المساعد الشخصي الرقمي

مشاهدة النسخة كاملة : دليل الطرق المصرية


miam0502788391
28-11-2010, 08:40 PM
هذا الموضوع دعوة الى كل الأعضاء الذين يسافرون على طرق مصر المحروسة والغرض من طرح هذا الموضوع أن تعم الفائدة على كل من يريد السفر الى مكان ما , لأنى بحثت فى قسم الطرق و السفارى لم أجد شىء عن هذا الموضوع
يعنى مثلا أنا فى المنصورة لو عاوز أسافر القاهرة ايه الطريق اللى ممكن اسلكه , طوله كام كيلو , وصف الطريق , واسع أم ضيق , عليه مطبات ولا لأ , ايه المحاذير اللى المفروض المسافر على الطريق ياخد باله منها
ولأن معظم الأعضاء عندهم سيارات وسافروا أماكن كثيرة فالدعوة عامة الى كل الأعضاء بالمشاركة

وأستأذن حضراتكم أن يكون الكلام عن طريق ما بالطريقة الآتية :
- اسم الطريق
- طول الطريق
- المدن التى يمر عليها
- وصف الطريق يعنى مميزاته وعيوبه ( مفرد أو مزدوج , مضاء أو مظلم , طريق واسع أو ضيق, مطبات ......الخ)
- عليه رادار وأماكن الرادار
- فيه كمين مباحث ولا لأ

لو فى اى عضو يريد أن يزيد عن تلك النقاط مفيش مشكلة حتى تعم الفائدة

ومع كثرة المشاركات سنجد أننا جمعنا كل الطرق اللى مصر ويصبح الموضوع دليل للسفر لكل واحد منا يريد السفر لأى مكان

miam0502788391
28-11-2010, 08:43 PM
ونبتدى بسم الله

- اسم الطريق : المنصورة – جمصة (رافد للطريق الدولى الساحلى)
- طول الطريق : حوالى 55 كيلو
- المدن التى يمر عليها : الطريق يعتبر جديد وتم شقه وسط الأراضى الزراعية إلا انه يمر على مدينة بلقاس من من خارج المدينة ثم عدة قرى تابعة لمدينة بلقاس حتى جمصة
- وصف الطريق :
الطريق مزدوج على طوله ومن المنصورة حتى مدينة بلقاس الطريق ضيق ومن أضيق الطرق المزدوجة اللى ممكن تشوفها فى حياتك لك أن تتخيل لو اتنين نقل تقيل بيمشوا جنب بعض لا يفضل بينهما سوى مسافة ضيقة لا تتجاوز 50سم لكن بعد بلقاس الطريق بيوسع حتى الطريق الساحلى
الطريق مظلم فى معظمه تقريبا مفيش عليه نور يعنى خد بالك بالليل
كتير الملفات (حوالى 16 ملف انا عديتهم) ومنهم اتنين خطرين وبتحصل عندهم حوادث سلمكم الله
المشى على الطريق كويس والرصف جيد لأنه جديد وحديث نسبيا
المطبات : الطريق فى أول إنشائه كانت لا توجد عليه مطبات لكن حديثا تم إنشاء مطب عند قرية وزير واثنين آخرين عند قرية زيان
- عليه رادار وأماكن الرادار: لا يوجد عليه رادار لكن كل حين ومين ممكن الظابط يطلع هو واللى معاه ويحطوا كاميرا ويصطادوا المخالف لكن فى اغلب الأحوال مفيش رادار
- فيه كمين مباحث ولا لأ : مفيش

miam0502788391
28-11-2010, 08:48 PM
اسم الطريق : جمصة – بورسعيد ( امتداد للطريق الساحلى)
طول الطريق : حوالى 80 كيلو
المدن التى يمر عليها : من الخاج دمياط الجديدة ودمياط
مميزاته :الطريق مزدوج على طوله واااااااااااسع ممتد ورصف جيد ومفيش مطبات عليه, قليل الملفات
عيوبه : مظلم كله حتى غير مجهز بأعمدة نور ولا ناويين يجهزوه , فواصل الكبارى العلوية اللى عليه من أسوأ الفواصل اللى هتشوفها فى حياتك ومفيش اسوأ من كده بتبهدل الكاوتش
عليه اتنين رادار الأول قبل مدخل دمياط وده تابع لمرور دمياط والتانى فى مدخل بور سعيد وده تبع لمرور بورسعيد فخدوا بالكوا

miam0502788391
28-11-2010, 08:49 PM
وده رابط
ازاي اروح دسوق من القاهرة
http://www.masrmotors.com/vb/showthread.php?t=25358

miam0502788391
28-11-2010, 08:51 PM
وده رابط
تحديث / المسافات بين القاهرة والاسكندرية الى جميع المحافظات
http://www.masrmotors.com/vb/showthread.php?t=20519

miam0502788391
28-11-2010, 08:52 PM
وده رابط كمان

الطريق من المنصورة لكفر الشيخ
http://www.masrmotors.com/vb/showthread.php?t=21722

miam0502788391
28-11-2010, 08:54 PM
كمان رابط
المسافات من والى القاهرة
http://www.masrmotors.com/vb/showthread.php?t=576

miam0502788391
28-11-2010, 08:55 PM
رابط كمان

أفضل خط سير من الصحراوي (اسكندرية) لفندق جراند حياة؟
http://www.masrmotors.com/vb/showthread.php?t=3610

miam0502788391
28-11-2010, 08:57 PM
كمان رابط

طريق المنيا الى الاسكندرية طريق يكون كويس وسهل
http://www.masrmotors.com/vb/showthread.php?t=25729

corsair
30-11-2010, 03:26 PM
الله عليك يا دكتور

ولو عم خالد خليفة دخل هنا هتلاقي GPS متحدث بالكامل بجميع الشوارع والميادين والطرق في مصر

miam0502788391
30-11-2010, 05:38 PM
الله عليك يا دكتور

ولو عم خالد خليفة دخل هنا هتلاقي GPS متحدث بالكامل بجميع الشوارع والميادين والطرق في مصر

يا باشا اهلا بيك ونورت الموضوع اول واحد عبرنى بمشاركة الله يخليك يا استاذ احمد
الاستاذ خالد خليفة موسوعة فى طرق مصر ما شاء الله

خالدخليفة
30-11-2010, 10:39 PM
ياعم والله انا خايف اكتب عن كل الطرق اللى مشيتها استولى منك على الموضوع وتتهمنى بسرقته
ولذلك هكتفى بطريقين حوالين بلدكو بس
الاول / دمياط / المنصورة / القاهرة
أ ــ دمياط / المنصورة
بينهما طريقان
الأول / طريق دمياط / فارسكور /الزرقا/ المنصورة
وهو أسوأ طريق فى العالم ويشبه طريق اسيوط / البلايزة (بلدنا / 25 كيلو جنوب غرب اسيوط على الجبل الغربى ) وضيق جدا ويسع تريلتين واحدة رايحة وواحدة جاية مع حرص ال2 السائقين جدا والا تمت جريمة دهس اى شخص لان هذا الطريق ملىء بالقرى وهو نهارا يمكن السير فيه لاهالى واقارب سكان المناطق المطلة عليه وليلا فالمسير عليه مغامرة عايزة واحد قلبه ميت زى حالاتى او واحد مضطر او واحد ممعاهوش رخص لانه ليس عليه اى كماين غير كمين جميل كده عند منطقة فارسكور وهو كمين يمكن ان نقول ان اكبر نشاط يقوم به المسئولين عنه هو التثاؤب والنوم غالبا
طب المسير ليلا مغامرة ليه ؟؟؟
ببساطة لانه طريق مظلم وعرضه لايزيد عن 6 او 7 متر واتجاهين وكل اللى جاى ضارب النور العالى ف وشك
يعنى سيادتك لو نظرك متين هتروح عينيك تاعباك يا اما بقى تخبط عيل /راجل ست او تقاوم الانوار العالية حتى مش الواطى
وهذا الطريق لايصلح الا لعربات الكارو فقط او التوك توك
ب ــ طريق دمياط / كفر البطيخ / كفر سعد / شربين / المنصورة
وهو طريق افضل نسبيا وعيبه كثرة المطبات عليه والتى تعطل مسير اى سيارة
ولك ان تتخيل ان هذا الطريق طوله 63 كيلو متر حتى موقف السنانية بدمياط ومع ذلك العفاريت اللى زى حالاتى بياخدوها فى 50 او 55 دقيقة واما المسير المعقول فتاخدها فى ساعة وربع
ثانيا / طريق المنصورة / القاهرة
وهو طريق افضل من الطريقين نسبيا لكن يعيبه كثرة مطباته والتى تم ازالة نصفها تقريبا لكن الأهالى يقومون بعمل مطبات بديلة وفى بعض مناطقه يكون ضيقا جدا مثل طنامل واجا ودقادوس حتى كفر شكر ورغم ان طول هذه المسافة من الطريق (المنصورة/ بنها) 72 كيلو الا انك لو سواق عفريت زى حالاتى (بتجرى بسرعة ) فانك تقطعها فى ساعة بالتمام والكمال وهذا يدل على سوء حالته ايضا
وأسوأ منطقة فيه هيا منطقة ميت غمر فتجد فيها اعجب مطبات فى العالم فهى تجعل السيارة ترقص لمسافة طولها 3 متر تقريبا
ثم المسافة من بنها للقاهرة وهى افضل كثيرا لانها جزء من طريق القاهرة / اسكندرية الزراعى
اسوأ كمين على هذا الطريق
كمين قرية السلام او السوالم مدخل دمياط للقادم من القاهرة او المنصورة
وكمين كفر شكر للقادم من المنصورة الى القاهرة
وهما أسوأ كمينين فى مصر بالأضافة الى كمين كوبرى عبود فوق موقف عبود
لانهم لاينظرون الى مصالح الناس بل كل مايهمه هو البطاقة ويكشف عليها كومبيوتر ولو عليك تهمة بتشابه اسماء يمسك فيك وميسيبكش ولذلك كل سائقى الميكروباس تجدهم ينتهون من جمع الاجرة قبل هذه الكماين
اما وقتك ومصالحك يغورو فى ستين او سبعين داهية
اجمالى المسافة من دمياط للقاهرة بالقطار 203 كيلو وبالسيارة حوالى 185 كيلو لان القطار يذهب الى طنطا اولا
كفاية كده ياعم
الموضوع بتاعك مش بتاعى
وهتكلم عن طريق المنصورة / المحلة / طنطا / القاهرة وقت تانى

ابن فنان
30-11-2010, 11:33 PM
مشكورررررررررررررررررررررر

خالدخليفة
01-12-2010, 06:01 AM
طريق المنصورة / المحلة / طنطا
هو طريق عبارة عن 4 حارات على اتجاهين بينهما سور فاصل او جزيرة احيانا
90 % من الطريق مظلم ليلا يعنى لو عربيتك مفيهاش نور نصيحة متمشيش فيه بالليل
به 3 كماين واحد عند خروجك من مدينة المنصورة وتركك بالتالى لمحافظة الدقهلية ودخولك الغربية (مدخل سمنود ) وهم لايكترثون (لايهتمون ) كثيرا بالسيارت طول النهار بيتفرجو على العربيات وقافلين الشارع برضه
ثم تمركز لايرقى الى مرتبة الكمين قبل محلة أبو على
ثم كمين فعلى فى مخرج المحلة او مدخل الطريق للقادم من طنطا للمنصورة فهو لايدخل مدينة المحلة
من المنصورة حتى المحلة مظلم جدا ليلا ومنحنياته كثيرة ولاتوجد عليه اى لافتات ارشادية الا فى مطلع احد الكبارى فى سمنود ثم عند مدخل طريق كفر الشيخ
مستوى الطريق سيء جدا واضف اليه المطبات والتى هى عبارة عن مفاجآت تجدها امامك
اعجب ما فى هذا الطريق
انك بعد صعودك للمطب او بعد م تشرب المطب ان كنت غريبا بمسافة حوالى 20 متر تجد يافطة بعد المطب تقول ( احترس امامك مطب / ههههههههه مفروض ان توضع قبل المطب ب50 متر مش بعده )
ضيق جدااااااااااااا عند محلة أبو على ويجب عليك ان تلتزم الحذر والحرص من ضيق الطريق وزحام الناس عليه
ثم يلف الطريق حول مدينة المحلة وتخرج منه لتجد نفسك فى منطقة اسمها منشية البكرى بالمحلة او المستعمرة او الجوازات (كلها منطقة واحدة ب 3 اسماء ) وبعد هذه المنطقة يجب ان تكون حريصا جدا فى قيادتك لان هذه المنطقة حتى منطقة عياش ( او منية شنتنا عياش ) مليئة بقاعات الأفراح والناس العابرة للطريق والسيارات القاطعة للطريق دخولا وخروجا من وألى قاعات الافراح واكبرها هناك قاعة اسمها جراند بابليون وهى تتسبب فى كثير من مخاطر هذه المنطقة نظرا لكثرة روادها واستهبال اصحاب الافراح
بعد هذه المنطقة هناك منطقة محلة روح وقبلها ستجد علامة على اليمين تحذرك من وجود مزلقان للقطارات
هذا المزلقان لابد ان تعبره على السرعة الأولى فقط لانه مكسر جدا
ومن بعد قاعة جراند بابليون للافراح حتى هذا المزلقان الطريق كله ليلا مظلم ومنحنياته كثيرة
ثم يضيق الطريق نسبيا حتى تصل طنطا طبعا يمينا قبل الكوبرى المتجه الى الاسكندريه ويمينا من بعد الكوبرى المتجه للقاهرة
فاذا ذهبت الى القاهرة احترس بعد نزولك من الكوبرى حيث يوجد مطبين صناعيين يفصل بينهما مسافة تقل عن 500 متر تقريبا والمنطقة حولهما مظلمة فاذا دخلت النفق تحت قطار المنصورة فاحترس وانت خارج منه سيقابلك بعده بحوالى 200 متر مطب اخر ثم ستجد الطريق كله به منحنيات كثيرة حتى قويسنا وبعد نزولك من كوبرى قويسنا سيستقيم الطريق نسبيا حتى بنها ثم ينحنى الطريق الى اقصى اليسار على الكوبرى وهو به مطبان محترمان قبل نهايته مع تكسير فى الطريق على اليمين فالزم اليسار مع تهدئة السرعة عند تقابلك مع السيارات القادمة من المنصورة الى القاهرة
ثم عند طلوعك الكوبرى الذى يليه (كوبرى بنها ) خـفـض سرعتك وانت طالع الى اقل من 90 كيلو فى الساعة مع تشغيل اشارات الانتظار
طب ليه كده؟
لان كوبرى بنها ليس منبسطا زى كل كبارى الدنيا لكنه مبنى على شكل رقم 8
بالعربى فان طلعته مسرعا ستحس كأن السيارة طارت او اتهبدت او اتخبطت ومن تحتك ستحس بهزة فى السيارة ولذلك لابد من تخفيض السرعة لامتصاص هذا العيب البنائى فى الكوبرى
مدينة طوخ من المدن المزدحمة والمليئة بقائدى الموتوسيكلات الذين يعبرون الشارع فجأة ومن اى مكان وبأى طريقة
دائما تكون حريصا عند طوخ وامسك الشمال وعينك على الشمال واليمين تكشف الطريق حتى آخره ويدك قريبة من الكلاكس ....فربما تجد بوز موتوسيكل خرج لك من بين السور على شمالك أو موتوسيكل أخر قفز امامك من اليمين ثم قبل كوبرى قها منحنى خطر جدااااااااا ويجب تخفيض السرعة فيه لانى من انصار عدم ترك الحارة فى المنحنيات اما اذا كنت ناوى تترك حارتك فلابد من النظر فى جميع مراياتك حتى تعرف من القادم وتتلاشاه
من المحلة وحتى عبود لاتوجد كماين على هذا الطريق سوى كمين رادار وهو عند طنطا للقادم من بركة السبع الى طنطا يعنى من بعد قويسنا تلم نفسك فى السرعة لان الكمين ممكن يقدموه شوية او يأخروه شوية
كفاية كده
وكمل انت يادكتور احسن تقول الحقووووووووونى استولى على موضوعى
ههههههههههههههه

corsair
01-12-2010, 07:31 AM
الله عليك يا عم خالد مش قولتلك GPS في صورة بني ادم

وتسلملنا ايدك يا دكتور علي الموضوع الجميل ده اللي مش هيخلي حد يتوه في البلد ديه هههههههههههههههههههه

miam0502788391
01-12-2010, 02:56 PM
ياعم والله انا خايف اكتب عن كل الطرق اللى مشيتها استولى منك على الموضوع وتتهمنى بسرقته


يا استاذ خالد انا عملت الموضوع ده علشانك انت مخصوص لأنى عارف انك اكتر واحد فى المنتدى لف الجمهوريه ( ما شاء الله اللهم لا حسد )
وبعدين الموضوع ده مش ملكية فكرية ولا حاجة ده وقف لله تعالى اى حد بيسافر كتيير يدخل يفيد اعضاء المنتدى لوجه الله من باب النصيحة
وبعدين احنا عاوزين من حضرتك كل الطرق اللى انت سافرت عليها ايوه كلها

خالدخليفة
01-12-2010, 08:34 PM
وبعدين احنا عاوزين من حضرتك كل الطرق اللى انت سافرت عليها ايوه كلها
كل الطرق ؟؟؟؟؟؟؟؟؟؟
كلها؟؟؟؟؟؟؟؟؟؟؟؟؟؟؟
يبقى عوضك على الله فى الموضوع
وانا اللى هشيله كده
ههههههههههههههههههههههه

miam0502788391
01-12-2010, 09:23 PM
كل الطرق ؟؟؟؟؟؟؟؟؟؟
كلها؟؟؟؟؟؟؟؟؟؟؟؟؟؟؟
يبقى عوضك على الله فى الموضوع
وانا اللى هشيله كده
ههههههههههههههههههههههه

وهو ده المطلوب اثباته
ههههههههههههههههه

miam0502788391
01-12-2010, 09:36 PM
الأول / طريق دمياط / فارسكور /الزرقا/ المنصورة


فى شوية زيادات بسيطة بالنسبة للطريق ده بحكم انى بتردد عليه
اولا كثرة المطبات يعنى تحس انه الطريق ده كان فى الأصل مطبات وبعدين عملوا ليه طريق يمكن اكتر من 50 مطب فى مسافة 55 كيلو من المنصورة لفارسكور وعند كل بلد او قرية على الاقل مطبين او تلاتة ودى بتبقى كارثية بالليل لأن الطريق زى ما حضرتك عارف مظلم والغريب على الطريق لا يراها
ثانيا الكمائن : واشهرهم اللى فى نهاية حدود الدقهلية قبل دمياط وبالتحديد عند قرية بساط كرم الدين وكل مهمة هذا الكمين تقليب خلق الله يعنى انا مرة شوفت العساكر موقفين واحد معاه موتوسيكل وله كرسى جانبى زى بتاع مشرفين الزراعة زمان والراجل كان معاه مستحضرات تجميل فلازم يسيب لهم حاجة علشان يعدوه قام الراجل مطلع علبة كريم شعر لهم تمنها حوالى 7ج..... وحاجات من دى كتيير
والكمين ده دخل موسوعة جينيس فى عدد المطابات 6 مطبات واحد قبله وواحد بعده واربعه عنده تحس انك داخل دولة تانية
ثالثا الرادار : مفيش عليه رادار ولا مره شوفت كمين رادار عليه وهما مريحيين دماغهم من كده لأن اكبر سرعة على الطريق 80 كيلو

corsair
01-12-2010, 09:41 PM
شد حيلك يا خالد باشا عايزك تنزل علينا بجوجل ايرث

miam0502788391
01-12-2010, 09:44 PM
ب ــ طريق دمياط / كفر البطيخ / كفر سعد / شربين / المنصورة


الطريق ده على الرغم من انه عليه مطبات كتيره الا انه ارحم من الطريق الشرقى ( المنصورة - شربين - الزرقا - فارسكور - دمياط) لأن مطباته على الاقل واضحة والطريق مزدوج ومضاء فى معظمه يعنى المشى عليه بالليل كويس كمان مفيش عليه كبارى علوية الا كوبرى كفر البطيخ
الرادار : الطريق كله امان ومفيش رادار الا قبل كمين قرية السلام فى مدخل دمياط يعنى القادم من المنصورة بعد ما يعدى شربين ويعدى كمين قرية راس الخليج اللى عند آخر حدود الدقهلية يهدى السرعة ويعمل حسابه ميزيدش عن 90 كيلوا وبعد ما يعدى كمين السلام يبقى يفتح السرعة براحته

miam0502788391
01-12-2010, 09:49 PM
شد حيلك يا خالد باشا عايزك تنزل علينا بجوجل ايرث

وانت يا احمد باشا فين مشاركاتك انت مش بتسافر المنيا ولا ايه وبعدين انت سافرت اماكن سياحيه كمان
احكى بقى

drmagola
01-12-2010, 11:27 PM
موضوع روعة يا دكتور
بجد مفيد و ياريت الكل يشارك فيها
علشان نساعد بعض

خالدخليفة
02-12-2010, 12:20 AM
علشان انت حبيبى بس يادكتور محمد
فانا هحكى على الطرق الغير معروفة اولا
طريق القاهرة / ابو المطامير
ابو المطامير لها طريقان
الأول
تمشى طريق القاهرة / اسكندرية الزراعى وتكمل بعد دمنهور حتى مدخل طريق حوش عيسى وتسير فى طريق حوش عيسى حتى تصل اليها وتكمل بعدها مسافة حوالى 20 او 25 كيلو
المسافة من القاهرة حتى طنطا تم شرحها سابقا
لكن بعد بركة السبع وقبل مدخل طنطا وعند منطقة دفرة تحديدا ستنحرف يمينا على الكوبرى الجديد لكى تدخل الطريق الدائرى الى تنزل منه عند كفر الزيات بدون المرور على طنطا
فى أخر هذا الطريق وعند مدخل مركز التوفيقية اخر مراكز الغربية ستجد كمين لكنه لايقوم بتعطيل الطريق ولا حتى يقوم بالفرجة على البنى آدمين الا فيما ندر ثم تستكمل المسير حتى ايتاى البارود والطريق ضيق وبه بعد مناطق مكسرة او غير مستوية ومنحنياته كتير والقرى الواقعة عليه كثيرة ولذلك عينك تكون كاشفة الطريق حتى آخره وسرعتك تكون متوسطة (لدواعى الأمان ) لانك ممكن تفاجأ بعيل معدى / واحد معدى بالبهايم بتاعته (ولامؤاخذة )/توك توك /موتوسيكل
ثم عند ايتاى البارود ستجد زحااااااااام ومولد وهيصة والطريق وااااااااااقف بسبب كوبرى يتم بناؤه وربما انتهى الأن
لكنه ليس السبب الرئيسى
وانما السبب وجود موقف ميكروباس وكمين هناك يقوم بتعطيل جميع سيارات النقل مما يتسبب فى توقف الطريق تماااااااااما جميع الكبارى بعد كفر الزيات وحتى الاسكندرية كلها مكسرة وحالتها سيئة
ثم تسير باقى الطريق حتى دمنهور وتكمل بعدها حوالى 15 كيلو حتى تصل الى مدخل حوش عيسى وتنحرف يسارا لتدخل طريق حوش عيسى
وطريق حوش عيسى ضيق ومزدحم جداااااااا ولا توجد به انوار ومنحنياته كثيرة وخطرة ولذلك يجب السفر عليه نهارا وعند المنحنيات يجب ان تكون متمسكا بحارتك مع كلاكس متقطع نهارا ونور وكلاكس متقطعين ليلا
طب ليه الكلاكس والنور؟؟؟
بقول وانبه ان الكلاكس ده مهم مش كماليات فى العربية واخواننا اللى فاهمين ان الكلاكس ده عبارة عن دوشة وبس زى (احمد كورسير ) غلطانين وانما يجب استعماله فى محله فقط مش عمال على بطال
هذا الطريق يعمل عليه ميكروباسات ضخمة وقديمة ماركة فورد وهى تعمل بين دمنهور وحوش عيسى وسائقيها غالبيتهم لايفقه اى شىء عن ادنى قواعد القيادة
الكلام اللى جاى ده حصل لى شخصيا
ستفا جأ بسائق منهم فى منحنى يقابلك وجها لوجه لانه يتخطى سيارة امامه
ستفاجأ ايضا بسائق منهم اخد غرزة فى المنحنى ونط ادامك او نط جنبك ولقى نفسه اتزنق فكبس عليك لانك الطرف الضعيف
والكبير كبير .... والنص نص منعرفوش (هذه كلماتهم )

ستفاجأ بأحدهم لزق فيك ونازل كلاكسات لاستعجالك سيبك منه
اهم شىء للمرة المليون فى منحنيات هذا الطريق التزام الحارة المرورية الخاصة بك مع استعمال النور والكلاكس المتقطع الغير مزعج فى المنحنيات
ويفضل عليه السفر نهارا الا للضرورة القصوى وعدم القيادة بسرعة والتزااااااااااااااااااام الحارة المرورية
وليلا ستجد كل من يقابلك من السيارات كأنكم جميعا اعداء او كارهين بعض او فى بينكم وبين بعض قضايا او محاكم هههههههههههههههه
فالكل مشغل النور العاااالى لتجد ان عينك راحت فى داهية ولذلك يفضل السفر عليه نهارا ان اضطررت له
الى ان تصل مركز حوش عيسى ستجد بوابة كبيرة عند احد مصانع الشاى الشهيرة هناك وهى اقيمت غالبا على نفقة صاحب المصنع وهى منطقة مزدحمة نسبيا
ثم تستكمل المسير الى ابو المطامير والطريق من حوش عيسى لايختلف كثيرا
نفس المساوىء ولايوجد اى مزايا ولاكماين ولاغيره
ملحوظة صغيرة
ينتشر بائعى الذرة المشوية على هذا الطريق وهى من اجمل واحلى انواع الذرة التى ذقتها فى حياتى (مسكرة جدا ومختلفة عن اللى هنا )
طبعا اخواننا اللى بيشترو ذرة بينسو ان الطريق ضيق وبيقفو يشترو بدون اى مراعاة لظروف الطريق وان الطريق ضيق
ولذلك عليهم الخروج من الطريق الى الطبان (الجزء الترابى من الطريق )لكى لايتسببو فى حوادث
اما الطريق الثانى الى أبو المطامير
فهو
تسلك طريق مصر اسكندرية الصحراوى حتى الكيلو 150 وستجد مدخلها يسمى مدخل ال 71 (اى قبل 71 كيلو من محطة مصر باسكندرية) او مدخل ابو المطامير وهو اول مدخل كبير اتجاهين على يمينك بعد مدخل طريق مارينا او العلمين
عند الدخول ستجد كشك صغير فى منتصف الطريق (كارتة )اما ان تبرز له ايصال سداد الرسوم الذى قطعته من بوابات اكتوبر (ب 2 جنيه فقط لانك هتقطع للسادات بس )او تدفع 2 جنيه له ان كنت قادما من السادات او شبين الكوم
ثم تسير فى هذا الطريق وهو طريق عرضه لايزيد عن 5 او 6 متر ولذلك
ممنووووووووووووووووع تخطى السيارة التى أمامك الا اذا كشفت الطريق حتى اخر مد بصرك ووجدته خاليا فتتخطى من امامك
وسأحكى لكم تجربة شخصية
خرجت من الطابور وراء سيارة نص نقل واخد غرزة وواجهت انا تريللا قادمة وربنا ستر
لاااااااااااااااااااتخرج من الطابور وراء اى حد خرج لانه ممكن ياخد غرزة وتواجه انت السيارة القادمة
وكدت ان ادفع حياتى وسيارتى ثمنا لهذه الحركة التى نوهت عنها
متخرجش من الطابور ورا اى حد
وخصوصا ان الطريق مطباته كتيرة ومعظمها عمولة (يعنى الأهالى هما اللى عملوها مش الحكومة ) وبالتالى مطبات عبارة عن اسمنت ورفيعة (علشان التكاليف ) لن يجدى معها اى شىء غير صعودها ونزولها بالرااااااااااااحة
هذا الطريق دائما مزدحم اما بالسيارات او الناس
دائما تكون حريصا وغير متسرع
ورغم ذلك فهذا الطريق افضل لانك ستمشى فيه على طريق القاهرة اسكندرية الصحراوى وهو طريق كويس لمسافة 150 كيلو
ثم المعاناة فى ال50 كيلو الاخيرة
اما الزراعى فستسير عليه 150 كيلو معظمها معاناة ثم ستسير 50 كيلو كلها معاناة
وقانا الله ووقاكم شر المعاناة
اللهم آمين
وتصحبكم السلامة جميعا

waledahmed
02-12-2010, 01:44 AM
السلام عليكم د محمد
ارجو الكلام عن طريق الصعيد
ما بين القاهره وا بني سويف

خالدخليفة
02-12-2010, 03:50 AM
ماشى ياعم نتكلم بالنيابة عن الدكتور محمد علشان ايده مش فاضية دلوقت
بيعمل عملية جراحية وغالبا المريض مات والعملية نجحت هههههههههه
طريق القاهرة / بنى سويف
بنى سويف لها 4 طرق
الزراعى وهو أسوأهم
الصحراوى الشرقى
الصحراوى الغربى
طريق الجيش الجديد
اولا / الزراعى
وهو طريق مزدحم جدااااااا وسيىء وان كنت بعد ذلك اكتشفت انه رغم سوء حالته الا انه افضل من باقى طريق اسيوط الزراعى
وهو يبدأ من المنيب ويسير بجوار القطار وتكون على يمينك وانت ذاهب الى بنى سويف ترعة الابراهيميه (وهى فرع كبير من النيل يسير بجوا ر الطريق حتى اسيوط )
والطريق بدايته زحمة جدا وسيئة جدا وانت سوف تتنفس الصعداء بعد خروجك من منطقة المنيب ولكن سيقابلك زحام أخر عند الحوامدية (مصنع السكر ) ثم عند ابو النمرس يبدأ الطريق فى الانفتاح قليلا ولكن القرى المحيطة به تجعلك حريصا فى القيادة وخصوصا مصانع الطوب المنتشرة بمنطقة البدرشين والتى ينتج عنها الكثير من سيارات النصف نقل الداخلة والخارجة من القرى الى الطريق وبالعكس
ثم تعبر كوبرى العياط بعد معاناة مع الطريق لتصبح ترعة الابراهيمية والسكة الحديد على يسارك
أسوأ مافى هذا الطريق وطريق اسيوط الزراعى كله
هو كمية المطبات الرهيبة التى تجعل السفر رحلة معاناة
ولذلك لا انصح باستعماله فى السفر ابدا والقطار القشاش افضل من استعماله
الطريق الثانى
هو طريق اسيوط الصحراوى الشرقى
وله مدخلان
الاول من مركز الصف من ناحية حلوان
والثانى من القطامية من عند التجمع الخامس
وهو طريق سريع ولاتزيد السرعة عليه عن 90 كيلو فى الساعة
ويوجد كمين عليه اعتقد عند مدخل بنى سويف
والثالث هو طريق اسيوط الصحراوى الغربى
وهو مدخله من عند ميدان الرماية سواء دخلت من 6 اكتوبر حتى طريق الواحات ثم طريق الفيوم ثم يسارا الى بنى سويف وهو به كمين فى اول الطريق فقط على بعد 15 كيلو من ميدان الرماية على ما اعتقد
واما الطريق الرابع وهو طريق جديد والكثيرون لايعرفونه واسمه طريق الجيش
وهو طريق واسع وعريض واتجاهين كل اتجاه 4 حارات وعند اكتماله سينافس طريق القاهرة / اسكندرية الصحراوى ولايوجد عليه يوتيرن بل انفاق تدخلها السيارة لتعبر الجانب الاخر
السرعة القصوى عليه 120 كيلو فى الساعة وينتهى عند منطقة المعصرة طريق حلوان
مشكلة هذه الطرق كلها ماعدا الزراعى
انها مظلمة ليلا والخدمات عليها على مسافات متباعدة وان كانت بدأت فى التزايد ماعدا طريق الجيش فهو اسفلت فقط لاانوار ولاخدمات ولامحطات بنزين ولا أى حاجة
ولذلك
احبذ عدم سفر السيارات الاوتوماتيك عليه ليلا لانى قابلت عليه موقف بايخ لسيارة اوتوماتيك حين نام الكاوتش بتاعها وطبعا لان الدنياا ضلمة كحل (بضم الكاف )اضطر صاحبها لتشغيل اشارات الانتظار وطبعا لم يتوقف له أحد
وفيييييييييييييييين
لمحته وانا معدى وركنت وروحت له واتضح ان العجلة نامت وليس معه كوريك ولا مفتاح عجل وبعد مساعدته وتركيب العجل كانت البطارية نامت ولم نجروء على زقها وسبته ومشيت طبعا
لكنه
طريق جميل وسريع وواسع ولكن بلا خدمات لانه لازال تحت الانشاء
و الحقيقة لم ارى عليه كماين لانى كنت مسافر عليه ليلا
وعموما
جميع كماين قبلى تبدأ عملها فى الثامنة صباحا(غريبة )وهو موعد معروف لدى جميع من يستعملون طرق قبلى
السرعة القصوى على الصحراوى الغربى والشرقى 90
السرعة القصوى على طريق الجيش 120 وهو لم يكتمل بعد بل من بنى سويف تدخل منه على الصحراوى الغربى

خالدخليفة
02-12-2010, 04:28 AM
فى شوية زيادات بسيطة بالنسبة للطريق ده بحكم انى بتردد عليه
اولا كثرة المطبات يعنى تحس انه الطريق ده كان فى الأصل مطبات وبعدين عملوا ليه طريق يمكن اكتر من 50 مطب فى مسافة 55 كيلو من المنصورة لفارسكور وعند كل بلد او قرية على الاقل مطبين او تلاتة ودى بتبقى كارثية بالليل لأن الطريق زى ما حضرتك عارف مظلم والغريب على الطريق لا يراها
ثانيا الكمائن : واشهرهم اللى فى نهاية حدود الدقهلية قبل دمياط وبالتحديد عند قرية بساط كرم الدين وكل مهمة هذا الكمين تقليب خلق الله يعنى انا مرة شوفت العساكر موقفين واحد معاه موتوسيكل وله كرسى جانبى زى بتاع مشرفين الزراعة زمان والراجل كان معاه مستحضرات تجميل فلازم يسيب لهم حاجة علشان يعدوه قام الراجل مطلع علبة كريم شعر لهم تمنها حوالى 7ج..... وحاجات من دى كتيير
والكمين ده دخل موسوعة جينيس فى عدد المطابات 6 مطبات واحد قبله وواحد بعده واربعه عنده تحس انك داخل دولة تانية
ثالثا الرادار : مفيش عليه رادار ولا مره شوفت كمين رادار عليه وهما مريحيين دماغهم من كده لأن اكبر سرعة على الطريق 80 كيلو

هههههههههههه
خد دى
من دمياط حتى بنها طريق كفر سعد / شربين / المنصورة / بنها 97 مطب صناعى
طب انا عرفت عددها ازاى ؟؟؟
فى يوم راجع من دمياط تعباااااااااان جدا
وقررت النوم فى الميكروباس وكل م اجى اركن دماغى على الشباك اللى كان جنبى السواق يطلع مطب يخبطنى فى الزجاج اقوم صاحى
وروحت البيت عندى صداع فظيع
وقررت اعرف عدد المطبات دى لانها مزعجة بطريقة سخيفة
وفى المرة اللى بعدها ركبت الميكروباس وانا راجع وامسكت ورقة وقلم وكل م يطلع مطب احط شرطة (علامة ) فى الورقة حتى وصلنا بنها ولما روحت البيت عديتهم لقيتهم 97 شرطة (علامة) معظمهم قبل المنصورة
وانا جبت سيرة الكمين اللى بتحكى عليه ده وقلت ان اكبر نشاط بيعملوه هو التثاؤب يعنى النوم وهو على فارسكور لكن قرية بساط اعتقد انها على طريق كفر سعد وليس عندها كماين ان لم تخننى الذاكرة

خالدخليفة
02-12-2010, 06:31 AM
طريق القاهرة / شبين الكوم / السادات
طبعا لكى تذهب شبين الكوم من القاهرة فانت ستسلك طريق القاهرة / اسكندرية الزراعى اولا حتى مدينة قويسنا
وتم الحديث عن هذه الوصلة سابقا
وان كنت سأضيف اضافة صغيرة انه نهارا احيانا يتم وضع رادار بعد مرور طوخ ليصطادوك فى مدخل سندنهور (قبل بنها ب 5 كيلو / عند بورصة الدواجن )ثم تستأنف الى قويسنا سيقابلك كوبرى قويسنا لا تطلع عليه بل انزل تحته واكسر شمال من تحته لتجد نفسك عائدا الى القاهرة مرة اخرى ستمشى حوالى 50 متر او 100 متر ستجد كوبرى آخر اطلعه ستعبر السكة الحديد الى شبين الكوم وامشى فى هذا الطريق الى آخره ثم يسارا الى شبين الكوم
والمسافة تقريبا حوالى 13 كيلو
لكن هذا الطريق ضيق ومنحنياته كثيرة والميكروباسات الراما او الرمسيس تسير ببطء عليه (قدرتها كده ) والموتوسيكلات عليه كثيرة بالاضافة الى القرى المنتشرة على جانبى الطريق
صحيح انه طريق شكله جميل حتى انا حين سافرت عليه نهارا كنت اهدىء السرعة لكى استمتع بالطريق
سيقابلك كمين غالبا مايتعامل مع السيارات الغريـبة فقط اى التى لاتحمل ارقام منوفيه
(بعيد عنكم تحيز بقى ) واحيانا يفوت كل حاجة واى حاجة
ليس عليه رادارات لكن مخاطره كثيرة وخصوصا ان عليه قاعتين للافراح بسببهم تتكاثر عليه سيارات الافراح ومواكب الزفاف ويتسد الطريق
وعليك ان تسير فى الطابور
او تغامر وتدخل وسطهم وتحاول المرور منهم بدون افساد فرحتهم ان كنت واخد بكالوريوس ميكروباس زى حالاتى هههههههههه
وهذا الطريق بلاويه كثيرة بسبب ضيقه ومنحنياته الصعبة
والطريق انارته ممتازة ليلا بل اكثر من ممتازة (بلد الريس ياعم )
وحين ينتهى بك الطريق ستجد نفسك مجبرا على الدخول يمينا ثم بعد محطة البنزين يسارا لتعبر فرع من النيل (لا اذكر اسم الترعة الان ) ثم تمشى معها حتى يقابلك كوبرى تدخل اخر شارع شمال قبله وتلف وترجع مع اول اشارة شمال تدخل الى محطة القطار (محطة شبين الكوم ) وتعبر المزلقان
انت الأن فى طريقك الى مدينة السادات
وهو طريق ضيق جدا لكن ماشاء الله كله انوار ليلا وانارته فوق الممتازة بشوية لكنه يادوووووب يشيل تريلتين لازقين فى بعض ويحتاج الى حاوى لكى يسير عليه وهو فى اوله ستجد نفسك سائرا وسط البيوت ولذلك كن حريصا
الأمر م يسلمش
ممكن تلاقى عيل طالع من بيت بيجرى او شاب طالع من شارعهم بموتوسيكل
وأسفلت هذا الجزء من الطريق اتهرى تماما عكس مرحلة قويسنا / شبين الكوم
والملحوظة الغريبة فى المنوفية ان التوكتوك بها قليل والموتوسيكلات كثيرة
وحين تعبر المرحلة الاولى من الطريق والتى كلها بيوت ومطبات ومنحنيات
تبدأ المرحلة الثانية والتى كلها زراعات ومنحنيات ومطبات ايضا
وطبعا لارادارت ولاغيره غير كمين فى مدخل محافظة البحيرة حيث يمينا مدخل كوم حمادة لكن سيادتك لو رايح السادات يبقى هتدخل يسارا
ودائما ككل الطرق الضيقة ممنوع الخروج من الطابورالا فى اضيق الحدود وخصوصا فى المنحنيات ثم بعد 25 كيلو من المعاناة وضيق الطريق ومهاترات مع سائقى النقل الثقيل والميكروباس يبدأ الطريق فى الاتساع ويتحول الى 4 حارات 2 رايح و 2 جاى ولكنك فى بدايته ستصعد أسوأ كوبرى فى العالم وهو كوبرى كفر داوود وهو مليىء بالحفر والمطبات منذ انشاؤه واسفلته دايب من اول م عملوه (عجيبة )
ثم من كفر داود حتى مدينة السادات مسافة 30 كيلو فى اول 5 كيلو منها وانت رايح على السادات طريق مكسر ومطبات ثم كمين شرطة لايهتم الا بالحزام بالنسبة للملاكى و 5 جنيه تظبط اى حاجة
وعلى فكر هتقابل على هذا الطريق 3 كماين لايبحثون الا عن الحزام فقط بالنسبة للملاكى
وبعد الكمين الأخير فى كفرداود
ومن هذه النقطة بالذات يبدأ الطريق يتحسن كأسفلت لكنه ليلا نصفه مظلم ولاتجده منيرا الاقبل الطريق الصحراوى بحوالى 15 كيلو .....اى فى منتصفه تقريبا
ثم ستجد على اليسار كل الارض مملوكة لحبيب الملايين احمد بك عز حتى الطريق الصحراوى لاسكندرية
ماشاء الله لاحسد ولاقر
ملحوظة غريبة لاحظتها محدش قال لى عليها
هذا الطريق اوله بلد الزعيم وقبل آخره أرض احمد بك ونهايته السجن
ويظهر ان طريقهم مع بعض اخرته كده هههههههههههه
اللهم آمين

خالدخليفة
02-12-2010, 06:40 AM
غدا بمشيئة الله الطريق الدائرى من المنيب وحتى طريق الواحات


تم احتلال الموضوع والحمد لله
والدكتور لسه بيعمل العملية رغم ان المريض مات من ساعتين
بس اهم حاجة العملية نجحت
هههههههههههههههههههههههههه

ياسرأبوعاصي
02-12-2010, 03:18 PM
سينــــــــــــــــــــــــاء
أحب اقدملك المفيد
من رفح إلى العريش 45 كيلو متر
من العريش إلى القنطرة غرب 150 كيلو متر
من العريش إلى الاسماعيلية 190 كيلو متر
من العريش الى القاهرة 375 كيلو متر

خالدخليفة
02-12-2010, 03:38 PM
سينــــــــــــــــــــــــاء
أحب اقدملك المفيد
من رفح إلى العريش 45 كيلو متر
من العريش إلى القنطرة غرب 150 كيلو متر
من العريش إلى الاسماعيلية 190 كيلو متر
من العريش الى القاهرة 375 كيلو متر

ههههههههههههههههههههه الكلام ده مكانه الموضوع ده (المسافات بين القاهرة والاسكندرية الى باقى المحافظات)
http://www.masrmotors.com/vb/showthread.php?p=301475#post301475
لان هنا وصف للطرق وحالتها وخدماتها وعايزين منك وصف طرق سينا وحالتها وخدماتها لانى مدخلتهاش
والغريبة انى لقيتك معلق نفس التعليق هناك بدون زيادة او نقص اى حرف
وهو مكانه الصحيح

miam0502788391
02-12-2010, 04:43 PM
وانا جبت سيرة الكمين اللى بتحكى عليه ده وقلت ان اكبر نشاط بيعملوه هو التثاؤب يعنى النوم وهو على فارسكور لكن قرية بساط اعتقد انها على طريق كفر سعد وليس عندها كماين ان لم تخننى الذاكرة

قرية بساط كرم الدين موجودة على الطريق الشرقى ( المنصورة - شربين - الزرقا - فارسكور - دمياط) وعندها الكمين اللى انا ذكرته
لكن فيه قرية اسمها (بساط النصارى) ودى اللى موجودة على الطريق الغربى ( المنصورة - شربين - كفر سعد - دمياط) وبالتحديد قبل قرية بطرة بمسافة صغيرة حوالى 2 كيلو على الشمال للقادم من المنصورة

كمين فارسكور انا متكلمتش عنه رغم انى بعدى عليه بصورة شبه يومية ولا تربطنى علاقة باللى شغالين عليه لكن هما يمكن عرفوا العربية من كثرة التردد, الكمين ده مفيش عليه رادار ومفيش منه مشكلة الا فى بعض الاوقات نهارا لما الظابط ييجى ويرخم على سواقى النقل والاجرة وبعض الملاكى اللى رخصهم منتهية او فى مخالفة فى الحمولة , لكن بالليل كله نايم ومفيش الا الراجل اللى بياخد النص جنيه من كل ميكروباس معدى

sad-bird
02-12-2010, 11:05 PM
لو ان عمري ما هكون زي عم خالد لكن امري لله اقول حاجة يمكن تنفع حد

طريق الزقازيق القاهرة
فيه 3 طرق من الزقازيق لقارة
الأول الطريق الزراعي وتخرج من الزقازيق من عند مدخل ابو حسين او من عند الجامعة او من طريق الاحرار الثلاثة بيتقابلو عند طريق ابو حسين ويكمل الطريق لغايه بنها الكوبري (1) مرورا بالزنكلون والجديدة ثم منيا القمح ثم شبلنجة وكام بلد كده مش حافظ اسمائهم حتى تصل لكوبري بنها العلوي رقم (1) ثم تمر من اسفل الكوبري شمال لتخرج من امام مصانع توشيبا العربي وتكمل الطريق زي ما عم خالد خليفة شرح في طريق بنها القاهرة 50 مرة
الطريق الخدمات عليه متوفره واغلبه قري لكن على مسافات بعيده شوية مش كل كيلو قرية زي طريق دمياط وعليه نقطتين اسعاف غير مستشفي منيا القمح لكن مفيش عليه غعير بنزينه واحده بس في منيا القمح ولكن اصلا الطريق كله على بعضه تقريبا 40 كيلو يعني مش هتحتاج تمون بنزين الا لو كنت اصلا ماضي والتنك فاضي
وكمان فيه بنزينة في اول الطريق خالص عند كفر ابو حسين
اما بقى لو العربية غاز زي عم خالد يبقى لازم يدخل الزقازيق يمون من بنزينه الزراعة او بنزينه الكوبري الجديد

الطريق ده بيكون الصبح عليه ردار لكن مش منتظم وفيه كمين شبلنجه بيفتش باللي او لو فيه طواريء
مواعيد الرادار معرفهاش لكن السواقين بيعرفوا ممكن تراقب سرعتهم وتعرف



الطريق الثاني والثالث من عند العصلوجي وعلى حسب اتجاهك تمشي مع الاشارات لغايه لما توصل الطريق وتمسك اول الطريق
المسافة في الاول كلها قري وبلاد لكن على مسسافات متباعده شوية لكن عليى كل قرية مطبين او تلاته تاخد بالك منهم لانهم وعلى الرغم من انهم معمولين تبع الطرق الا ان مفيش عليهم اشارات ولا تحزيرات لكن الانارة جيده تقدر تشوفهم تمشي في الطريق لغايه بلبيس مرورا بالكوبري العلوي فوق بردين ثم العرايشية ثم اولاد سيف وكام بلد كده مش فاكرهم طبعا ثم بلبيس هتلاقي جامع صغير على اليمين عنده مفترق طرق تلف مع الصينية شمال لانك لو دخلت على دول هتدخل بلبيس البلد
بعد لما تلف تمشي على طول لغايه الكوبري العلوي ومن هنا يفترق الطريقين ونفصل الشرح

الجزء الاول من الطريق الثاني والثالث فيه بنزينة واحده بعد لاعصلوجي وفيهواحده تانيه تحت النشاء عند مفارق بلبيس اما لو غاز فنفس المشكلة في الطريق الاول لازم تدخل الزقازيق تمون وتخرج

الطريق الثاني
عد الكوبري وتاخد يمين مش تطلع الكوبري وتلف مع الكريق يمين وتمشي على طول ولا يمين ولا شمال لماااااااااااااااااااااااااا توصل الدائري قبل مسطرد لو عاوز تطلع الدائري تمشي مع الاشارات وتطلع الدائري يمين اتجاه اسكندرية الزراعي والهرم ، وشمال اتجاه المرج ومدينة نصر ومصر الجديده والمطار
على طول من تحت الدائري تكمل لما توصل مسطرد ثم شبرا الخيمة وبعدين تشوف طريقك على فين بعد كده

عيوب الطريق ده عامل زي طريق دمياط المليان مطبات كل بلد جنباه مطب وفيه مسافات كتير منه مزدوجة يعني الطريق رايح جاي وان كنت سمعت ان فيه تطوير في الطريق وبدأ يتوسع ويتحسن لكن تخلي بالك برضة ان كل شوية ممكن تلاقي حد طالعلك من الطريق وفيه عيب تاني فيه عليه فحجامين كتير اللي بيعملوا الفحم وبالتالي اوقات كتير بتلاقي الطريق مدخن والعربية ريحتها تقلب ولا كأنك في غرزة

مش فاكر اذا كان فيه بنزينة والا ل لكن الخدمات على الطريق كويس من اول العصير والمياه والمساجد لغايه المياكنيكية وورش الصيانه لان الطريق كله قرى ماعدا جزء منه بعد بلبيس بحوالي 10 كيلو اغلبه مزارع وبعدين مصنع ابو زعبل


الطريق الثالث
نرج تاني لبلبيس عند الكوبري العلوي قلنا في الطريق الثاني مش تطلع الكوبري العلوي هنا لا هنطلع الكوبري ونمشي معالطريق
فيه ملف يمين صعب شوية يعني لازم تهدي لانه تقريبا بزاوية 90 درجة وتمشي على الطريق يمينك اراضي فضاء وشمالك الكلية الجوية لغايه اخر الطريق فيه صينية وملف تاني برضة 90 درجة بس هتدخل فيه شمال لان يمين يدخلك بلبيس تاني
قلنا هتدخل شمال علي يمينك عزبه وبيوت صغيرة اغلب اصحابها بدو وعلى الشمال المعهد العالي للهندسة ومعهد الادارة لغايه اخر الطريق وهناك هتلاقي ملف تاني يمين تمشي معاه بس هو مش صعب قوي يعني زي الثانيين
وتكمل معاه لغايه ميدان الطائرة عن المدخل الشمالي للكلية الجوية ومفترق الطرق هنا عند ميدان الطائرة
على طول الكارته وطريق القاهرة الصحراوي لو دخلت شمال يبقى هتدخل العاشر ثم طريق مصر اسماعيلية ثم مدينة بدر ثم طريق السويس الروبيكي
احخنا هندخل على طول على الكارته تدفع 2 جنية وتمشي على الطريق
الطريق 4 حارات 2 رايح و2 جاي حوالي 30 كيلو عليهم رادار السرعة اقصي حد 90 كيلو والكريق مش عليه زحمة لانه كله صحرا وكام شركة على كام كتيبة جيش
فيه بنزينة واحده قصاد معهد العبور
فيه نقطة اسعاف في اول الطريق وفي النص في اخره ميدجنة السلام ومستشفي السلام
في نص الطريق اشارة للي عاوز يدخل ميدنة العبور بتلف عندها وترجع 50 متر على العبور واللي داخل القاهرة ومصر الجديده ومدينة نصر بيكمل لغايه السلام وموقف العاشر
الرادار بيشتغل الصبح اللجنة بتنزل على الساعه 8 تقريبا وواللجنة رخمة جدااااا لكن اوقات الرادار مش بيكون موجود بتعرف من سواقين الميكروباص وشااراتهم لبعض في اول الكارته او بتسأل بتاع الكارته وانت رايح من الزقازيق الرادار نزل والا لسه
اخر الراردرفي الشتاء مع اخر ضوء في الصيف اخرهم العصر وبيكونو طهقانين طبعا من الشمس والحر
الطريق سهل تجري عليه لكن فيه منطقة في النص بعد 15 كيلو تقريبا تاخد بالك منها لانها مطلع كبير شوية وبعدين منزل وراه على طول زي تل او جبل صغير واستخسروا يفجروه ويعدلو الطريق
نهاية الطريق في مدينة السلام عند الكمين والكمين ده بيشد شوية اوقات المشاكل والمظاهرات وبالليل على طول وفيه لجنه مباحث وطب بيطري ومرور
من عنند الكمين تمشي لغايه المستشفي وصهريج المياه او خزان المياه وتاخد شمال لاخر الطريق هتلاقي بنزينة التعاون لو عاوز تمون وبعدين تتقابل مع طريق مصر اسماعيلية وتدخل يمين موقف العاشر والكوبري العلوي الجديد ومنها تتحرك زي منتا عاوز بقى

المسافة الكلية من اول الطريق الثالث لاخره تقريبا 60 كيلو ( معرفش حكاية 82 اللي مصرين عليها دي )
الخدمات زي ما قلنا بينزينه في اول الطريق من الزقازيق تقريبا شل ، بنزينه التعاون قبل المرور لكن عاوزة تلفلها
بنزينه تحت الانشاء في ملف بلبيس
ببنزينة في العبور بس القادة من الزقازيق لازم يلفلها في الاتجاه التاني ( لكن او اتزنق زي معتز وكريم يبقى يعدي بجركن يملي ويمشي )
بنزينة في السلام بنزين / غاز
بنزينة في مدخل النهضة بعد السلام الاثنين قريبن من بعض لكن كل واحده في اتجاه
بنزينة التعاون في نهاية الطريق قبل ما تدخل على القاهرة وطريق مصر اسماعيلية

الخدمات كويسة من اول الطريق لغايه الكارته والمسافة من بعد الكارته كلها 30 كيلو مش مستاهله خدمات اللهم الا اذا حصل لا قدر الله حاجة

sad-bird
02-12-2010, 11:21 PM
هههههههههههه
خد دى
من دمياط حتى بنها طريق كفر سعد / شربين / المنصورة / بنها 97 مطب صناعى
طب انا عرفت عددها ازاى ؟؟؟
فى يوم راجع من دمياط تعباااااااااان جدا
وقررت النوم فى الميكروباس وكل م اجى اركن دماغى على الشباك اللى كان جنبى السواق يطلع مطب يخبطنى فى الزجاج اقوم صاحى
وروحت البيت عندى صداع فظيع
وقررت اعرف عدد المطبات دى لانها مزعجة بطريقة سخيفة
وفى المرة اللى بعدها ركبت الميكروباس وانا راجع وامسكت ورقة وقلم وكل م يطلع مطب احط شرطة (علامة ) فى الورقة حتى وصلنا بنها ولما روحت البيت عديتهم لقيتهم 97 شرطة (علامة) معظمهم قبل المنصورة
وانا جبت سيرة الكمين اللى بتحكى عليه ده وقلت ان اكبر نشاط بيعملوه هو التثاؤب يعنى النوم وهو على فارسكور لكن قرية بساط اعتقد انها على طريق كفر سعد وليس عندها كماين ان لم تخننى الذاكرة


انت زعلان على 97 مطب
طريق الزقازيق فاقوس في يوم من الايام كان عليه 138 مطب وهو كله على بعضه 30 او 35 كيلو السواقين عادينهم وحافظينهم
فيييييييييييييييين لما الطرق اخدت بالها ورصفت الطريق تاني وعملت مطبات قانونية ( طبع مع بعض المطبات الاهلية ) لكن لامحصلة اقل من كده بكتييييييييير يعني تقدر تقول في حدود 50 دلوقتي

lovelyboy
03-12-2010, 02:38 AM
انان عايز طريق شبين الكوم/الزقازيق/ فاقوس بالتفصيل لو سمحت يا خالوده

sad-bird
03-12-2010, 02:55 AM
انان عايز طريق شبين الكوم/الزقازيق/ فاقوس بالتفصيل لو سمحت يا خالوده

على ما يجي عم خالد يرد

هتمشي من شبين الكوم لبنها ومن بنها بعد ما تنزل الكوبري التاني اللي قدام توشيبا العربي تلف يمين تحت الكوبري وتمشي في الطريق ده ولا يمين ولا شمال لغايه لما توصل بنزينه منيا القمح تدخل مع الطريق يمين وتدخل منيا القمح وتمشي في الطريق الرئيسي متدخلش في اي شوارع تانيه لما تخرج من منيا القمح تكمل الطريق على طكول لما توصل الزقازيق
هتلاقي طريق بالعرض في اخر الطريق تدخل شمال هتعدي 2 مزلقان السكة الحديد ورا بعض وبعدين تلف من عند الجامعة يمين وانت ماشي تسأل عاوز اروح عند مديرية الامن علشان لو توهت
قلنا من عند الجامعة تدخل يمين وتفضل ماشي جنب الكورنيش لغايه ما توصل المحطة تفضل في شارع الجلاء الرئيسي لما توصل الصاغة وتخليك على اليمين شوية علشان بعد الملف على طول فيه مطلع الكوبري العلوي وانت مش هتطلعه
انت هتمشي من تحت الكوبري لغايه لما توصل مزلقان مقفول
تدخل شمال وتفضل ماشي في الطريق ده لغايه اخره تقريبا 5 كيلو بس خلي بالك وقت الذوره بيكون زحمة علشان متحول عليه طريق تاني والدنيا زحمة قوي
اخر الطريق فيه مزلقان سكه حديد تعديه وتخلي بالك من الجاي والرايح علشان ده مزلقان وبعده طريق رئيسي اتجاهين بعد المزلقان تاخد شمال وتمشي على طول هتعدي على بلاد كتير بيشة قايد -العدوة - صبيح - ههيا - المطاوعة - ابو كبير وانت ماشي لغايه فاقوس


خلي بالك الحزام والرخصة وكله مظبوط علشان اللجان هنا رخمة قوي
فيه لجنة عند الجامعة ولجنة عند المحافظة ولجنة اوقات في وسط البلد ولجنة بعد ما تمشي في الطريق من بعد الصاغه وطبعا اوقات بيقفوا واوقات لأ انت وحظك بس الحرص واجب برضة

وتوصل بالسلامة ان شاء الله

خالدخليفة
03-12-2010, 03:02 AM
عينى ياحبيبى
تخرج من شبين الكوم وتتجه الى قويسنا (13 كيلو / تم شرح هذه الوصلة سابقا )
فى آخر الطريق يتفرع الطريق الى فرعين
يسار قويسنا
يمينا طريق القاهرة (ادخل فيه)
فى آخر الطريق ستجد كوبرى اطلعه
اول منزل يقابلك انزل منه يمينا الى القاهرة سيلف الطريق يمينا لف معاه لانك لو كملت طوالى هتدخل بنها (حصلت فيا قبل كده ولقيت نفسى فى منطقة اسمها كفر الجزار فى بنها)
هتطلع كوبرى بنها ثم تنزل منه سيقابلك كوبرى بنها الجديد اطلعه وعند نزولك منه ستجد مصانع توشيبا العربى
ادخل اول يمين بعدها ثم يمين مرة اخرى ثم يمين مرة ثالثة ستجد نفسك تحت كوبرى بنها
كمل على طووول ( 40 كيلو) تصل الزقازيق
تم شرح مواصفات المرحلة من قويسنا حتى بنها سابقا
وقام اخونا محمد على ( sad bird ) بشرح المرحلة من بنها للزقازيق
ومن الزقازيق لفاقوس قام هو بشرحها ايضا
هذا الطريق ليس عليه سوى كمينين
احدهما وانت خارج من شبين الكوم وهم لايهتمون اللا بالداخل اليها فقط ولذلك ستجد تمركزهم كله فى الاتجاه المعاكس
والاخر عند قرية شبلنجة (بكسر الشين وسكون الباء وفتح اللام وسكون النون وفتح الجيم )
وهو احيانا تجده يعمل بذمة واحيانا تجده فاضى يعنى حسب الغزالة
وأجمالى المسا فة 62 كيلو
ملحوظة صغيرة
اخونا محمد على اعترض على مسافة القاهرة الزقازيق بانها ليست 82 كيلو
وهى بالقطار 80 كيلو بالظبط وبالسيارة 85

sad-bird
03-12-2010, 03:12 AM
ملحوظة صغيرة
اخونا محمد على اعترض على مسافة القاهرة الزقازيق بانها ليست 82 كيلو
وهى بالقطار 80 كيلو بالظبط وبالسيارة 85


انا اعتراضي على المسافة على وصف الطريق الثالث الصحراوي وده لا يتعدي 60 او 65 كيلو

خالدخليفة
03-12-2010, 03:32 AM
يابنى انت بتغلط غلطة جامدة انت مش واخد بالك منها
الطريق ده آخره مدينة النهضة وموقف العاشر وهو يبعد عن القاهرة اكتر من25 كيلو
لان المسافات دائما تقاس حتى محطة القطار لانها دائما فى وسط المدينة (اى مدينة)

خالدخليفة
03-12-2010, 06:52 AM
الطريق الدائرى (حول القاهرة )

فكرة الطريق الدائرى تعتمد على تخفيف الضغط المرورى على المحافظة نفسها (أى محافظة ) عن طريق عمل طريق حولها يوفر الوقت والجهد وفى نفس الوقت يجعل السيارات المارة فقط على المحافظة والقاصدة محافظات اخرى عدم تضييع الوقت فى الدخول الى المحافظة والخروج منها

وامثلة هذا كثيرة

فهناك الطريق الدائرى حول مدينة المنصورة
فان كنت قادما من المحلة الى اجا مثلا او ميت غمر او قادما من دمياط الى المحلة او القاهرة فيمكنك ان تقصده بدون الدخول الى مدينة المنصورة

والطريق الدائرى حول مدينة أسيوط
وهو يربط بين الطريق الزراعى والصحراوى الغربى والصحراوى الشرقى ومنه تدخل على حى الأربعين فى اطراف اسيوط ثم من هذا الحى تنطلق الى سوهاج او المنيا او قرى اسيوط نفسها

والطريق الدائرى حول مدينة القاهرة
وهو محور حديثنا اليوم

فهو يصل طوله اكتر من 55 كيلو واذا اضفنا اليه محور المريوطية الجديد لاصبح اجمالى طوله حوالى 75 كيلو

وهذا الطريق عبارة عن دائرة ملتفة حول القاهرة فعلا
وكانت هذه الدائرة ناقصة والذى اكملها هو محور المريوطية

بداية الطريق ضيقة نسبيا من اى من الطرفين
سواء من بعد المنيب ( بداية محور المريوطية ) او من اول طريق الواحات
ففى البدايتين يكون الطريق حارتين فقط فى كل اتجا ه ثم يتسع الى 4 حارات فى كل اتجاه

فاذا بدأنا من بدايته من ناحية طريق الواحات
نقول

بدايته للقادم من او الذاهب الى محافظات الصعيد او الواحات البحرية والداخلة والخارجة وغيرها او بالنسبة للقادم من الصعيد والذاهب الى جميع محافظات الوجه البحرى

احترس من هذه المرحلة من الطريق (من طريق الواحات حتى مخرج نادى الرماية )
فهى لايوجد بها رادار ثابت رايح او جاى ولذلك ستجد انها بلا كماين لكن لما يحبو يسترزقو يحطو 3 مقاطيع وكاميرا ويلمو فلوس
ثم المخرج التالى مخرج منشأة البكارى وهو مرتبط بمحور صفط اللبن الجديد ومنه تجد نفسك فى قلب ميدان الجيزة وجامعة القاهرة طبعا وستجد لافتات ارشادية كثيرة
ثم بعدها مخرج ميدان لبنان ومخرج المحور
وهذ المنطقة اعتقد انها بلا رادار ثابت ولا متحرك والله اعلم لانى لم الاحظهم ولامرة رغم انى مشيتها كثيرا

ثم يبدأ العك من بعد مخرج المحور فالمخرج التالى هو مخرج امبابة وروض الفرج وعنده كمين يقف ليغلق الطريق وتجد طابور طوييييل بسبب هذا الكمين فان
مكانش معاك رخص (مسحوبة طول السنة زى حالاتى / او راميها فى البيت زى حالاتى برضه )او الزحام رهيب والدنيا واقفة لحد الكمين
فممكن تنزل من منزل روض الفرج وتعدى الشارع وتطلع من ورا الكمين
ههههههههههههههه

ثم يأتى مخرج الوراق ثم القناطر ثم شبرا ثم ميت نما ثم مسطرد ثم المرج ثم الخصوص ثم مؤسسة الزكاة ثم مدينة السلام ثم طريق الأسماعيليه ثم طريق السويس

وهنا نتوقف
ومعلومة فى الجووووون وحصريا ( عرفتها من احد السادة الضباط الرغايـيـن )
المسافة بين طريق الاسماعيلية الصحراوى وطريق السويس الصحراوى لايوجد بها اى رادار ثابت ولا متحرك لانها منطقة جيش والرادار يقوم بالتشويش على اجهزة الجيش فيها
لكن بعد عبورك لطريق السويس كل شوية رادار
ومعلش بقى المعلومة دى تسببت انى فى كام واحد اتصورو
لانى جريت المسافة بين الطريقين (8 كيلو ) بسرعة 150 كيلو فى الساعة وطبعا فى ناس جريت ورايا وعند مرورى على طريق السويس خفضت السرعة من قبلها الى 85 ولكن الباقى كملو واتصورو.... صورة 4 فى 6

ونكمل..........

ثم مخارج مدينة نصر والتجمع الخامس والقطامية والعين السخنة ثم المعادى والمنيب ثم يرتبط بمحور المريوطية
الذى يلف ليعود بك الى نفس الطريق مرة اخرى بحيث لو كملت ستجد نفسك عند مخرج ميدان لبنان والمحور ثم طريق اسكندرية الزراعى

هناك خطأ قاتل فى هذه المنطقة
ستجد عدة لافتات (يفط )تقول ( طريق الواحات الزم اليسار )ومتكررة ثم فجأة
تجد يافطة تقول طريق الفيوم والواحات الزم اليسار ثم بعدها تجد مخرج على اليمين مكتوب فوقه (طريق الفيوم والواحات / وسهم يشير الى المخرج ) وطبعا حين تتبع هذه اليافطة المضللة وتخرج من هذا المخرج تجد نفسك عند المحور وميدان لبنان

جميع الرادارات الثابتة على الطريق وعددها 35 غالبا فى المسافة من مخرج اسكندرية الزراعى وحتى المنيب على الاتجاهين (يعنى ممكن تصورك كاميرا على الجانب الاخر المعاكس )

المنطقة من مخرج نادى الرماية وحتى طريق الواحات بها رادارات متحركة
صحيح اخواننا فى الاتجاه المعاكس ينبهونك بالانوار لكن لاحظت فى المرة الأخيرة ان هذا التعاون قد قل الى حد كبير يادوب سيارة نص نقل او ميكروباس او 2 او تلاتة بالكتيرويمكن ان لاتلاحظهم والملاكى نايم فى الدرة (وسبحان الملك )

كماين هذا الطريق


كمين الرماية وهو تمركز لايرقى الى حد الكمين

كمين روض الفرج وهو كمين سيء يغلق الطريق ويهجم على النقل وحزام الملاكى ويغور وقت الناس فى ستين داهية (عموما علمناكم ازاى تتفادوه وتزوغو منه )

كمين المرج وهو احيانا يقوم بغلق الطريق وحين يتوقف الطريق توقف كبير يقومون بفتح الطريق

كمين المعادى وهو تمركز لايرقى الى مستوى الكمين

كمين المنيب وهو تمركز ايضا
(معنى تمركز يعنى تواجد للشرطة وهو عبارة عن كشك غالبا به امين شرطة غير متواجد لان الظابط نفسه غير متواجد وسايبينها للعساكر اللى قاعدين جوه عربية الشرطة )

وانت جاى من المنيب الى الواحات

لايوجد اى كماين عاملة الا عند مخرج امبابة وهو كمين غالبا لايعمل الا 12 بالليل ربما لان عليه ضغط رهيب

كمين الخصوص والمرج وانت راجع مجرد مناظر فقط

الطريق كأسفلت ممتاز ماعدا المسافة من اسكندرية الزراعى وحتى نادى الرماية فهى سيئة والطريق تحس طالع نازل ثم تفا جأ بمطبين محترمين بعد مخرج المحور وعند منشية البكارى قبل محور المريوطية (وانت جاى من المنيب على الواحات )

المسافة بين طريق السويس وطريق الاسماعيلية منحنياتها كثيرة وخطرة ومزدحمة لاعتقاد كثير من السيارات ان بها رادار

ولذلك انبه اخواننا اللى متعودين يغيرو الحارة المرورية فى المنحنيات مينفعش يعملها فى المنطقة دى لان الشارع بيبقى زحمة معظم الوقت مش دايما وخصوصا ان منحنياتها كتيرة ومنها منحنيات خطرة

هذا الطريق وانت جاى من الواحات الى المنيب عليه محطتين بنزين واحدة قبل مخرج شبرا الخيمة والتانية قبل مخرج القطامية تقريبا وواحدة غازقبل مخرج المعادى

وانتى جاى بالعكس هيا محطة بنزين واحدة بعد كمين الخصوص تقريبا اوعتقد يوجد محطة قبل مخرج التجمع الخامس

اضاءة الطريق جيدة ولاترقى الى مستوى الممتاز لان معظم الطريق لمباته قديمة ومحتاجة تغيير ماعدا طبعا منطقة التجمعات والقطامية فالاضاءة ممتازة والمنيب والمعادى ثم المنطقة بين اسكندرية الزراعى وحتى المحور
ومن منشية البكارى وهو المكان الرابط بين هذا الطريق ومحور صفط اللبن وقبل مخرج نادى الرماية وحتى طريق الواحات فالطريق مظلم تماااااااما تمااااااااما تمااااااااما ورغم ان هذه المنطقة اضيق منطقة فى الطريق الا انها مظلمة
(عجيبة الحكاية دى)

احترس

من مخارج امبابة وروض الفرج والمرج والسلام ومؤسسة الزكاة فحين تنزل منها ستجد اسواق ومحلات وميكروباسات وزحام
والاسوأ من ذلك طرق مكسرة ومدغدغة وحالتها بالبلا ولاتصلح حتى لسير العربات الكارو

اخيرا احترس
من مخرج المحور لان كل القادم من 6 اكتوبر يأتى مسرعا وخصوصا ان كاميرات الطريق خانـقـاه وم صدق يخلص منها وبالتالى عينك دايما على مرايتك الشمال مع اضاءة او كلاكس متقطع لتنبيه القادم
وتذكر ان الأولويه له

هذه النصائح بعد دراسة متأنية لسلوكيات الناس وطبيعة الطريق

corsair
03-12-2010, 10:42 AM
الله عليك يا عم خالد ملكش حل وصورتك اللي زي العسل اللي منوره التوقيع يا معلم

خالدخليفة
03-12-2010, 02:40 PM
ده انت اللى زى العسل ياعم احمد
وانت طنشتنى فى الكاميرة الديجيتال ومسافر الصحراء الغربية يوم الاحد ان شاء الله ومحتاجها
وخليك فاكرها

sad-bird
03-12-2010, 02:57 PM
ده انت اللى زى العسل ياعم احمد
وانت طنشتنى فى الكاميرة الديجيتال ومسافر الصحراء الغربية يوم الاحد ان شاء الله ومحتاجها
وخليك فاكرها


انت رايح سفاري والا ايه
(what)(what)(what)

خالدخليفة
03-12-2010, 03:22 PM
ههههههههههههههه
سفارى غصب عنى مش بمزاجى
شغل طبعا...........
انت ناسى شغل الاراضى الزراعية والصحراوية واللا ايه ؟؟؟؟
بس بيبقى يوم شاق ولذيذ فى نفس الوقت

sad-bird
03-12-2010, 03:27 PM
طريق الزقازيق السويس
بيشترك مع طريق الزقازيق القاهرة في الجزء الأول وحتى كارته طريق القاهرة لكن من باب التضكرة نعيد عليه تاني
بتطلع من الزقازيق من عند العصلوجي وتمشي على طول اتجاه بلبيس / العاشر /القاهرة الصحراوي
وتفضل على الطريق وتخلي بالك كويس من المطبات ومداخل القري حتى تصل كوبري بردين العلوي تطلعع وتكمل الطريق لما توصل المسجد على اليمين وقدامه صينيه تلف شمال ( مش تدخل على طول والا هتدخل بلبيس) تدخل شمال وتمشي لما توصل الكوبري العلوي التاني تطلع وتنزل وتمشي وهتلاقي ملف يمين خلي بالك لانه زاوية 90 درجة تقريبا يعني لازم تهدي فيه وهتمشي الكلية الجوية شمالك ومساكن ومزارع والارضي فاضية يمينك لما توصل صينية تانية يمين ترجع بلبيس شمال ده طريقنا تلف شمال وتكمل لما تلاقي ملف تاني يمين هو زاوية 90 درجة برضة لكن الطريق واسع فتقدر تاخده مرتاح شوية عن الملف التاني وتكمل الطريق لما توصل ميدان الطائرة عند ميدان الطائرة مفترق الطرق
على طول القاهرة الصحراوي
يمين بنزينه واستراحات
شمال طريق العاشر ومدينة بدر والسويس
هندخل شمال والطريق في المسافة دي مفيش عليه اي خدمات خاااااااااااااااااااااااالص
مفيش غير عرب او بدو وكام معزة على كام عربية من عربيات رايحة وجاية العاشر
بتفضل ماشي المسافي دي على طول ولا يمين ولا شمال
يمينك صحراء وكام مبني تبع المقاولون العرب وكاممزرعة ومطاحن شرق الدلتا وشمالك مزارع او مخازن غير كده مفيش
بعد حوالي 10 او 15 كيلو بتلاقي ملف للي عاوز يدخل العاشر ده لو ناسي حاجة او محتاج مسجد او مضطر انك تريح او محتاج حمام يبقى ده افضل مكان تدخل فيه تريح هتلف لفة بسيطة وتبقى تخرج من المخرج التاني
نرجع لطريق قلنا فيه ملف للدخول العاشر من رمضان هتسيبه وتكمل على طول هتلاقي كوبري علوي على طريق مصر اسماعيلية الصحراوي تعدي من تحته وتكمل في طريقك ماااااااااااااااااااشي ولا يمين ولا شمال
قبل ما تعدي الكوبري العلوي فيه بنزينة على الشمال فيها بنزين وغاز علشان عم خالد يمون بعد كد مش هتلاقي اي خدمات ( في حدود علمي ) قبل ما توصل طريق السويس
بعد كده
مدينة بدر على يمينك وعلى شمالك اعادة تمركز مدافع رمضان والاثار الفاطمية ( معرفش ليه وايه جابها هنا بس هو كده وخلاص )
وهتلاقي مدفن النفايات الصلبة بتاعت مصانع العاشر وبدر في الطريق برضة ماااااااااشي ولا يمين ولا شمال والجزء ده من الطريق كمان مش عليه خدمات على ما اذكر من اخر مرة مشيت عليه
لغايه لما تقابل طريق الروبيكي ومصر السويس تدخل يمين علشان تلف تمشي حوالي 500 متر اوكيلو تلاقي ملف تلف شمال وتبقى انت كده على طريق السويس
قبل ما تدخل على طريق السويس على ما اذكر كان فيهبنزينة في الملف ده او بعد ما تلف مش فاكر بالضبط لكن ممكن تاخد بالك من العلامات
وعليه علامات ارشاديه تتحرك على اساسها
هتلاقي طريق بتاع السخنة بعد حوالي 40 او 50 كيلو وهتلاقي طريق الزعفرانه ( تقريبا مشترك مع السخنة ممكن تراجعو زيارة أستاذ حازم شاهين للغردقة واصف فيها الطريق كويس وخدماته او أستاذ خالد خليفة يكمل الوصف والخدمات من على طريق السويس )

توصل مدخل السويس الجامعة على الشمال ومساكن اعضاء هيئة التدريس على اليمين ( كانت بيضاء ) وطول منتا ماشي ريحة جاز ثم جاز ثم جاز شوية وبعدين تبدأ تلاقي العمار والمساكن واخر الطريق بتلاقي صينية عندها مفترق طرق
يمين محطة الكهرباء وكريق الزعفرانه السخنة جنب البحر
شمال تدخل السويس باحيائها (اكتر من كده الكدب خيبة معرفش اقول تفاصيل اكتر من كده لسه موصلتش لخبرة عم خالد)


خدمات الطريق
قلنا من الزقازيق لو عاوز تمون غاز يبقى من داخل الزقازيق لو هتمون بنزين فيه كذا بنزينة واحده قوات مسلحة في الطريق قبل ما تطلع على الطريق قبل التجنيد وبعدين تلف وتعدي العصلوجي شيل او توتال مش فاكر الحمرا منهم ايه وتكمل لغايه بلبيس فيه واحده تحدت الانشاء عند اول ملف وبعدين بعد ملف الكلية الكوية بس لازم تلفلها
وبعدين عند مفارق العاشر / القاهرة
وبعدين قبل الكوبري العلوي على طريق مصر اسماعيلية
وبعدين قبل او بعد مفارق طريق السويس
الخدمات الطريق من الزقازيق لغايه مفارق العاشر / القاهرة او ميدان الطائرة عليه كل الخدمات لانه مليان قرى وعمران اي حاجه تحتاجها هتلاقيها
الطرق من ميدان الطائرة لغايه طريق السويس مفيش عليه غير البنزينة عند الكوبري وبنزية في اخر الطريق والا لومضطر بقى يبقى تلف من عند مدخل العاشر من رمضان وتدخل المدينة تجيب اللي عاوزه وترجع تخرج تاني بس من المدخل التاني اقرب وتسأل عن الاتجاهات هناك
اما عن طريق السويس نفسه مش فاكر الخدمات اللي عليه ايه

sad-bird
03-12-2010, 03:30 PM
ههههههههههههههه
سفارى غصب عنى مش بمزاجى
شغل طبعا...........
انت ناسى شغل الاراضى الزراعية والصحراوية واللا ايه ؟؟؟؟
بس بيبقى يوم شاق ولذيذ فى نفس الوقت

معلش بقى العتب على النظر
وبعدين منا قلتلك اجي اشتغل معاك قلتلي لأ

خالدخليفة
03-12-2010, 03:37 PM
دهاليز القاهرة (1 )


يمكن تستغربو من الأسم شوية وهو ممكن يبقى موضوع لو حده لكن اخويا وحبيبى الدكتور محمد عايزين نعمل له جماهير برضه
هو انا هتجمهر لوحدى ؟؟؟؟؟
هههههههههههههههه
فكرة الموضوع ببساطة انى هشرح كيف تهرب من الزحام
من كافة طرق ومناطق القاهرة
واللى عنده اضافات يضيفها بالاضافة الى شرح لكل الطرق زى م احنا
معذرة لعدم استكمال الموضوع
جالى وفد من الصعيد
وساستكمله لاحقا

sad-bird
03-12-2010, 05:53 PM
دهاليز القاهرة (1 )
معذرة لعدم استكمال الموضوع
جالى وفد من الصعيد
وساستكمله لاحقا


حمدا لله على سلامة الوفد وترجع بالسلامة
وكان الله في عون ام عمر في البهدله اللي بتحصل للشقة

sad-bird
03-12-2010, 06:23 PM
طريق الزقازيق اسماعيلية
من عند ميدان الزراعة وفي اتجاه الكوبري العلوي بتكمل الطريق على طول مرورا بالشوبك والطاهرة وغزالة والخيس حتى تصل ابو حماد هتظهر ترعة صغيرة على الشمال وبتوسع بالتدريج من اول غزاله او ابو الاخضر وتفضل ماشي جنبها على طول
توصل ابو حماد وتخلي بالك من التكاكتك اللي هناك اللي بيسوقوها شايلين دماغهم وحاطين بدالها دماغ لواء امن دولة مبيتفاهموش
تلاقي كل توكتوك سايقة عيل او شخص كبير كله بيطلع في اي وقت من اي اتجاه ويخبط فيك او يترمي قدامك ويا ويلك يا سواد ليكل لو حاولت تكلمه ولو حصله حاجة هتروح انت في ابو بلاش لان هيتلم عليك عالم متفهمش هما جايين منين ومش هتاخدولا حق ولا باطل وهتنضرب وملكش ديه
نرجع للطريق تعدي ابو حماد على الهادي ومن غير تسرع باعصاب تلاجه او اقولك اركن اعصابك في اي حته وانت ماشي من هناك
وتكمل الطريق بعد كده على طول وتفضل ماشي جنب الترعة لغايه لما تلاقي الطريق بيعدي شمال من عند العباسة تمشي معاه وتخلي بالك ان فيه كوبري علوي تحت الانشاء هناك فالطريق من عند المفارق فيه 3 اتجاهات
اللي جاي من ابو حماد واللي رايح ابو حماد
اللي جاي من العباسة واللي رايح العباسة
اللي جاي من القرين واللي رايح القرين عبارة عن مثلث
انت تعدي الطريق وتدخل شمال في اتجاه القرين والتل جنا الى جنب مع الانشاءات بتاعت الكوبري لو لقيت نفسك تايه اسأل العسكري اللي هناك هيقولك
بعد كده بتمشي ترعة اسماعيلية على يمينك ومعسكرات جيش على شمالك تخلص المعسكرات تبدأ مباني شركات ومطاحن وبعدين مدخل القرين كل ده وانت ماشي الترعة يمينك والناس شمالك لما توصل التل الكبير وتخلي بالك هناك شوية تمشي براخت متستعجلش علشان منطقة مدارس وحركة ومحطة القطر وكوبري بيربط البلد ببعضها لان الترعة قاسمه البلد نصين
وتكمل على طول مدينة القصاصين زيها زي التل نفس الكلام
وتكمل على طول لما توصل كوبري علوي تمشي منتحته وتكمل توصل كوبري علوي تاني ده اللي جايب من القاهرة بتلف من تحت الكوبري شمال في شمال وتدخل مع الطريق من جنب الكوبري وتخلي بالك ان انت اللي داخل وده طريق اللي جاي تاخد بالك كويس
هتلاقي قيادة الجيش التاني على يمينك وصالة مبارك للالعاب الرياضية وبعدين محطة ابحاث زراعية ومن عندها فيه شارع دخل فيه يمين وتمشي على طول يبقى انت كده داخل على ابو صوير ومنها على دائري اسماعيلية بتلاقي مركب كبير في ميدان اسمها مركب فودافون
بتمشي لاخر الطريق بتلاقي الطريق بيقطع يمين وشمال بتدخل يمين مع اول ملف
لو داخل على حي تاني والافرنجي تقريبا بتكمل على طول لو داخل على الجمعة والموقف والجامعة القديمة ووسط البلد تلف شمال وبعدين 50 متر ومع اول شارع يمين بتدخل يمين عند كافتريا الابطال وكده تبقى وصلت اسماعيلية تمشي في الطريق ده كتيبة على الشمال ومساكن يمين ومجمع مدارس وتكمل مشي على طول هتوصل الموقف على اليمين والجامعة الجديدة شمال لو دخلت يمين هتدخل تقريبا شارع شبين وتدخل قلب اسماعيلية
لو كملت على طول ورا الموقف فيه مرور اسماعيلية وبعده على الشمال فيه مستشفي الجامعة وبعدين مساكن واخر الطريق تدخل شمال هتلاقي مباني تبع الهيئة والجامعة القديمة
ولو احتاجتو حاجة تاني أسألو أستاذ خالد خليفة

خدمات الطريق
من اول الزقازيق الخدمات متوفرة لان الطريق على قري مشاكله ان فيه مطابت طكتير قدام القرى دي وفيه مناطق الطريق فيها اتجاهين تخلي بالك كويس منها خصوصا المنطقة بعد كوبري العباسة الطريق واسع وبيشجع على الجري لكن تيجي عند ملف وتلاقي ترال معديه متلحقش تلم نفس فخد بالك كويس من الموضوع ده تهدي سرعتك شوية وتركز
ومتسرحش في الطريق لان منظر الترعة جميل وخصوصا في المناطق اللي فيها شجر صفاصاف ( انا عن نفسي مرة نزلت من الاتوبيس وقعدت على الترعة شويةو رجعت استنيت اللي بعده لما جه ركبت فيه )
البنزينة في الزقازيق قبل ما تطلع تمون ولو غاز تمون من الزراعة افضل في ابو حماد اعتقد فيه واحده توتال
في التل الكبير فيه واحده
في القصاصين فيه واحده
في ابو صوير فيه واحده وفيه غاز في ابو صوير
يعني لو غاز تمون اما من الزقازيق او من ابو صوير

الخدمات الاخري على الطريق كل حاجة متوفرة خصوصا ان عليه قرى كتير لو احتجت مسجد / حمام / اكل / شرب هتلاقي كل ده لو ان المسافة كلها على بعضها رسميا 80 كيلو وبتاخد في العربية ساعه او ساعه وعشر دقايق مش محتاجه ترييح الا لو كان فيه أطفال

بس خلي بالك يوم الخميس فيه سوق في الشوبك تقريبا وبيكون الطريق تقيل في الحركة شوية

فيه وصلة تانيه صحراوي في الطريق مش عليها خدمات بس الطريق بيمشي سريع شوية الوصلة من قبل التل الكبير بتخرج قبل مدينة المستقبل بتلف من عندها وترجع تدخل اسماعيلية بس انا مش فاكر الوصلة دي مكانها فين بالضبط وكمان الوصلة دي مش عليها خدمات خااااااااالص لكن الحركة عليها خصوصا بالنهار كويسة كلها عربيات نص نقل لزوم المزارع اللي هناك
لكن للأسف مش فاكر الوصلة دي تدخلها منين بالضبط اعذروني


وتوصلوا بالسلامة ان شاء الله

sad-bird
03-12-2010, 06:43 PM
بما اني من الزقازيق فاغلب الطرق اللي اعرفها وبوصفها الخاصه بالزقازيق وما اليها

الزقازيق بورسعيد ليها طريقين
الطريق الاول نفس طريق اسماعيلية لكن من عند مركز البحوث الزراعية او صاله مبارك بنكمل في الطريق ده لما توصل بالسلامة ان شاء الله طريق سشريع وكويس 4 حارات لكن تاخد بالك من عند ابو خليفة بيكون شوية زحمة او مخنوق لضيق الطريق بتفضل ماشي فيه لما توصل القنطرة وتلف حولين صينية لكنك في نفس الطريق وتكمل بورسعيد
الخدمات متوفره عليه كلها لكن على مسافات في حدود 10 كيلو بين كل مكان والتاني
البنزين معرفش اماكن بتاعته ايه وفين
باقي الخدمات اعتقد متوفرة كويسة لوجود قري او مزارع على الطريق وخصوصا في ابو خليفةو الفردان والقنطرة وكمان ده طريق دولي وبيربط بكوبري مبارك السلام يعني شمال سينا وبالتالي اكيد خدماته كويسة
افضل ميزه فيه انه طريق سريع زيه زي اسكندرية الصحراوي
اكتر من كده مخبيش عليكم لاني ممشتش عليه كتير


الطريق الثاني من الزقازيق تطله ههيا ابو كبير فاقوي ومش تدخل فاقوس من عند المفارق تمشي شمال لما توصل كوبري الوحدة تعدي الكوبري وتكمل على طول مع الطريق هلتاقي عربيات نص نقل بصندوق بتحمل ركاب القنطرة وعربيات مرسيدس 60 بتحمل القنطرة وبورسعيد واوقات ميكروباصات ممكن تمشي ورا حد منهم
بعد كوبري الوحده بتمشي على طول ومع انحنائات الطريق بتمر على قري وعزي ومزارع لما توصل الصالحية وهنا انت وحظك يا طريق فاضي وتمشي فيه براحتك لكن تراعي ظروف اللي بيمشي في الطريق من البني ادميين يا اما طريق واقف لو فيه خضار بينزل او مزرعة بتنزل حاجة او مزاد ومتنساش وانت هناك تبقى تاخد شوية خضار طازة للمدام علشان تفرح بيك ومتنساش كمان تاخد من العيش الابيض بتاع الصالحية عيش تحففففففة ما شاء الله
بعد كده تكمل الطريق على طول لغايه لما توصل المثلث عند الشرطة العسكرية وهناك هتلاقي مثلث زي بتاع العباسة 3 طرق رايح جاي وكلها بتتقابل في الميدان ده من غير ما يتعملها ميدان ولا يحزنون ( الكلام ده من 3 سنين اخر مرة الله اعلم دلوقتي عملوا ميدان والا لأ )
انت جاي من الصالحية لو دخلت يمين يبقى هتدخل القصاصين لو كملت على طول يبقى هتوصل الفردان او ابو خليفة مش فاكر وممكن من هناك تاخد طريق بورسعيد
اما الافضل بتدخل شمال من قدام الشرطة العسكرية وتمشي مع نفسك صحراء جرداء لا زرع فيها ولا ما
اقصد فيها زرع وميه لكن خاص بمزارع وكل كام كيلو تلاقي عزبة لكن لاطريق واسع ومفتوح معتقدش عليه رادار لانه خاص بالقوات المسلحة زي طريق بني سويف كده مفيش عليه اي خدمات خاااااااااااااااااااااااااااااااااالص لكن تقدر تجري فيه براحتك لو عاوز تجيب 200 هتجيبهم بس خلي بالك طبيعة الارض سهول مرتعفة ومنخفضه يعني لو العربية خفيفة ممكن تلاقي نفسك طاير فوق جبل والا حاجة تفضل ماشي ولا يمين ولا شمال لغايه لما تلاقي عزبة اسمها المثلث وعليها كمين شرطة ومطبين صغيرين الكمين بيركز قوي في الطواريء وبالليل بس غير كده معتقدش والهدف منه اصلا تدعيم تامين الكوبري ومن هنا ممكن تممشي من طريقين اما تكمل لاخر الشارع وتدخل يمين ومع اول ملف شمال وتكمل القنطرة بورسعيد
يا اما من عند الكمين ده تلف شمال وتمشي في حته متكسرة شوية لغايه لما تعدي الكوبري وتلف حوالين منه وتدخل من الفتحه اللي قبل القنطرة لك مطلق الحرية لكني افضل الاولي
لو كملت لاخر الشاعر ثم يمين على طريق اسماعيلية القنطرة ثم اول ملف شمال يبقى الطريق بيتقابل مع الوصفة الاولى من اسماعيلية ونفس الشرح

الخدمات
من الزقازيق لفاقوس الخدمات كويسة لان اغلبها قري وهتلاقي كذا محطة بنزين وهتلاقي اي حاجةتحتاجلها لو العربية غاز يبقى هتمون من الزقازيق وتكمل ومعتقدش فيه في القنطرة غاز لكن ممكن تسأل غير كده يبقى لما توصل بورسعيد بالسلامة ان شاء الله
المسافة من فاقوص للصالحة الخدمات عليها قليلة لكن موجوده
من الصالحية للميدان ند الشركة هتلاقي فيه خدمات وكافرتيات لكن قليله ولا ترقي لمستوي اسرة يعني رجالي او شبابي ممكن لانها عباره عن غزرة بس نضيفةشوية واستراحات لسواقين النقل التقيل
من المفارق دي لغايه القنطرة مفيش اي خدمات خاااااااااااااااااااااااااااالص لان كلها منطقة عسكرية الا لو حد معدي وده غالبا بالنهار لان باليل الحركة بتوكن قليله قوي
من القنطرة لبورسيعد او من اخر الطريق بروسيعد فيه خدمات لكن معرفش ايه وضعها
وتوصلوا بالسلامة

خالدخليفة
03-12-2010, 10:38 PM
دهاليز القاهرة (1 )

ونكمل الموضوع بعد انتهاء الهجوم الصعيدى
ونقول
نفترض انك كنت فى اى منطقة فى القاهرة وهى بلد الزحام والفوضى والضوضاء
والحقيقة الفترة اللى فاتت انا عانيت كتير من بلاوى الطرق فى القاهرة
وخصوصا انى مش واخد عليها وواخد علي الطرق السريعة ولذلك الغيار الاول والتانى فى الفتيس لم اعرفهم الا فى القاهرة وكثيرا ما كنت انساهم
وهذه الخرائط اقدمها لكم تحت بند
امشى سنة ولاتخطى قناة ومن اجل توفير الوقت
اما ان كنت من انصار عدم اللف
فخليك فى مكانك ولاتقرأ هذا الكلام
مع العلم وانت واقف بتصرف بنزين وانت بتلف بتصرف نفس النسبة تقريبا مع اختصار الوقت
ولسبب آخر ان بعض الناس ميعرفش غير طريق واحد بيمشيه يوميا ويعانى معاناة مابعدها معاناة حتى يصل البيت
فبحاول قدر المستطاع اعرفهم طرق تانية لتوفير الوقت والجهد والمال (البنزين واستهلاك السيارة )عليهم
ولنبدأ بالمناطق من حيث الأهمية
اولا / العتبة
انت الان فى ميدان العتبة واما م المطافى تحديدا
اما انك رايح على مناطق شبرا او شبرا الخيمة او الطريق الزراعى
فى هذه الحالة ليس امامك الا انك تلف يسارا فى الميدان وتدخل يمينا على شارع كلوت بك وهو شارع ضيق واذا كان واقف يبقى سبب وقفته التجار ولذلك بتبقى وقفة مؤقتة ولوسيادتك مبتحبش الشوارع الضيقة والتخريم منها هتمشى فى كلوت بك لحد شارع (مش عارف اسمه ) لكنه اتجاهين وعلى ناصيته نقطة شرطة الخازندارة تدخل شمال ثم قبل النهاية ادخل يمين شارع ضيق معلش استحملنى وادخله (على ناصيته مطعم او محل ساندوتشات ) فى نهاية الشارع ستجد نفسك فى شارع الجمهورية اكسر شمال ثم طوالى هتجد نفسك فى اول شارع 26 يوليو ادخل يمين فيه حتى نهايته
(هو زحمة نوعا ما لكن اى مشكلة فيه لابد من حلها بسرعة ) واكسر يمينا ستجد نفسك داخل على ميدان عبد المنعم رياض
الميدان واقف ادخل قبل فندق هيلتون يمينا سيصبح الفندق على شمالك وامشى طوالى ثم تانى او تالت شمال (مش فاكر) هتخرج على الكورنيش وطوالى حتى شبرا الخيمة او عندما يقابلك كوبرى الساحل العابر للنيل ادخل تحته واول يمين الى السبتية وتانى يمين او تالت يمين تدخل على خلوصى ثم اخر يمين تنزل على المظلات وعبود ولو كملت حتى الاخر ودخلت اخر يمين توصل محطة شبرا الخيمة للمترو والقطار يسارا الزراعى الى الاسكندرية ويمينا تعود لتركب الكوبرى وتدخل داخل منطقة شبرا الخيمة

طيب

الطريق سالك ومشيت من العتبة ودخلت كلوت بك حتى نهايته ووصلت رمسيس هتكسر شمال واول يمين بعد مسجد الفتح شارع عامل زى حرف اس بالانجليزى ( s ) تمشى مع الشارع ولما يلف تلف معاه ثم اول يمين ستجد نفسك فى نهاية عماد الدين عديت الاشارة بتاعة شارع رمسيس ودخلت على يمينا على احمد حلمى وجزيرة بدران
عديت تحت السكة الحديد وفوجئت ان الطريق واقف
تـأ نى (تمهل ) فربما تكون هذه الوقفة خادعة بسبب الاتوبيس والميكروباس اللى بيقـف يحمل من اول شارع شبرا فان كان الطريق يمشى ويقف ويمشى ويقف فهو الاتوبيس فعلا كمل فيه شارع شبرا طويل وحين يلف يسار فى نهايته فانت كده وصلت خلوصى
قبل خلوصى سينقسم الطريق فان مسكت الشمال فانت متجه الى شبرا المظلات وعبود وشبراالخيمة وان مسكت اليمين فانت متجه عبود او الى احمد حلمى ان كسرت يمينا
هنا يمكنك ان تتخلص من الزحام من اى جانبى
طيب
انت عديت اشارة رمسيس ودخلت يمين لقيت شارع شبرا واقف والدنيا بايظة
تعمل ايه
تكسر يمين وتدخل احمد حلمى وتمشى جنب سور السكة الحديد هتلاقيها واقفة
متخافش
دول سواقين بنها بيلمو زباين فالطريق بيمشى ببطء
وتممشى فى شارع احمد حلمى بجوار سور السكة الحديد
اول شمال هتنزل ميدان احمد بدوى وشارع شبرا
تانى شمال مساكن ايديال ومنتصف شارع شبرا
تالت شمال عند الكوبرى هتدخل على أبو وافية و المظلات ولو كملت هتطلع على اغا خان على النيل ومستشفى اغاخان
بعد الشمال التالت مفيش شمالات تانى الا فى شبراالخيمة
لكن بعد الشمال التالت عند كوبرى ابو وافية اول يمين تدخل موقف عبود

خالدخليفة
04-12-2010, 12:03 AM
دهاليز القاهرة (2 )

ولازلنا فى ميدان العتبة وتحديدا عند المطافى
ولكنك هذه المرة متوجه الى مصر الجديدة او الزيتون او مدينة نصر او التجمع الخامس او طريق السويس او الاسماعيلية او المقطم او المنشية او الدويقة
ستجد امامك بميل قليل ناحية اليسار شارع الأزهر ادخل فيه سيقابلك تقاطع شارع بورسعيد او ميدان حمام التلات عديه وكمل فى شارع الازهر حتى اخره ستعبر تحت شارع صالح سالم كمل على طول ان كنت متجها الى المقطم والدويقة ومنشية ناصر او المنيل
وادخل شمال مع شارع صلاح سالم ان كنت ذاهبا الى مصر الجديدة أومدينة نصر أوالتجمع الخامس أوالسويس أوالاسماعيلية

اماكن التوقف

1ــ طلعة كوبرى احمد سعيد
وهو توقف مؤقت بسبب ان هناك فلاسفة يقطعون الشارع من اليمين الى اليسار ليركب الكوبرى
بالأضافة الى بعض اخواننا قائدى السيارات يسير بسرعة لاتزيد عن 20 كيلو فى الساعة وتجد احدهم فى اليمين والأخر فى اليسار فيتوقف الطريق لان الكوبرى حارتين
فلاتهتم بهذا التوقف فهو مؤقت وليس توقف مزمن


2ــ كوبرى العباسية
نزلت من الكوبرى ومشيت فى صلاح سالم حتى كوبرى العباسية ووجدت الدنيا بايظة والطريق واقف وقفة مايعلم بيها الا المولى تيجى بعد دار الحرب الالكترونية (على ما أعتقد ) وتدخل يمينا فى شارع السكة البيضا وقبل نهايته وبعد عبور السكة الحديد ادخل يسارا ثم يسارا مرة اخرى ثم يمينا حتى نهاية الطريق ستجد محطة الغاز على يمينك هنا تدخل يمين ستجد امامك كوبرى اطلعه ان كنت متجه الى مدينة نصر او التجمعات او طريق السويس او الاسماعيلية
ولو رايح الزيتون او راجع صلاح سالم او داخل الزاوية الحمرا فمتطلعش الكوبرى وادخل من تحته واول يوتيرن شمال وارجع تانى ثم اول شارع يمين ستجد نفسك خلف المعرض وامامك قاعة المؤتمرات ثم شمال من اخر الشارع على طووول الى الزيتون والزاوية الحمراء او اول شمال ستجد نفسك خلف الاستاد الى اخر الشارع ثم يسارا ستجد نفسك فى منتصف صلاح سالم عند الجهاز المركزى فى اخر عمارات العبور
فان طلعت الكوبرى
عندما تصل الى قمة الكوبرى ستجد 3 مخارج
يمينا مخرج الاوتوستراد ثم الى المعادى

وان كنت متجه الى مصطفى النحاس او..أخر عباس العقاد أو نهاية مكرم عبيد أو الحى العاشرفالزم المخرج الذى امامك
وان كنت متجه الى اول عباس العقاد او نادى الزهور او يوسف عباس او النادى الأهلى بمدينة نصر او الزيتون فالزم المخرج الذى على يسارك
طوالى مدينة نصر و وعباس العقاد ومكرم عبيد والنادى الأهلى ثم سيقابلك كوبرى فان طلعته ذهبت الى الهايكستب وطريق الاسماعيليه ومساكن الشيراتون
وان دخلت من تحته ثم يمينا طريق السويس
وان كنت جاى عندنا الزيتون (تنور وتشرف والزيتون هيبقى مانجة علشان خاطرك)
فأول يوتيرن يسار يقابلك تلف وترجع جنب قاعة المؤتمرات هيقابلك كوبرى المعرض اطلعه وانزل بعد عمارات العبور هيقابلك كوبرى تانى اطلعه واول مخرج يمين ثم يمينا اصبح القصر الجمهورى على شمالك ومحطة كوبرى القبة لمترو الأنفاق أمامك ادخل شمال فى الأخر سيصبح القصر الجمهورى على شمالك والمترو على يمينك وعلى طوووووووول حتى الزيتون
3 ــ سينتهى سور القصر الجمهورى فى سراى القبة وسيقابلك كوبرى سراى القبة متطلعوش انزل من تحته ستجد امامك شارع ترعة الجبل (واقف دايما بسبب تصرفات الناس) وللهروب منه ادخل يسارامع سور القصر واحترس من منزل الكوبرى حتى لاتحدث مشكلة مع اى سيارة نازلة وداخلة شارع الترعة
اصبح القصر الجمهورى على يسارك مرة اخرى
ادخل اول يمين يقابلك ستجد مسجد على يمينك وبعده مركز شباب صغير او ساحة رياضية امشى معهم حتى ينتهى سور الساحة وادخل يمينا مع السور حتى ينتهى ثم يسارا ستجد شارع ضيق ادخله ....اترك اول تقاطع ....عديه ثم عدى التقاطع الثانى ثم اول يمين اتركه وادخل اليمين الثانى حتى آخره ستجد نفسك قابلت شارع ترعة الجبل وانت الأن فى وسط الزيتون لو رايح عين شمس اقطع شارع الترعة وادخل فى الشارع الذى امامك اول يمين شارعنا (ممكن تشرفونا لو حبيتو ) ثم تانى شمال سور المترو تمشى فيه حتى حلمية الزيتون وتكمل على عين شمس
4 ــ لو دخلت صلاح سالم وانت رايح على المنيل
سيقابلك توقـفـان للمرور
الأول
عند كوبرى السيدة عائشة وهو ناتج عن الفوضى بتاعتنا (اللى ماسك شمال داخل يمين والى ماسك يمين داخل شمال )
تحمل هذا التوقف لانه مؤقت ولن يستمر طويلا
ثم التوقف الثانى وهو قبل اشارة مدخل مجرى العيون بعد كوبرى السيدة عائشة مباشرة
لن يستمر كثيرا لانه ناتج عن الفوضى بتاعتنا لان فى يوتيرن يدخلك القلعة ثم كورنيش المعادى وبالتالى تجد كثيرين يدخلون يمينا لانه السالك ثم يقطع الشارع لكى يدخل اليوتيرن فيغلق الطريق
ستدخل يمينا ناحية المنيل لو الطريق واقف ستجد مسجد على يمينك اول شارع يمين بعده ثم اول يسار وتمشى على طول حتى تصل الى الجيارة اكسر شمال ثم يمين اصبحت عند نفق الملك الصالح ومن بعده المنيل وسينما فاتن حمامة
فأن كان الشارع متوقفا تماما فادخل يمينا مع النيل ستصبح سينما فاتن حمامة على يسارك ثم اول يمين حتى آخر الشارع ادخل يمينا ثم اول يوتيرن يساراحتى نهاية الطريق ثم يسارا ستجد نفسك عند محطة البنزين التى على ناصية شارع عبد العزيز آل سعود..... اطلع الكوبرى .... أمامك ميدان الجيزة... اول مخرج يمينا الى الدقى والمنيب فان دخلته ثم خرجت يسارا فانت ذاهب الى المنيب والقرية الفرعونية وساقية مكى
كفاية كده طولت عليكم
فاصل ونواصل
كيفية الهروب من مناطق الزحام فى دهاليز القاهرة

خالدخليفة
04-12-2010, 12:13 AM
حمدا لله على سلامة الوفد وترجع بالسلامة
وكان الله في عون ام عمر في البهدله اللي بتحصل للشقة
الله يسلمك ياحبيبى
وعقبال م نجيلك وفد كلنا فى البيت عندك

sad-bird
04-12-2010, 12:18 AM
الله يسلمك ياحبيبى
وعقبال م نجيلك وفد كلنا فى البيت عندك

انتو تشرفو وتنورو كلكم

خالدخليفة
04-12-2010, 12:53 AM
طريق القناطر الخيرية



ان كنت جاى من القاهرة فهتوصل طريق اسكندرية الزراعى ثم توصل كوبرى الدائرى وتدخل يمين فى النفق ثم يمينا تطلع كوبرى الطريق الدائرى واول مخرج يمين تنزل منه على القناطر وهو طريق ضيق وحالته سيئة ومليااااااااااان مطبات وتسير فيه حتى أخره ستصل مزلقان منطقة اسمها الحادثة فاذا كسرت يسارا ستصل الى القناطر
طريق سىء ومزدحم ومليان مطبات ولاتوجد به اى كماين والجزء المنير من الطريق يستمد انارته من المحلات المنتشرة على جانبى الطريق وليست انارة الحكومة يعنى بعد المحلات م تقفل هتلاقى الشارع كله فيه ميجيش 10 عواميد على الجانبين وهو رقم قليل جدا
ولتمام الفايدة
لو عديت مزلقان الحادثة ومشيت طوالى
ستجد امامك طريق ضيق ومزلقان سكة حديد صغير اعبره وادخل على طووووووووووول
ستجد طريق ضيق جدااااااا وسيىء جدا ومنحنياته كتير
واحترس
فستجد فجأة طلع لك مطب صناعى وتكمل على طوووول ستجد قرية العمار بتوع الفاكهة وخصوصا المشمش (متخصصين فى زراعته )
فى نهاية هذا الطريق ستجد نفسك عند مزلقان بنها
وهذا الطريق خطر جدا ليلا
فلاتجد عليه انارة ولا لافتات ارشادية ولا اى حاجة ولا اى حاجة تقول لك انت فين ولافاضل ايه على بنها ولا فاضل كام على القناطر ولا اى شىء وكـأن هذا الطريق لأهل البلاد المقامة عليه ولايصح لأى غريب انه يدخله

خالدخليفة
04-12-2010, 02:23 AM
طريق القاهرة /كفر الشيخ

هو نفس طريق القاهرة طنطا الزراعى وتم شرح هذه المرحلة سابقا
ثم عند مرور طنطا تدخل يسارا على كفر الشيخ وستمر على مركز قطور وقلين وهو طريق طوله 35 كيلو ولكن تأخذها السيارة فى ساعة تقريبا
بسبب
مطباته الكثيرة جدااااااااااا
وسبب آخر
انه ضيق جدا ويتسع لتريلا وبجوارها سيارة صغيرة .......
يعنى لو ..مر تريلتين جنب بعض لابد ان تنتظر احداهما الاخر او يخرجا على الطبان (التراب على جانبى الطريق )
هذا الطريق كله قرى وتصرفات الناس عليه عجيبة شوية
فهم يتحركون وكأنه لايوجد طريق للسيارات يمر على بلدهم واذكر انى حكيت مرة فى موضوع ادب الرحلات عن عريس قطور والفرح اللى كان سادد الشارع


هذا الطريق مظلم ليلا ولايوجد عليه اى اضاءة
وهو عليه كمين واحد فى مدخل كفر الشيخ (قطور هى آخر مراكز الغربية من جهة الشمال الشرقى )
وهو يعمل حسب التساهيل او مزاج الظابط احيانا يشتغل وأحيانا
خخخخخخخخخخخخ
نوم تاااااااااااااام
احترس من هذا الطريق ليلا ونهارا
ولا داعى لاى سرعة تزيد عن 70 بالكتير
وخصوصا ان غالبية سائقى الميكروباس عليه لايفقهون اى شىء وعليهم اقساط وعايزين يسددوها كماقال لى احدهم ذات مرة بعد ان كاد ان يرتكب 3 حوادث بنا وحين نبهته
قال بغباء متناهى / عليا قسط وعايز اسدده
ولما قلت له / لما تعمل حادثة لاقدر الله هتسدده ازاى
فسكت
وهناك طريق من المحلة الى كفر الشيخ لكن مدخله مظلم وضيق ولم افكر فى دخوله

خالدخليفة
04-12-2010, 03:08 AM
دهاليز القاهرة (3 )
أ - عين شمس والمرج

حين تدخل منطقة عين شمس والمرج فلاقانون ولانظام ولا اى شىء
وان كانت الفوضى فى امكان تانى قيراط فهى فى المرج وعين شمس 10 فدادين وتجد زحام على الفاضى وينتهى الى لاشىء
وبدراسة بسيطة وجدت انها سلوكيات الناس
ونبدأ بدراسة شوارع عين شمس والمرج وكيفية الهروب منها
اولا / جسر السويس
هو اطول شوارع منطقة شرق القاهرة وكان قطار السويس يمش فيه زمان وكان اسمه شارع سكك حديد السويس ثم تحول الى شارع عزيز المصرى ثم لما اختلف السادات مع عزيز المصرى سموه جسر السويس ( ايه حصة التاريخ دى )
معلش هناخده من اوله
هذا الشارع يبدأ اولى توقـفاته بعد مستشفى منشية البكرى مباشرة فان كان الزحام خانق فيمكنك ان تكسر اول يمين فأول شمال حتى آخره ثم اكسر شمال ستجد نفسك عند أشارة روكسى (تقاطع جسر السويس مع شارع القبة عند حلوانى لابالما ) ثم تسير فيه حتى كوبرى التجنيد وعند نزولك منه سيتوقف الطريق امسك الشمال لان الطريق يتوقف بسبب دخول الباشوات القاصدين مصر الجديدة وماسكين اليمين الى اليسار بالاضافة الى الميكروباس والاتوبيس والذين يتوقفون هناك من اجل الركاب
بعدها امسك اليمين لان الطريق هيقف تانى بسبب يوتيرن يدخلك ناحي قسم عين شمس ثم امشى طوالى وامسك اليمين ايضا عند مطعم دولفين واتسحب بشويش وتاخد الشمال واحدة واحدة علشان تبعد عن محطة الالف مسكن بتاعة الاتوبيس ثم تمسك وسط الطريق وتكون حذرا بسبب عبور الناس بكثرة من هذا المكان (موقف الالف مسكن والعاشر من رمضان )
وخليك فى وسط الشارع حتى تتفادى مطبين صناعيين كبار حتى بوابة فندق السلام بعدها امسك الشمال لكى تتفادى محطة اتوبيس العرب (عرب الجسر ) ثم امسك منتصف الطريق لكى تتفادى الخارج من خلف نادى الشمس والمهدىء لسرعته من اجل دخول اليوتيرن ثم امسك الشمال لتتفادى غلق الطريق عند محطة الجراج بسبب الميكروباس ثم اعبر السكة الحديد وامسك الشمال لتفادى القادم من النزهة الجديدة وبعدها امسك اليمين او الشمال ويفضل اليمين لان الطريق ملىء بالمطبات فى المنتصف ولان به 2 يوتيرن حتى محطة البنزين التى على ناصية مدخل النزهة الجديدة وبعد محطة البنزين امسك الشمال لان الطريق فى اليمين مكسر ثم منطقة مدينة قباء قبلها امسك اليمين لان اليمين فى هذا الجزء ماشى فان وجدت الطريق واقف بعد عبور السكة الحديد امسك اليمين واتسحب حتى تخرج من عنق الزجاجة عند الشبراوى هناك

طيب
الطريق متنيل ومش باين له اى حركة هتلف من الشارع اللى قبل محطة البنزين وتلف حوالين محطة البنزين بكده اختصرت حوالى 200 متر وبقيت على اول عنق الزجاجة ولان الطريق 3 حارات وينتهى الى حارة واحدة عند الشبراوى بسبب اللى راكن صف تانى وتالت بالاضافة الى الميكروباس فانه يتسبب فى زحام رهيب ولذلك تتسحب واحدة واحدة ناحية الشمال حتى تهرب وتتجه الى الحرفيين وهناك تمسك اليمين لان اليوتيرن اللى داخل على الحرفيين بيوقف الدنيا خااااااااااالص
ثم تستكمل الطريق حتى موقف العاشروهناك تمسك اليمين لانه مدخل الموقف وبالتالى هتلاقيه ماشى ثم تتسحب واحدة واحدة شمال حتى تمسك الشمال
وبالسلامة لحد الاسماعيلية
طيب وانت راجع الطريق مهبب
يا اما قلبك ميت زى حالاتى
فهتخرج بالعربية من على الاسفلت وتمشى ببطء على الطريق الترابى وهو طريق وعر نسبيا (مدق ) حتى تصل الى مدخل السلام
أدخله وامشى فيه حتى استاد السلام ثم يساراالى آخر الطريق ثم يمينا ستجد نفسك على طريق بلبيس اول يوتيرن تلف وترجع وتعدى الكمين وتدخل يمين من عند محطة المياه وتمشى على طووووول حتى قسم السلام وتكمل لحد كوبرى الدائرى وتعدى من تحته وطبعا لان مدخل الحرفيين ضيق جدا فممكن تجد الطريق واقف
لو حسيت ان الوقفة مطولة بعد الكوبرى مباشرة ادخل شمال فى الشارع اللى فى وشك حتى آخره وبدل م تخش شمال مع العربيات ادخل يمين هتلاقى فى اخره وحدة عسكرية قبلها ادخل يمين فى شارع ضيق ثم يسارا لتتخطى بذلك عنق الزجاجة فى الحرفيين ثم اتجه الى جسر السويس فأن كان متوقفا فادخل فى الشارع الفرعى الموازى لجسر السويس يمينا ثم يمينا فى جمال عبد الناصر فيسارا فيسارا مرة اخرى تخرج على جسر السويس بعد ان تخطيت جميع انواع التوقـفـات
لفيت شوية .... ده صحيح بس وفرت وقت وجهد وبنزين ووقيت عربيتك انها ممكن تتحك او تتخبط فى الزحام

corsair
04-12-2010, 03:14 AM
بقولك بقا يا عم خالد معندكش فكره ازاي اهرب من عين شمس من الزحمه واطلع علي مكرم عبيد

انا باخد طريق المترو لحد الحلمية واطلع كوبري الحلمية واكمل علطول لحد نادي الجلاء وبعدين اكسر يمين علي السبع عماير وميدان الساعه والف من ورا سيتي ستارز علي مكرم

عندك طريق احسن من ده

علي فكره ده اقصر طريق بالنسبالي لمكرم بس المشكلة انه زحمة فحت وردم

خالدخليفة
04-12-2010, 03:50 AM
دهاليز القاهرة (4 )
ب- عين شمس والمرج

شوارع سليم الاول وعين شمس ومنشية التحرير وابراهيم عبد الرازق واحمد عصمت والعشرين والزهراء وصعب صالح كلها موصلة على بعضها ولذلك بقليل من المراقبة لتصرفات الملاكى الذى من تصرفه ستحس انه عارف المنطقة او مستعجل ستهرب من الزحام

شارع التروللى
من عند منزل كوبرى عين شمس (عند بيت احمد كروزير ) ستجد نفسك فى اول شارع التروللى وهى منطقة يختلط فيها الحابل بالنابل بسبب تصرفات الناس وان كان التروللى للذاهب ناحية المسلة افضل من القادم منها ولذلك وانت جاى من المسلة وداخل على كوبرى عين شمس اسأل على شارع العبادى وادخل فيه ثم قبل نهايته ادخل يسار او اسأل على طلعة كوبرى عين شمس ستدخل شارع به 3 مطبات صناعية أسوأ من بعض نهايته عند الونش ثم يمينا كوبرى عين شمس

ميدان المطرية
وانت جاى من ميدان حلمية الزيتون طلعت الكوبرى ونازل على ميدان المطرية (وانت ف نص الكوبرى ارمى لى السلام ربما اكون فى المحل تحت الكوبرى)
لقيت الطريق واقف ليها حل لا انصح به دائما الا لو الميدان مش بيتحرك خاااااااااالص تروح مخرم من اى حارة جانبية يفضل من الحارة التى عند اولاد غيتة او التى بعده على شارع الصحة ثم شق التعبان وهو ممر ضيق جدا وخلى بالك ربما تدهس عيل بيلعب او تخبط ترابيزة حاططها صاحب محل
شق التعبان ده اخره شارع المطراوى عند ميدان المطرية متدخلش عكس لان
فيه بوكس شرطة واقف مستخبى لكن ممكن تدخل شارع المطراوى حتى قسم المطرية ثم يسارا بعد القسم شارع جانبى تخرج منه على منطقة التعاون بشارع الحرية
لو عايز ترجع تانى لانك مكنتش رايح التعاون فتلف من التعاون وترجع لقيت الميدان مقفول تدخل قبل مستشفى المطرية يمينا ثم تلف معاها يسارا ثم تدخل فى وشك شارع ضيق تدخل حتى آخره ثم يسارا شارع الكابلات

طبعا
فيكم ناس ممكن تقول ايه الدوشة دى
لكن انا بختصر لك وقتك
لو اللفة طويلة ومستكترها فيمكنك الوقوف فى الطابور
عموما انا بشرح أسوأ الأماكن من حيث الزحام وكيفية الهروب منها

خالدخليفة
04-12-2010, 04:04 AM
بقولك بقا يا عم خالد معندكش فكره ازاي اهرب من عين شمس من الزحمه واطلع علي مكرم عبيد



ياعم انت بتخش المعجنة برجليك وتقول اقصر طريق ؟؟؟؟؟؟؟؟؟
اركب ياعم كوبرى عين شمس من عند بيتكم وانزل الناحية التانية وعدى السكة الحديد وكمل على طول هيبقى سنترال عين شمس على يمينك والسكة الحديد على شمالك كمل لحد جسرالسويس وقبل كوفرتينا بشوية عند مخزن الانابيب ولان الجزء ده بيبقى زحمة جدا الصبح تكسر يمين وتدخل من الدهاليز اللى مشيناها انا وانت من عند محطة الكهربا وادخل يمين فى جسر السويس ثم اول يوتيرن تلف وترجع كأنك رايح الحرفيين ثم تكسر اول يمين من عند الجراج وعلى طوووووول لحد م توصل مساكن شيراتون هيـبـقى استاد الكلية الحربية على يمينك م تدخلش صلاح سالم كمل على طول ومتدخلش اول يوتيرن كمل فى الشارع مع المترو وسط مساكن شيراتون لحد آخره ثم انحرف يسارا حتى آخر الشارع ثم يمينا انت الأن فى طريق المليون شجرة
امشى على طووول سيقابلك كوبرى اطلعه ستجد نفسك خلف النادى الأهلى
هتعرف تكمل لمكرم عبيد من النقطة دى واللا اكمل لك ؟؟؟؟؟

خالدخليفة
04-12-2010, 04:15 AM
ياترى انت فين يادكتوووور
سبت لى الموضوع ومشيت

خالدخليفة
04-12-2010, 05:16 AM
دهاليز القاهرة (2 )


2ــ كوبرى العباسية
شارع يمين ستجد نفسك خلف المعرض وامامك قاعة المؤتمرات ثم شمال من اخر الشارع على طووول الى الزيتون والزاوية الحمراء او أول شمال ستجد نفسك خلف الاستاد الى اخر الشارع ثم يسارا ستجد نفسك فى منتصف صلاح سالم عند الجهاز




الجزء المكتوب بخط كبير وبلون أحمر كتبته بطريق الخطأ
وصحته هى
اول يمين قبل كوبرى الفنجرى ستجد نفسك خلف الاستاد

خالدخليفة
04-12-2010, 07:32 AM
دهاليز القاهرة (5 )
مصر الجديدة

أسوأ مافى مصر الجديدة

الخليفة المأمون / صلاح سالم / المسافة من نادى الجلاء وحتى جسر السويس

اولا الخليفة المأمون
هو تقريبا ماشى معظم اليوم لكن احيانا يتقـفـل بالضبة والمفتاح
فى هذه الحالة لو انت فى اول الخليفة المأمون أمشى مع مترو مصر الجديدة الى كوبرى القبة حتى مسجد جمال عبد الناصر ثم شوف طريقك ازاى سواء يمينا الى العباسية او طوالى الى مدينة نصر
طيب وانت جاى من العباسية؟؟؟؟
غالبا وبنسبة 99% لايتوقف
صلاح سالم
مشكلة صلاح سالم فى بدايته عند مساكن الشيراتون ان كنت ذاهبا الى مساكن شيراتون فمفيش مشكلة سوى انك هتمسك نص الطريق لان اليو تيرن اللى يرجعك الهايكستب بيعطل الطريق لكن لو دخلت يمين مع سور استاد الكلية الحربية هتمشى لحد م تخلص السور (ملكش حل ) ثم تكمل مع الشارع ثم تانى يمين بعد الاستاد فأول شمال حتى الشمال الذى قبل الأخير لان الاخير هيطلعك بعد طلعة الكوبرى ب20 متر وهتلاقى ظابط واقفلك بموتوسيكل عند طلعة الكوبرى علشان لو فكرت تسرق ال 20 متر دول عكس اتجاه
وطبعا يمين تطلع الكوبرى نزلت ولقيت الطريق متكدس امسك يمين الطريق لان هو اللى ماشى لانه يطلعك على قصر المحروس وصعب انهم يوقفوه لكن علشان م تعطلش الطريق.... قبل النفق بمسافة 50 متر مثلا تبتدى تـتـسحب شوية بشوية لحد ميـبـقى النفق مواجه ليك

بمجرد خروجك من النفق انتهت مشاكل صلاح سالم حتى كوبرى السيدة عائشة وشرحناها سابقا
الراجع فى صلاح سالم
كل الدوشة عند المعرض ولذلك امسك اليمين دايما لانه ماشى عن الشمال وبمجرد عبورك كوبرى الفنجرى لو الشارع لسه واقف ووقفة سيئة
انزل اول يمين هتلاقى الاستاد فى وشك اخر الشارع اكسر شمال لحد الأخر ثم شمال تانى سيقابلك صلاح سالم مرة أخرى ولكن عند الجهاز المركزى وهى منطقة بداية عمارات العبور
بعدها ستدخل على النفق و...هم فى هذه المنطقة لايسمحون بالتوقف المرورى لانها منطقة كلها مباحث وحراسات الريس وشغلانة مياخدش باله منها الا اللى رايح جاى على الشارع او اللى مناخيره بتشمهم من على بعد زى حالاتى
خرجت من نفق العروبة ولسه الطريق واقف يبقى تانى يمين فى اول شمال ستمشى موازيا لصلاح سالم ثم تانى شمال ستكون امام طلعة الكوبرى
طلعت الكوبرى يبقى حمدا لله على السلامة

من نادى الجلاء الى جسر السويس
هذه المرحلة تمر بميدان سفير ثم ميدان هارون الرشيد ثم ميدان المحكمة ثم ميدان التجنيد (جسر السويس )
فأن كنت جاى من عند نادى الجلاء ورايح التجنيد او حلمية الزيتون او غيره
هتعمل الأتى

هتدخل من تحت الكوبرى يمين ومتاخدش اليوتيرن على الشمال ثم يمينا الى سفير
كمل على طول هتلاقى ميدان تريومف امسك اليمين و..لف الصينية وادخل الشارع اللى ف وشك (على ناصيته بنك كريدى اجريكول ) وكمل حتى تصل سانت فاتيما برضه امسك اليمين ولف الصينية وادخل الشارع اللى فى وشك اللى على ناصيته محطة البنزين وكمل هيقابلك الميدان اللى فيه مستشفى هليوبوليس عدى الميدان وخد فى وشك لايمين ولاشمال كأنك رايح جسر السويس
تانى تقاطع يقابلك ادخل شمال وكمل فى وشك على طوووول هتلاقى نادى النصر مقابلك ممكن تمشى للأخر وتدخل شمال اصبح بينك وبين جسر السويس اقل من 50 متر ودول بيقف فيهم الطريق بسبب البهوات اللى بيركنو صف تانى والشارع ضيق علشان يشترو من سوبر ماركت المحمل
عموما دى وقفة بسيطة ومتستاهلش الدخول من الدهاليز


اما لو رايح من الجلاء لسفير يبقى هتدخل من اليوتيرن شمال ثم يمين على سفير
بس امسك اليمين لانه ماشى عن الشمال علشان اليوتيرن اللى قصاد ميشو بتاع الانقاذ

ولو مكمل لهارون الرشيد امسك الشمال حتى تعبر شريط مترو مصر الجديدة ثم امسك اليمين تانى حتى تصل ميدان هارون الرشيد
ومن هارون للمحكمة مسافة صغيرة ونادرا ماتـتـوقف

بالمناسبة من ميدا ن المحكمة لو دخلت شمال ممكن الطريق يقف قبل روكسى بحوالى 500 متر لو الطريق واقف وقفة وحشة اوى اوى ادخل يمين مع سور الميريلاند ثم شمال تانى مع سور الميريلاند ثم كمل فى الوش حارة صغيرة جنب بيت علاء مبارك ثم شمال خلف نادى هليوليدو هتطلع على ميدان روكسى مباشرة

ملحوظة
دائما مصطفى النحاس بالليل واقف وقفة تمام من بعد شارع الطيران فانت هتدخل اول يمين وهو عباس العقاد ثم اول ملف شمال ترجع تانى فى عباس ثم اليمين الاخير فى عباس قبل مصطفى النحاس تمشى فيه حتى يقابلك مكرم عبيد نفس القصة تلف يمين فى مكرم ثم اول ملف شمال تلف وترجع فى مكرم ثم الشمال الاخير فى مكرم قبل عمارة فؤاد المهندس وطوالى حتى أخر الشارع ستجد الشارع مسدود تدخل شمال ستجد نفسك بينك وبين مدارس المنهل اقل من 50 متر امسك الشمال لان اليمين محطة اتوبيس وميكروباس ثم معاك حتى اخر الشارع او اول يوتيرن احمد فخرى والنادى الاهلى على اليمين

corsair
04-12-2010, 09:51 AM
ياعم انت بتخش المعجنة برجليك وتقول اقصر طريق ؟؟؟؟؟؟؟؟؟
اركب ياعم كوبرى عين شمس من عند بيتكم وانزل الناحية التانية وعدى السكة الحديد وكمل على طول هيبقى سنترال عين شمس على يمينك والسكة الحديد على شمالك كمل لحد جسرالسويس وقبل كوفرتينا بشوية عند مخزن الانابيب ولان الجزء ده بيبقى زحمة جدا الصبح تكسر يمين وتدخل من الدهاليز اللى مشيناها انا وانت من عند محطة الكهربا وادخل يمين فى جسر السويس ثم اول يوتيرن تلف وترجع كأنك رايح الحرفيين ثم تكسر اول يمين من عند الجراج وعلى طوووووول لحد م توصل مساكن شيراتون هيـبـقى استاد الكلية الحربية على يمينك م تدخلش صلاح سالم كمل على طول ومتدخلش اول يوتيرن كمل فى الشارع مع المترو وسط مساكن شيراتون لحد آخره ثم انحرف يسارا حتى آخر الشارع ثم يمينا انت الأن فى طريق المليون شجرة
امشى على طووول سيقابلك كوبرى اطلعه ستجد نفسك خلف النادى الأهلى
هتعرف تكمل لمكرم عبيد من النقطة دى واللا اكمل لك ؟؟؟؟؟


لا كفايا لحد كدا انا هعرف اكمل مع نفسي

علي فكرة الطريق ده روحته قبل كدا بيعمل معايا 22 كيلو رايح بس

لكن الطريق بتاع الحلمية بيعمل معايا 9 كيلو

وانتا عارف يا عمنا انا راجل غلبان بحط بنزين 92 مش غاز


وثانيا انتا كدا قولتلي ازاي اروح من اروق طريق

طب الرجوع بقا ارجع ازاي هيه ديه المشكله الاكبر بالنسبالي


اانا برجع من مكرم وبنزل من تحت كوبري السبع عماير وباخد شارع الثوره لحد روكسي وبهرب من القوربه علي طريق المحكمه وباخد اول يوتيرن وباطلع علي طريق سنترال مصر الجديدة وبدخل اكتر حته بتخنقني في حياتي وهي التجنيد وحلمية الزيتون

اموت واعرف اهرب ازاي من التجنيد وحلمية الزيتون

sad-bird
04-12-2010, 10:27 AM
وبدخل اكتر حته بتخنقني في حياتي وهي التجنيد وحلمية الزيتون

اموت واعرف اهرب ازاي من التجنيد وحلمية الزيتون


لو وصلت كوبري التجنيد في جسر السويس ادخل يمين كأنك رايح اللف مسكن اول يوترن تلف وترجع وتدخل من عند عمو حسني او الشارع اللي بعده من وسط مساكن الحلمية هتلاقي الشوارع كلها منفده علىبعضها
هتدخل من الشارع لاخرة 150 متر تقريبا فيه وحده شرطة عسكرية هناك تلفي يمين مع الطريق ثم شمال لاخر الشارع ثم يمين مرة اخرى لما يقابلك شارع مديرية التحرير تدخل فيه شمال تبقى وصلت قهوة عماد ومن هناك يا اما يمن وتكمل وتبقى تدخل شمال على بيتكم من عند شارع المعهد واسماك مرجان يا اما كمل لميدان النعام وتدخل يمين على البيت


الطريق الثاني تكمل الف مسكن وبعد الف مسكن تاخد اول يوترن من قدام نادي الشمس بوابة 5 وتدخل من شارع فلسطين او احمد عصمت ومن هناك اظن انت عارف تتحرك ازاي
أو تكمل لغايه ميكروباصات عين شمس وتدخل من الشوارع اللي ماشية فيها وتمشي وراهم لما يوصلوك شارع عين شمس عند المترو

aymanay32
04-12-2010, 11:13 AM
دهاليز القاهرة (3 )
أ - عين شمس والمرج

حين تدخل منطقة عين شمس والمرج فلاقانون ولانظام ولا اى شىء
وان كانت الفوضى فى امكان تانى قيراط فهى فى المرج وعين شمس 10 فدادين وتجد زحام على الفاضى وينتهى الى لاشىء
وبدراسة بسيطة وجدت انها سلوكيات الناس
ونبدأ بدراسة شوارع عين شمس والمرج وكيفية الهروب منها
اولا / جسر السويس
هو اطول شوارع منطقة شرق القاهرة وكان قطار السويس يمش فيه زمان وكان اسمه شارع سكك حديد السويس ثم تحول الى شارع عزيز المصرى ثم لما اختلف السادات مع عزيز المصرى سموه جسر السويس ( ايه حصة التاريخ دى )
معلش هناخده من اوله
هذا الشارع يبدأ اولى توقـفاته بعد مستشفى منشية البكرى مباشرة فان كان الزحام خانق فيمكنك ان تكسر اول يمين فأول شمال حتى آخره ثم اكسر شمال ستجد نفسك عند أشارة روكسى (تقاطع جسر السويس مع شارع القبة عند حلوانى لابالما ) ثم تسير فيه حتى كوبرى التجنيد وعند نزولك منه سيتوقف الطريق امسك الشمال لان الطريق يتوقف بسبب دخول الباشوات القاصدين مصر الجديدة وماسكين اليمين الى اليسار بالاضافة الى الميكروباس والاتوبيس والذين يتوقفون هناك من اجل الركاب
بعدها امسك اليمين لان الطريق هيقف تانى بسبب يوتيرن يدخلك ناحي قسم عين شمس ثم امشى طوالى وامسك اليمين ايضا عند مطعم دولفين واتسحب بشويش وتاخد الشمال واحدة واحدة علشان تبعد عن محطة الالف مسكن بتاعة الاتوبيس ثم تمسك وسط الطريق وتكون حذرا بسبب عبور الناس بكثرة من هذا المكان (موقف الالف مسكن والعاشر من رمضان )
وخليك فى وسط الشارع حتى تتفادى مطبين صناعيين كبار حتى بوابة فندق السلام بعدها امسك الشمال لكى تتفادى محطة اتوبيس العرب (عرب الجسر ) ثم امسك منتصف الطريق لكى تتفادى الخارج من خلف نادى الشمس والمهدىء لسرعته من اجل دخول اليوتيرن ثم امسك الشمال لتتفادى غلق الطريق عند محطة الجراج بسبب الميكروباس ثم اعبر السكة الحديد وامسك الشمال لتفادى القادم من النزهة الجديدة وبعدها امسك اليمين او الشمال ويفضل اليمين لان الطريق ملىء بالمطبات فى المنتصف ولان به 2 يوتيرن حتى محطة البنزين التى على ناصية مدخل النزهة الجديدة وبعد محطة البنزين امسك الشمال لان الطريق فى اليمين مكسر ثم منطقة مدينة قباء قبلها امسك اليمين لان اليمين فى هذا الجزء ماشى فان وجدت الطريق واقف بعد عبور السكة الحديد امسك اليمين واتسحب حتى تخرج من عنق الزجاجة عند الشبراوى هناك

طيب
الطريق متنيل ومش باين له اى حركة هتلف من الشارع اللى قبل محطة البنزين وتلف حوالين محطة البنزين بكده اختصرت حوالى 200 متر وبقيت على اول عنق الزجاجة ولان الطريق 3 حارات وينتهى الى حارة واحدة عند الشبراوى بسبب اللى راكن صف تانى وتالت بالاضافة الى الميكروباس فانه يتسبب فى زحام رهيب ولذلك تتسحب واحدة واحدة ناحية الشمال حتى تهرب وتتجه الى الحرفيين وهناك تمسك اليمين لان اليوتيرن اللى داخل على الحرفيين بيوقف الدنيا خااااااااااالص
ثم تستكمل الطريق حتى موقف العاشروهناك تمسك اليمين لانه مدخل الموقف وبالتالى هتلاقيه ماشى ثم تتسحب واحدة واحدة شمال حتى تمسك الشمال
وبالسلامة لحد الاسماعيلية
طيب وانت راجع الطريق مهبب
يا اما قلبك ميت زى حالاتى
فهتخرج بالعربية من على الاسفلت وتمشى ببطء على الطريق الترابى وهو طريق وعر نسبيا (مدق ) حتى تصل الى مدخل السلام
أدخله وامشى فيه حتى استاد السلام ثم يساراالى آخر الطريق ثم يمينا ستجد نفسك على طريق بلبيس اول يوتيرن تلف وترجع وتعدى الكمين وتدخل يمين من عند محطة المياه وتمشى على طووووول حتى قسم السلام وتكمل لحد كوبرى الدائرى وتعدى من تحته وطبعا لان مدخل الحرفيين ضيق جدا فممكن تجد الطريق واقف
لو حسيت ان الوقفة مطولة بعد الكوبرى مباشرة ادخل شمال فى الشارع اللى فى وشك حتى آخره وبدل م تخش شمال مع العربيات ادخل يمين هتلاقى فى اخره وحدة عسكرية قبلها ادخل يمين فى شارع ضيق ثم يسارا لتتخطى بذلك عنق الزجاجة فى الحرفيين ثم اتجه الى جسر السويس فأن كان متوقفا فادخل فى الشارع الفرعى الموازى لجسر السويس يمينا ثم يمينا فى جمال عبد الناصر فيسارا فيسارا مرة اخرى تخرج على جسر السويس بعد ان تخطيت جميع انواع التوقـفـات
لفيت شوية .... ده صحيح بس وفرت وقت وجهد وبنزين ووقيت عربيتك انها ممكن تتحك او تتخبط فى الزحام







طب انا ساكن فى المريوطية الهرم و عاوز اروح جسر السويس شركة الاحمدية بتاعة الاسبراتير الكترونى فى 1شارع السلام منشية السد العالى خلف حديقة بدر خلف مدرسة انس بن مالك - جسر السويس
و انا اخر معلوماتى انى اوصل العباسية من شارع رمسيس و بالتحديد كلية التجارة جامعة عين شمس اما ما بعد ذلك فهو مجهول
و هل ممكن اركب الدائرى من المريوطية و انزل فين لو طلعت الدائرى

corsair
04-12-2010, 11:43 AM
انا حاسس انك ساكن في الحلمة وبتشتغلني يا محمد يا علي بانك ساكن في الزقازيق

sad-bird
04-12-2010, 02:07 PM
طب انا ساكن فى المريوطية الهرم و عاوز اروح جسر السويس شركة الاحمدية بتاعة الاسبراتير الكترونى فى 1شارع السلام منشية السد العالى خلف حديقة بدر خلف مدرسة انس بن مالك - جسر السويس
و انا اخر معلوماتى انى اوصل العباسية من شارع رمسيس و بالتحديد كلية التجارة جامعة عين شمس اما ما بعد ذلك فهو مجهول
و هل ممكن اركب الدائرى من المريوطية و انزل فين لو طلعت الدائرى


الاقرب والاسرع والاسهل الدائري طبعا
تطلع على الدائري من عندك اتجاه المطار مرورا بطريق اسكندرية الزراعية ومسطرد والمرج وبعد المرج نزله مؤسسة الزكاة والسلام بعد السلام هتلاقي النفق اللي بيكمل الدائري اتجاه مدينة نصر
انت هتخرج من جنب النفق مش تدخل النفق هتلاقي اللوحة الارشادية مخرج المطار مصر الجديدة
الحزء ده وققت الذورة بيكون زحمة شوية فاصبر على الزحمة مش هتاخد وقت هتلاقي موقف العاشر على شمالك وانت تاخد يمين وتكمل في جسر السويس
فيه كوبري المطاري هيقابلك بعد كيلو واحد بس متطلعوش لو طلعته هتدخل شارع جوزيف تيتو والمطار والكلية الحربية خليك تحت الكوبري وكمل هتمر على التالي
شارع جمال عبد الناصر والحرفيين
المنطقة الصناعية في جسر السويس
تقسيم عمر بن الخطاب
مدينة قباء
شارع الاربعين
حديقة بدر

اوقات الطريق بيكون واقف شوية لكنها وقفة اتوبيس او ميكروباص بيحمل او حاجة عرضية والطريق بيمشي وقت الذروة خصوصا من 3 ل 5 الطريق بيكون تقيل شوية في جسر السويس بسبب اتوبيسات المدارس وخروج الموظفين

من عند حديقة بدر تسأل بقى لاني معرفش المكان بالضبط فين


لو حابب تمشي اسرع شوية لكن فيه ايام متضمنش لو فيه تشريف ماشيه في صلاح سالم الدنيا بتقف كلها وبتقفل لغااااااااااايه الكوبري
ممكن تطلع كوبري المطار وتنزل هتلاقي حمدي لادا على يمينك وبعدين سيراميك السلام ووبنزينه موبينيل هتفضل ماشي لغاية شركة بتروجيت بعدها موقع مباني (معرفش خلص والا لسه ) وبعده مدخل شارع واخد نص حرف اس S تقريبا شارع طه حسين تدخل فيه وتمشي لاخره وتاخد يمين تمشي 400 متر هتلاقي حديقة بدر في وشك تدخل يمين اول يوترن وترجع تشوف انت رايح فين

ملحوظة
انا افضل انك تمشي في جسر السويس افضل حتى لو زحمة والطريق وقف شوية تتحمل افضل ما تدخل وتلف وتوه وتقعد تسأل لان انت في جسر السويس هتمشي شارع واحد بس وتفضل ماشي لما تلاقي حديقة بدر على يمينك

توصل بالسلامة

sad-bird
04-12-2010, 02:15 PM
انا حاسس انك ساكن في الحلمة وبتشتغلني يا محمد يا علي بانك ساكن في الزقازيق

ياعم احمد انا من الزقازيق ومكان شغلي اتغير كذا مرة واخر شغل ليا واللي انا الفمروض على قوته حتى الأن في طريق اسكندرية الصحرواي
ولطبيعة الدراسة والشغل في مرحلة ما قعدت تقريبا 3 سنين في الحلمية عند مدرسة ابن خلدون وانا قلتلك الكلام ده قبل كده
وبعدين انا من محبي المشي على رجليهم ( ايام زمان طبعا دلوقتي بكسل انزل من البيت اصلا ) وبحب اعرف تفاصيل الاماكن ومين بيودي على فين
وطبعا لاحظت المعلومة اللي قالها عم خالد زي ما قالك ان اغلب الشوارع ماشي موازية لبعض فانت بتدخل في شارع وعارف انه ماشي موازي للتاني ولكن اروق
لكن الخوف لتوصل في النهاية لطريق مسدود او تلاقي اخر الشارع كوبري بيطلع بيك يرميك في مكان تاني خالص غير اللي انت عاوزه

ده غير اني محب للسفر والتعرف على الطرق زي خالد خليفة كده مع فارق الخبرة والظروف اللي تشجع على السفر والعمر طبعا لو اني كان ممكن امشي اكتر منه بس انا اللي كسلت ومفيش طريق امشي فيه من غير ما اخد بالي اتدجاهاتها والبلاد اللي بيمر عليها وهكذا
عرفت انا بجيب معلوماتي منين
مش زيك واقفلي من البلكونة تتفرج على المترو وتنزل تخانق في الناس علشان ركنه العربية

خالدخليفة
04-12-2010, 02:36 PM
علي فكرة الطريق ده روحته قبل كدا بيعمل معايا 22 كيلو رايح بس

لكن الطريق بتاع الحلمية بيعمل معايا 9 كيلو

وانتا عارف يا عمنا انا راجل غلبان بحط بنزين 92 مش غاز


وثانيا انتا كدا قولتلي ازاي اروح من اروق طريق

طب الرجوع بقا ارجع ازاي هيه ديه المشكله الاكبر بالنسبالي



مفيش فايدة تفكيرك زى تفكير كتير من المصريين
يابنى.... يااااااااااااااحبيبى
22 كيلو فى طريق ماشى = 5 كيلو فى طريق واقف وقفة سودة =نفس القيمة تقريبا فى البنزين مع تقليل استهلاك العربية
يعنى لما تاخدها فى تلت ساعة مش احسن م تاخدها فى ساعة
ثم الطريق ده مستحيل يعمل 22 كيلو الا اذا كان عداد عربيتك مكملش تعليمه زى حالاتك
ثم دى قاعدة معروفة ان فى الطرق الطوالى العربية تستهلك بنزين اقل من الطرق المتوقـفة
ثم انت بذمتك ياشيخ من عين شمس تاخد شارع الترعة لحد كوبرى الحلمية ثم تطلع كوبرى الحلمية وتفضل ماشى لحد السبع عمارات الصبح
مرورا بميدان الحليمة ثم ميدان ابن الحكم ثم التجنيد ثم المحكمة ثم ميدان هارون ثم سفير ثم ميدان الجلاء ثم السبع عمارات؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ده جنااااااااااااان
انا ياللى من الحلمية لو عندى مشوار الصبح فى مدينة نصر بركن عربيتى واتشعبط فى مترو مصر الجديدة لان السكة الحديد هى الوحيدة السالكة الصبح

وطبعا ترجع زى م روحت هيا هيا ياحدق


ثم تعالى هنا

انت ومحمد على ماسكينهالى .... عربيتك غاز......عربيتك غاز......عربيتك غاز ......عربيتك غاز
هو الغاز شتيمة واللا ايه ؟؟؟؟؟؟


طب انا على الأقل محدش قال لى الشيخ منصور يااسطى؟؟؟؟ واصر انه يقاولنى
هههههههههههههههههههههه

sad-bird
04-12-2010, 02:43 PM
ثم تعالى هنا

انت ومحمد على ماسكينهالى .... عربيتك غاز......عربيتك غاز......عربيتك غاز ......عربيتك غاز
هو الغاز شتيمة واللا ايه ؟؟؟؟؟؟

طب انا على الأقل محدش قال لى الشيخ منصور يااسطى؟؟؟؟ واصر انه يقاولنى
هههههههههههههههههههههه


انا مبتريقش على الغاز بالعكس انا لو معايا عربية دلوقتي كنت حولتها غاز
لكن انا لما كنت بشرح الطريق وبقول الخدمات اللي عليه بقول الي معاه عربية غاز ومحتاج يمون يبقى هيعمل ايه ولانك اقرب مثال ليا فكنت بضرب بيك المثل ( ولله المثل الأعلى ) مش اكتر من كده مش بتريق
عيب عليك خلي الكلام ده لاحمد انت عارفني

خالدخليفة
04-12-2010, 02:56 PM
اموت واعرف اهرب ازاي من التجنيد وحلمية الزيتون


لو وصلت كوبري التجنيد في جسر السويس ادخل يمين كأنك رايح اللف مسكن اول يوترن تلف وترجع وتدخل من عند عمو حسني او الشارع اللي بعده من وسط مساكن الحلمية هتلاقي الشوارع كلها منفده علىبعضها




يابنى بيقول لك أموت واعرف ............. كنت سيبه يموت ويريحنا

ههههههههههههههههههههههههههه

بالمناسبة انا فى موضوعٍ دهاليز القاهرة (1 ) قلت مامعناه
ان بشرح طرق الهروب من الزحام
انطلاقا من مبدأ
امشى سنة ولاتخطى قناة
اما ان كنت من انصار عدم اللف فلاتقرأ هذا الكلام
ودلوقت بضيف اضافة صغيرة
طبيعى جدا انك فى الهروب هتاخد مسافة اطول لكن بتوفر وقت وبنزين واستهلاك عربية
لو مبتحبش تلف يبقى تقف فى الطابور

خالدخليفة
05-12-2010, 06:14 AM
طب الرجوع بقا ارجع ازاي هيه ديه المشكله الاكبر بالنسبالي


اانا برجع من مكرم وبنزل من تحت كوبري السبع عماير وباخد شارع الثوره لحد روكسي وبهرب من القوربه علي طريق المحكمه وباخد اول يوتيرن وباطلع علي طريق سنترال مصر الجديدة وبدخل اكتر حته بتخنقني في حياتي وهي التجنيد وحلمية الزيتون

اموت واعرف اهرب ازاي من التجنيد وحلمية الزيتون


منك للى قتلت جوزها ياشيخ
انت بتنقى الزحمة وتخش فيها برجليك
فاكر لما كنا رايحين نقابل محمد على وانا سبقتك والريس كان معدى تقريبا وسيادتك اتزنقت وانا دخلت فى الدهاليز ووصلت بدرى؟؟؟؟؟؟
نقول لك تعمل ايه؟؟؟
طالما انت فى مكرم امشى لحد م توصل رابعة العدوية وكمل لحد قاعة المؤتمرات ادخل يمين وطوالى لحد م تطلع كوبرى الفنجرى انزل منه وامشى هيقابلك الكوبرى بتاع كوبرى القبة اطلعه وانزل من اول مخرج يمين ثم يمين تانى ستجد القصر الجمهورى على شمالك ومحطة مترو كوبرى القبة امامك ادخل شمال مع القصر الجمهورى حتى تصل كوبرى سراى القبة
ادخل من تحت الكوبرى ثم شمال مع القصر الجمهورى وعينك فى المراية على اللى نازل من فوق الكوبرى
اول يمين يقابلك على ناصيته راجل فارش فى الشارع بيعمل تمر هندى ادخل فيه (فى الشارع اللى على اليمين مش فى الراجل بتاع التمر هندى وتموته وتيجى تقول سلطتك عليه )
امشى على طوووووول هتلاقى مسجد على اليمين وبعده ساحة رياضية خليك ماشى حتى آخر سور الساحة ثم اكسر يمين مع سور الساحة حتى آخره ثم شمال هيقابلك تقاطع ضيق
عديه
ثم تقاطع تانى كبير شوية
عديه
ادخل فى الشارع الضيق الذى أمامك تانى يمين فى الشارع ادخل فيه
اول تقاطع
سيبه
تانى تقاطع هو ترعة الجبل
عديه
تالت تقاطع شارعنا (شارع المسيرى )
عديه
رابع تقاطع سور المترو
شمال مع السور حتى عين شمس مرورا بمحطات الحلمية والمطرية ثم عين شمس
و فى عز المعجنة
الطريق ده مياخدش نص ساعة لحد بيتكم بالكتير
لانى عارف أن سواقتك مملة
وممكن تعديل صغير
هتمشى من مكرم حتى ترى سينما طيبة على شمالك بطريق النصر ادخل يمين فى الشارع الذى أمامها وهو آخر يمين قبل ميدان رابعة العدوية
امشى على طووووووووووووووول لايمين ولاشمال
هتلاقى كلية البنات على يمينك هناك يوتيرن امام باب الكلية على الشمال لف وارجع ثم اول يمين شارع ضيق امشى فيه لحد آخره ثم يمين فى شارع اضيق منه امشى فيه حتى آخره ثم يسارا حتى آخره لتجد نفسك فى وشك أبو غالى من الناحية التانية ادخل يمين ثم شمال فى اليوتيرن
عدى فوق نفق العروبة
سيصبح القصر الجمهورى على يمينك
اقرا الفاتحة
وكمل حتى الخليفة المأمون ثم كمل على طوووووووول فى شارع الشيخ ابو النور لتجد نفسك عند أشارة روكسى ( تقاطع جسر السويس مع شارع القبة / مش ميدان روكسى )عند حلوانى لابالما اكسر....يمين فى آخر الشارع
كده دخلت جسر السويس ثم يسارا مع الصينية( الأشارة ) واتجه الى كوبرى سراى القبة
ثم اطلع كوبرى سراى القبة ولما تنزل منه متدخلش شارع الترعة اكسر شمال لحد بتاع التمر هندى أياه خش يمين من عنده
والباقى انا كتبته فوق فى نفس المشاركة دى

آديك عرفت تهرب ازاى من الحلمية والتجنيد ولو مشيت على الوصفة دى سنة هتنسى شكل الحلمية والتجنيد

واذا كان طريقك ده عاجبك اوى ومش ناوى تغيره
خد الطريق ده
عند سنترال مصر الجديدة عندك يوتيرن تحت الكوبرى
خش فيه وارجع مع الكوبرى كأنك رايح على العباسية ثم اول يمين بعد منزل الكوبرى حتى آخره
هتلاقى نفسك فى شارع اسمه الأصبغ ادخل فى الشارع اللى ف وشك ستصل شارع طومانباى ادخل يمين فى طومانباى ثم اخر شمال فى طومانباى اما م الجزار وامشى فيه حتى اخره ستقابل شارع سليم هيبقى بينك وبين ميدان الحلمية حوالى 30 متر اوعى شيطان يغزك (يوزك) وتدخل عكس تدخل شمال فى شارع سليم كأنك رايح على الزيتون
هنا بقى ليك طريقين
اما تدخل اول شمال حتى أخره ستجد سور المترو وممكن تمشيها بجوار سور المترو حتى كوبرى على باشا اللا لا قبل محطة المترو وتعدى تحت الكوبرى ثم تكسر يمين مع الكوبرى لتجد نفسك متجها الى ميدان النعام
والباقى انت عارفه طبعا
او
تكمل فى شارع سليم لحد كوبرى سنان هتطلعه هينزلك عند محطة مترو الزيتون تنزل من الكوبرى وتدخل يمين ثم اول تقاطع يمين وشمال يقابلك تدخل فيه يمين
برضه ده شارعنا
والباقى انت عارفه
هربتك 500 تهريبة من الحلمية والتجنيد
يارب تموت وتريحنى بعد م عرفت تهرب ازاى منهم
ههههههههههههههههههههههههه

ادم الجندي
10-12-2010, 12:01 AM
السلام عليكم
انا سوهاجي وعايش في السويس واول مرة اسافر بعربيتي للبلد وعايز اعرف اروح سوهاج ازاي وياريت يكون شرح وافي لجميع الطرق الممكنة للاستفادة لي وللجميع
وتحياتي للقائمين علي هذا المنتدي العظيم .

ياسرأبوعاصي
10-12-2010, 12:10 AM
ههههههههههههههههههههه الكلام ده مكانه الموضوع ده (المسافات بين القاهرة والاسكندرية الى باقى المحافظات)
http://www.masrmotors.com/vb/showthread.php?p=301475#post301475
لان هنا وصف للطرق وحالتها وخدماتها وعايزين منك وصف طرق سينا وحالتها وخدماتها لانى مدخلتهاش
والغريبة انى لقيتك معلق نفس التعليق هناك بدون زيادة او نقص اى حرف
وهو مكانه الصحيح
سمحنى يا كبير بدون ضحكاتك الممتدة ...أسعد الله أيامك ..أولا أنا كتبت عن مسافات سيناء هنا الأول وبعدة كدة لقيت الموضوع التاني فحبيت اضع نفس الرد وشكرا

ياسرأبوعاصي
10-12-2010, 12:13 AM
أحب أضيف عن سيناء الشمالية
من رفح إلى العريش إلى الاسماعيلية طريق منفرد رايح وطريق منفرد جاي ولا توجد به إى مناطق مظلمة الطريق مضاء بشكل دائم وأقل نسب حوادث فيه لأنها أرضي واسعة ومساحات ممتدة ...

sad-bird
10-12-2010, 11:40 AM
أحب أضيف عن سيناء الشمالية
من رفح إلى العريش إلى الاسماعيلية طريق منفرد رايح وطريق منفرد جاي ولا توجد به إى مناطق مظلمة الطريق مضاء بشكل دائم وأقل نسب حوادث فيه لأنها أرضي واسعة ومساحات ممتدة ...



طيب كمل جميلك بقى وأوصف سيناء كلها واحوالها معانا في ادب الرحلات
http://www.masrmotors.com/vb/showthread.php?t=19177


واوصف لنا هنا طرقها الشمالي والجنوبي والاوسط لاني معرفتش اوصفهم كويس

sad-bird
10-12-2010, 12:04 PM
السلام عليكم
انا سوهاجي وعايش في السويس واول مرة اسافر بعربيتي للبلد وعايز اعرف اروح سوهاج ازاي وياريت يكون شرح وافي لجميع الطرق الممكنة للاستفادة لي وللجميع
وتحياتي للقائمين علي هذا المنتدي العظيم .

وعليكم السلام
فيه طريقين
اأول انك تاخد طريق السويس القاهرة لغايه لما توصل الدائرى تعدي من تحت الكوبري وتاخد او يوترن وتلف وتدخل مطلع مدنية نصر المعادي وتفضل ماشي لما تلاقي مخرج المعادي الاتوستراد تنزله وتمشي في اتجاه حلوان / 15 مايو وتفضل ماشي ولا يمين ولا شمال لغايه لما توصل طريق الصف ومن هناك تدخل شمال وتستمر جنوبا
او انك تكمل على الدائري وتنزل نزله الهرم ومنها تاخد الطريق الصحراوي ( راجع مشاركة أستاذ خالد في الذهاب للصعيد )
الخدمات على الطريق
متوفر بنزينة كل مسافة معقولة لكن من الافضل انك تتحرك ومعاك او اغلب احتياجاتك من بنزينومياه وطعام حتى لا تتعرض لمواقف طارئة خاصة انها اول مرة للسفر عبر بالسيارة



الطريق الثاني
من السويس تاخد طريق الغردقة ومن الغردقة فيه طريق بيروح قنا مباشرة تمشي في الطريق لقنا وومن هناك تشوف اتاجهاتك ازاي ( انت من اهل الصعيد وعارف تتحرك ازاي من هناك لسوهاج)
الخدمات على الطريق ده ( راجع موضوع زيارة الغردقة للاستاذ حازم شاهين ) ومن الغردقة تأخذ كل احتياجاتك من بنزين ومياه وطعام


اعتقد ان الطريق الثاني ( السويس / الغردقة / قنا / سوهاج ) اقرب لك واعتقد انه سهل ان تعرف مواعيد تحرك سيارات شركة الوجة القبلي للسياحة وهي قادمة من الشرم ودهب وحتى قنا او اسوان واخرى من الغردقة وحتى قنا او اسوان
ويمكنك ايضا ان تتحرك خلف احد الاتوبيسات حتى تأمن شر الطريق ( اي نعم السرعة هتكون مرتبطة بسرعة الاتوبيس لكن بما انها المرة الأولى وتبحث عن ونس للطريق ودعم في حالة الحاجة فمن الافضل ان تقوم بذلك حتى تعتاد الطريق)


وفي انتظار زيارتك للبلد والتقرير عن وصف حالة الطريق هنا ليستفيد منك الأخرون

تروح وترجع بالسلامة

mida012
13-12-2010, 11:56 AM
اللة ينور فكر بناء

m_elmasoudy
17-12-2010, 04:32 PM
موضوع متميز جدااً .. إلى المزيد ....

خالدخليفة
31-12-2010, 08:27 PM
هنا بقى ليك طريقين
اما تدخل اول شمال حتى أخره ستجد سور المترو وممكن تمشيها بجوار سور المترو حتى كوبرى على باشا اللا لا قبل محطة المترو وتعدى تحت الكوبرى ثم تكسر يمين مع الكوبرى لتجد نفسك متجها الى ميدان النعام
والباقى انت عارفه طبعا

الكلمة الكتوبة بخط احمر كبير خطأ وصحتها

اول يمين

driv3r
12-01-2011, 07:43 PM
اغرب حاجه قابلتنى واصعب عمليه سفر حصلت فى تاريخ عمرى كانت رحله من المنصوره لمرسى علم الرحله دى خدت 19 ساعه فى السوبر جيت وكان فى ساعتين صيانه فى الاتوبيس وكان يوم جاااااااااااااااااااز الغريب بقى فى الموضوع ان طول الساعات دى كلها والمشى ده الا اننا موقفناش ولا فى كمين ولا شوفت كماين خالص

miam0502788391
13-01-2011, 04:33 PM
اغرب حاجه قابلتنى واصعب عمليه سفر حصلت فى تاريخ عمرى كانت رحله من المنصوره لمرسى علم الرحله دى خدت 19 ساعه فى السوبر جيت وكان فى ساعتين صيانه فى الاتوبيس وكان يوم جاااااااااااااااااااز الغريب بقى فى الموضوع ان طول الساعات دى كلها والمشى ده الا اننا موقفناش ولا فى كمين ولا شوفت كماين خالص



يا ريت حضرتك تحكى مسار الرحلة والطرق اللى سلكتها

خالدخليفة
13-01-2011, 07:19 PM
يا ريت حضرتك تحكى مسار الرحلة والطرق اللى سلكتها
بيقول لك مشافش ولاكمين وده معناه انه كان نااااااايم او ماهتمش انه يتابع الطريق وخصوصا ان السوبر جيت عالى نسبيا وواضح ان مكانش قاعد جنب الشباك واهتم بالفيلم اللى كان شغال فى الفيديو

mostafa hegazy
20-09-2012, 04:12 PM
اولا السلام عليكم جميعا

mostafa hegazy
20-09-2012, 04:13 PM
السلام عليكم
انا عاوز اروح سوهاج بالعربيه
وعاوز اعرف الطريق من داخل القاهره الى الصريق الصحراوى او طريق الجيش الجديد