
12-07-2012, 08:58 AM
ما هو مقاس سير تكييف كيا برايد

AMR_AB
20-08-2012, 12:59 AM
عندى برايد 99 سيدان 1324 بعد ما غيرت الزيت لقيت خرطوم البخرة بيجيب زيت وفى دخانة بيضاء طالعة من الشكمان الواد حط 3 كيلو وغيرت فلتر هل يا ترى نوع الزيت شل السؤال هو حط زيت كثير ولا ايه الى حصل

imagine
26-08-2012, 08:29 PM
انا بشوف برايد سيدان كتييير اوتوماتيك
ممكن تقرير صغير الفتيس الاوتو مع الصيانه اللازمه ادائه فى البرايد كويس او لا

AMR_AB
02-09-2012, 12:12 AM
السلام عليكم و رحمة الله و بركاته
انا عضو جديد في مصر موتور
و حبيت انضم لرابطة ملاك كيا برايد لان الحقيقة الموضوع ممتاز جدا
و اشكر صاحب الفكرة بشدة علي هذه الرابطة
انا معايا كيا برايد سيدان 2001 اتوماتيك
و عملت فيها تقريبا كل حاجة
عمرة موتور كاملة خلصت الخراطة و هي حاليا لسه عند الميكانيكي ما استلمتهاش
و من فترة عفشة كاملة و فرش جلد و طقم كوتش و بطارية و سيرفيس كامل
انا ذكرت كل ما سبق علشان لو حد من السادة الاعضاء المحترمين عاوز يستفسر عن اي شئ انا تحت امركم و هذا من باب عموم الفائدة
تحياتي للسادة الاعضاء
طقم البساتم والصبابات والجوانات بكام

مانوورة
02-09-2012, 12:59 AM
بصراحة انا استفدت من الموضوع جداااا

جزاكم الله خيرا

hossamshibl
02-10-2012, 11:14 PM
السلام عليكم ورحمه الله وبركاته
جزاكم الله خير عن هذا الموضوع الجميل ... وربنا يجعله فى ميزان حسناتكم ان شاء الله ...
انا بشترى عربيه كيا العصفورة موديل 99 هيا راشه برا بس ومن جوه مش رشه ... هيا كانت واقفه 7 سنين ... وعدادها عامل 108 الف ... بس هيا فيها بارومه فى البيبان الاربعه من الركنه ... بس الراجل ماشى بيها عادى ... الميكانيكى قالى المفروض اغير الاربع ابواب وصاحبها بيقول ان سعرهم حوالى 700 جنيه وفيها كمان مشكله من قدام عاوزه تغيير المقصات والبيضيتين انا مش عارف الحقيقه فى الميكانيكا ولا افهم اى حاجه فيها واول مره اركب عربيه ... المهم ان صاحبها بيقول ان المقصات والبيضتين دول بتركيبهم يعملو 100 جنيه ... هو الراجل عارضها عليا نهائى 23500 بس الميكانيكى بيقولى انها عاوزه حاجات قول ب 1500 بس مكنتها حلوة والصالون ممتاز وهيا رشها من بره حلو ... وسواقتها مريحه ... بس انا بصراحه مش عارف اعمل ايه ... انصحونى يا اهل الخبرة ... وهل فعلا هيا اللى محتجاه حيبقى بالسعر ده بس ولا هما بيثبتونى علشان اشترى ... ولكم جزيل الشكر مقدما ... بالمناسبه هيا معاها رخصه 3 سنين ...

moataz1234
15-10-2012, 06:06 PM
السلام عليكم ورحمه الله وبركاته
جزاكم الله خير عن هذا الموضوع الجميل ... وربنا يجعله فى ميزان حسناتكم ان شاء الله ...
انا بشترى عربيه كيا العصفورة موديل 99 هيا راشه برا بس ومن جوه مش رشه ... هيا كانت واقفه 7 سنين ... وعدادها عامل 108 الف ... بس هيا فيها بارومه فى البيبان الاربعه من الركنه ... بس الراجل ماشى بيها عادى ... الميكانيكى قالى المفروض اغير الاربع ابواب وصاحبها بيقول ان سعرهم حوالى 700 جنيه وفيها كمان مشكله من قدام عاوزه تغيير المقصات والبيضيتين انا مش عارف الحقيقه فى الميكانيكا ولا افهم اى حاجه فيها واول مره اركب عربيه ... المهم ان صاحبها بيقول ان المقصات والبيضتين دول بتركيبهم يعملو 100 جنيه ... هو الراجل عارضها عليا نهائى 23500 بس الميكانيكى بيقولى انها عاوزه حاجات قول ب 1500 بس مكنتها حلوة والصالون ممتاز وهيا رشها من بره حلو ... وسواقتها مريحه ... بس انا بصراحه مش عارف اعمل ايه ... انصحونى يا اهل الخبرة ... وهل فعلا هيا اللى محتجاه حيبقى بالسعر ده بس ولا هما بيثبتونى علشان اشترى ... ولكم جزيل الشكر مقدما ... بالمناسبه هيا معاها رخصه 3 سنين ...


استاذى الفاضل انا معايا كيا برايد 1997 واللة اكبر عربية ممتازة
لو انت مستريحلها توكل على الله
بس اسعار قطع الغيار اكتر من اللى انت كاتبة مثلا المقصين بس سعرهم 150 جنية:10CC26~164:

muhamedaly
15-10-2012, 07:16 PM
لو في حد اشتري كوبلنين كاملين جداد او استيراد يا ريت يقول. وكام سعرهم ومن عند مين ؟ السيارة كيا برايد اوتوماتيك .وشكرا

AbOnOrA
15-10-2012, 10:54 PM
0101196221
0125634933
اتصل بنمرة من دول واسأله عن الجديد والاستيراد ديه ورشة متخصصة فى الكيا

anwss
22-10-2012, 02:53 PM
سلام عليكم يا جماعة ،، انا لسه جايب كيا برايد سيدان موديل 2000 اول امبارح فيها تكييف وحلوة فى المشي ولو فى حاجة حصلت معايا اكيد هقولكم ، انا فولت بنزين 90 عشان صاحبها كان مفولها 90.

muhamedaly
28-10-2012, 10:59 PM
0101196221
0125634933
اتصل بنمرة من دول واسأله عن الجديد والاستيراد ديه ورشة متخصصة فى الكيا
من فضلك دي ورشة تصليح ولا بيع قطع غيار ومكانها فين .وشكرا

Mohamed Abo Khater
13-01-2013, 01:34 PM
السلام عليكم ,, انا مشترك جديد و بشكركم علي الجروب الجميل ,, انا عندي كيا برايد سيدان و عايز اشتري قنطرة خلفي استيراد بس مش عارف ممكن اجيبها منين ,,, ممكن مساعدة

Mohamed Abo Khater
14-01-2013, 10:46 AM
السلام عليكم ,,, اولا اشكركم علي الجروب الجميل ,,, واريد ان اشتري جوز مساعدين و جوز كبالن واريد ان اعرف الاسعار واماكن الشراء الموثوقة ,,, شكرا

AbOnOrA
14-01-2013, 04:21 PM
بالنسبة للاستيراد عليك وعلى الحرفيين واسأل هناك على بتوع الكيا القديم والكورى القديم عموماً هتلاقى محلات كتير

اما بالنسبة للجديد فعندك الجندى ده متخصص فى قطع غيار الكيا وحاجتة مضمونة عندة فرع فى شارع دمشق روكسى جمب بنزينية التعاون اللى هناك وفيه محل تانى قدام فندق السلام فى جسر السويس

الاسعار فى حدود 200 - 250 جنية للمساعد بس فيه انواع طبعاً وعن تجربة ال KYB ممتاز وده يابانى

روبرت مجدي
21-01-2013, 01:40 PM
كلام مظبوط :THUMBS~220:
عم ابو نورا كلام ف السليم

mohammedabdelhade
26-01-2013, 12:22 PM
انا معايه برايد هتشباك مو 1999 عاوز اعرف ممكن اركب زجاج كهرباء ولا

sharooo
29-01-2013, 05:25 AM
السلام عليكم
انا ببيع عربيتي انشاء الله-برايد عصفوره 1997 تكييف تلاجه جنوط (ميلينيوم تايواني)سنترلوك -كاسيت بايونير -فرش جلد-4 مساعدين وعفشه من 5 شهور تقريبا- حوض وشنطه بدهان المصنع -جميع الاجزاء الكهربيه والعدادات والمساحات....تعمل بكفاءه - رخصه سنه ونصف مرور القاهره باسم المالك -نهائي 26.000 للتواصل01144407415
https://fbcdn-sphotos-g-a.akamaihd.net/hphotos-ak-ash4/310072_10151455969287783_1331081901_n.jpg
https://fbcdn-sphotos-c-a.akamaihd.net/hphotos-ak-ash4/391189_10151455968677783_2024445639_n.jpg

mohammedabdelhade
18-02-2013, 12:08 PM
انا عندي برايد هتشباك موديل 1999 في مشكله بسيطه ان العربيه صوتها بيبقي عالي اول ما ادورها الصبح ( السخان عالي ) بيوصل لغايه 2.5 علي العداد بتاع عدد دورات الماتور وبعيد بيقل هوه كده مظبوط ولا غلط انا مش عارف ممكن حد يفهمني

روبرت مجدي
19-02-2013, 10:05 AM
انا عندي برايد هتشباك موديل 1999 في مشكله بسيطه ان العربيه صوتها بيبقي عالي اول ما ادورها الصبح ( السخان عالي ) بيوصل لغايه 2.5 علي العداد بتاع عدد دورات الماتور وبعيد بيقل هوه كده مظبوط ولا غلط انا مش عارف ممكن حد يفهمني
ده طبيعى لأنى عندى نفس الموضوع ده لكن بتهدا بعد 5 دقايق

mohammedabdelhade
20-02-2013, 11:10 AM
ده طبيعى لأنى عندى نفس الموضوع ده لكن بتهدا بعد 5 دقايق

بعد ازنك دي انت لو بصيت في عداد عدد دورات الماتور اول ما تدور بيبقي علي كام انا عندي بيبقي 2.5 وبحس الصوت عالي هيا فعلا بتاخد 10 دقائق وبتسخن واطلع بيها وهل ممكن يتلغي ف يالصيف ولا هيخف لوحده في الصيه وهل ده عيب ولا حاجه طبيعيه في البرايد

روبرت مجدي
20-02-2013, 01:46 PM
ده طبيعى لأنى عندى نفس الموضوع ده لكن بتهدا بعد 5 دقايق

بعد ازنك دي انت لو بصيت في عداد عدد دورات الماتور اول ما تدور بيبقي علي كام انا عندي بيبقي 2.5 وبحس الصوت عالي هيا فعلا بتاخد 10 دقائق وبتسخن واطلع بيها وهل ممكن يتلغي ف يالصيف ولا هيخف لوحده في الصيه وهل ده عيب ولا حاجه طبيعيه في البرايد
لا يا باشا كلام ف سرك هيا الكيا برايد باردة :shyy: و ف الشتا بتبقى بزيادة :red_face10:

محمد عياط
11-03-2013, 09:17 PM
ياجماعة أنا عندي كيا برايد 2002 وعايز أعرف مقاس الشاسية وحوض العربية اللى فيه الموتور عاش واحد ميكانيكي قال ليه إن فيه شرخ بسيط في الشاسية وعايز يتلحم بس لازم مقسات حوض العربية

medooo1934
03-04-2013, 01:42 AM
السلام عليكم
حد يعرف الاريال ال الكهربا بتاع البرايد بيتباع فين وبكام
وشكرا

ingy ibrahim
08-05-2013, 10:41 PM
السلام عليكم انا عضوه جديده فى المنتدى وبشكر حضرتك على المعلومات القيمه بخصوص كيا برايد بس انا بجد فى حيره عايزه عربيه اتوماتيك مستعمله فى حدود 35000 جنيه اللى معايا و نزلت سوق السيارات مدينه نصر مع ميكانيكى بس متوفقتيش فى عربيه حالتها كويسه حضرتك تقترح عليا أعمل ايه وشكرآ لك

moataz1234
09-05-2013, 09:32 AM
السلام عليكم انا عضوه جديده فى المنتدى وبشكر حضرتك على المعلومات القيمه بخصوص كيا برايد بس انا بجد فى حيره عايزه عربيه اتوماتيك مستعمله فى حدود 35000 جنيه اللى معايا و نزلت سوق السيارات مدينه نصر مع ميكانيكى بس متوفقتيش فى عربيه حالتها كويسه حضرتك تقترح عليا أعمل ايه وشكرآ لك
الكيا برايد الاتوماتيك هتعمل فى الحدود دى من 32 الى 35 الف عربية اعتمادية جدا وهتستريحى جدا معاها ودا عن تجربة:shyy::shyy::shyy:

ingy ibrahim
09-05-2013, 11:53 PM
شكرآ لاهتمام حضرتك فى الرد عليا

احمد صلاح الدين
02-06-2013, 11:42 PM
ابو زيد دا انا جيبت من عنده ترموستات مروحة الصبح ورميته بالليل لانه مش اصلي

احمد صلاح الدين
02-06-2013, 11:44 PM
انا معايا برايد موديل99 وفي صوت تكتكة دايما ف العجل الخلفي واكتر من ميكانيكل كشف ع الطنابير والتيل والبلي لسة جديد وبيقولوا كله تمام حد واجهته المشكلة دي وسببها ايه

احمد صلاح الدين
02-06-2013, 11:47 PM
معايا برايد 99 وفي صوت تكتكة دايما ف العجل الخلفي خصوصا مع السرعة وكل الميكانيكية بيقولوا كل الاجزاء سليمة التيل والطنابير والبلي كله جديد
وانا محتاااااااااااار حد عنده تفسير؟؟؟

adm_mm
16-06-2013, 12:50 PM
مروحة الردياتير فيها ريشة مكسورة ومش لاقى المروحة لوحدها كل ما الاقيها الاقيها كاملة بالموتور والقميص اجيب المروحة بس منين؟؟؟؟؟؟؟؟؟؟؟؟؟؟؟

AbOnOrA
16-06-2013, 06:18 PM
صوت تكتكة دايما ف العجل الخلفي خصوصا مع السرعة وكل الميكانيكية بيقولوا كل الاجزاء سليمة التيل والطنابير والبلي كله جديد
وانا محتاااااااااااار حد عنده تفسير؟؟؟

ممكن تكون حصواية او مسمار لازق فى مداس الكاوتش وتتاكد بسهولة من اختلاف صوت التكتكه حسب طبيعة الارض اللى انت ماشى عليها مابين ترابيه او اسفلت وساعتها بتفك الفردة عند بتاع كاوتش وتبص فيها لحد ما تطلع الظلطه او المسمار

AbOnOrA
16-06-2013, 06:20 PM
مروحة الردياتير فيها ريشة مكسورة ومش لاقى المروحة لوحدها كل ما الاقيها الاقيها كاملة بالموتور والقميص اجيب المروحة بس منين؟؟؟؟؟؟؟؟؟؟؟؟؟؟؟
بصيت فى الحرفيين ؟؟

mebaklaz
16-10-2013, 08:59 AM
كل عام وانت بخير يا ابو نورا واحب اطمنك انا ابتديت اشد في العربية كيا يابيا 2006 ( درر) الي كانت واقفة عليا 33000 دفعت 30000 وبعدين 3000 في خلال شهرين

Abo.ZiaD
02-01-2014, 05:02 PM
السلام عليكم اعضاء المنتدى عامة واعضاء الرابطة خاصة
يسعدنى انى انضم ليكم بالرابطة خاصة انى من مقتنيى الكيا برايد " العصفورة " من سنتبن وهى عربية جميله جدا
مميزاتها " من وجهة نظرى المتواضعه "
1- صغيرة الحجم "سهل التنقل بيها وخاصة فى الزحم الشديد بمصرنا العزيزة - اركن بها فى مكان - خفيفة ... طبعا ده ميزة وعيب فى نفس ذات الوقت .. !!
2- أعتمادية " من استهلاك بنزين - قطع غيار رخيصة نسبيا - متوفرة " طبعا عند ناس معينة " ..!!
3- تنفع تكون عائلة وخصوصا لو عائلة صغيرة زى عائلتى ..!!
4- اعطالها قليله " طبعا ده حسب الحالة .. ومدى اهتمامك بيها يعنى اول متشتكى من حاجة توديها عند دكتور" ..!!
5- سعر اعادة البيع
العيوب " طبعا برضو من اللى انا شوفته منها "
1- خفيفة على الطرق السريعه " هههه بتخاف وتترعش لما يعدى جانبها اى نقل تقيل "
2- قطع الغيار منها الصينى كتيرررررر ولو مش عارف تفرق او تلاقى تاجر امين هتحتاس زيى كده :) ...!!
3- مشكله طبعا عويصة فى موضوع العفشة " احتمال كبير فى عيب مش عارف اكتشفه فيها " كل فترة اغير الكبالن سواء داخليه او خارجية تقريبا الفترة من ست الى ثمان شهور او سنه حسب استخدامى ليها "
4- انى الاقى فنى فاهم ومش فتاى وبيجرب او مش نصاب " طبعا مشكلة ناس كتير " وخصوصا انى بحاول استقرب ان يكون فيه حد عندى فى مدينه نصر ..!!
5 - مشكلة طبعا انها بدون كماليات زى الباور - التكييف - والزجاج الكهرباء - والسنتر طبعا اغلب الحاجات ديا ممكن تتركب بس بصراحه الواحد مش بيكون فاضى علشان يحط حاجة مش عامله مشكله فى سير العربيه

فى النهاية حبيت انقل تجربة ويمكن افيد حد وطبعا استفيد ان شاء الله ..
وربنا يوفقنا الى مايحبه ويرضاه

shaf3awy
08-01-2014, 11:26 AM
السلام عليكم ورحمة الله وبركاته
عندى مشكلة فى العربية برايد سيدان 98
العربية فيها رجرجة بتبدأ من سرعة 70 كيلو تقريبا ... الرجرجة تحت رجلى بحس ان العربية بتتهز وفى الفتيس واقل فى الدريكسيون
طبعا روحت ارصص والراجل قالى الجنوط وحشة ... روحت مغير الجنوط وطبعا رصصتها
ولكن للاسف ما زالت المشكلة موجودة .... يا ريت لو حد عنده خبرة او حصلت معاه نفس المشكلة يفدنى
شكرا :fun_36_3_16[1]:

shaf3awy
09-01-2014, 12:07 PM
اين التواصل :fun_36_1_30[1]:

bright 89
12-03-2014, 02:31 PM
انا لسة جايبة العربية الحمد لله
هى حالتها كويسة بس بيضايقنى اوى صوت رجة فى التابلوه والازاز بتاع الباب اللى ناحيتى بيترج كده لازم ابقى فتحاه او قفلاه ع الاخر عشان يختفى
الاصوات دى توتر وتضايق اوى
الكلام ده بيتربط و لا ده عادى فى عربية بقالها 20 سنة !!!

روبرت مجدي
13-03-2014, 10:17 AM
ممكن يكون موضوع الرجرجة خاص بالعفشة
لآزم تعرض العربية على عفشجي كويس يرفع العربية و يكشف عليها
ربنا يوفقك

bright 89
15-03-2014, 10:25 PM
ممكن يكون موضوع الرجرجة خاص بالعفشة
لآزم تعرض العربية على عفشجي كويس يرفع العربية و يكشف عليها
ربنا يوفقك

شكرا على رد حضرتك :)

asd202
21-03-2014, 07:00 PM
سلام عليكم هيا كيا برايد هاتش باك 99 لو الشاسية ملحوم من خبطة مش كبيرة قوى قدام والماتور محتاج تزبيط عشان بيسرب زيت فهل ده يقلل سعرها كتيروهل لو ب 23 الف كده كتير عليها وهل ممكن تنزل اكتر من كده كمان هى مفيهاش تكييف ومانيوال