المساعد الشخصي الرقمي

مشاهدة النسخة كاملة : سرعات الفتيس


tham1010
03-09-2010, 05:05 PM
يا جماعة أنا لسة مش بعرف أسوق وعاوز أعرف حاجة لو سمحت منكم.

الفتيس بتاع العربية اللى أشترتها أمبارح فيه خمس سرعات للأمام بالإضافة للمرشدير للخلف. عاوز أعرف امته أغير من الأول للتانى ومن التانى للثالث وهكذا. يعنى لما تكون السرعة على كام مثلا امشى على الأول ولما تبقى كام أخد الثانى؟

هل ممكن أطلع على الثانى على طول أول ما أدورر العربية. ممكن أنتقل من الأول للثالث بدون المرور على الثانى. ولا لزم أخدهم بالتسلسل وأنزلهم بالتسلسل برضوا لو هوقف العربية؟

هل أثناء التغير بالفتيس أكون بدوس بنزين برضوا ولا برفع رجلى خالص من البنزين. ولا أخفف الضغط بس ولكن ابقى على البنزين برضوا؟

سمعت عن حاجة اسمها حرق الغيرات وإن دة بيأثر على زيت الماتور ويحرقة فما معنى حرق الغيرات؟؟؟


معلش طولت عليكم ولكن محتاج خبرتكم

sad-bird
03-09-2010, 05:13 PM
نوع العربية ايه

sad-bird
03-09-2010, 05:27 PM
يا جماعة أنا لسة مش بعرف أسوق وعاوز أعرف حاجة لو سمحت منكم.

الفتيس بتاع العربية اللى أشترتها أمبارح فيه خمس سرعات للأمام بالإضافة للمرشدير للخلف. عاوز أعرف امته أغير من الأول للتانى ومن التانى للثالث وهكذا. يعنى لما تكون السرعة على كام مثلا امشى على الأول ولما تبقى كام أخد الثانى؟

لو العربية فيها ار بي ام بتعرف من الكتالوج بتاعها او من اللي باعهالك او تدور على اققصي عزم ليها بيكون عند كام وفيه موضوع هنا عن القيادة الريضاية فيه كل الكلام ده لكن طبعا اختلفا الار بي ام من عربية للتانية علشان كده انا سألتك نوع العربية ايه





هل ممكن أطلع على الثانى على طول أول ما أدورر العربية. ممكن أنتقل من الأول للثالث بدون المرور على الثانى. ولا لزم أخدهم بالتسلسل وأنزلهم بالتسلسل برضوا لو هوقف العربية؟

الغيارات في الفتيس لكل غيرا وظيفة
الأول وظيفته انه يعمل عزم كبير علشان يبدأ يحرك العربية
التاي برضة عزمة كبير لكن مش زي الأول
التالت والرابع والخامس كلهم بيعتمدوا على الهورس باور ودول علانش لما العربية خلاص اتحركت وبقيت على الطريق تبدأ تجري بيها

وانت بتنقل لازم الترتيب من الأول ثم الثاني ثم الثالث وهكذا
لو نقل من الاول للتالت العربية هتفصل منك
لو نزلت من التالت للأول والعربية ماشي بتعمل Engine Breack وده مبتعملوش غير في حالة انك ماشي ولقيت مش معاك فرامل وده لو اتكرر كتير غلط على الماتور والهدف منه انك تقلل تسارع العربية علشان لا قدر الله لو فيه حاجة جايه قدامك في الحالة دي بدل ما تخبطها على سعرة 100 لا بتخبطها على سرعة 30
وربنا ما يحوجك للموضوع ده ويستر طريقك

لكن فيه بعض المواقف انت بتحتاج فيها تنزل من سرعة عالية لسعرة منخفضة زي انت ماشي على الرابع ولقيت مطب بيقرب عليك بسرعة بتمسك دبرياج وفرامل واحده واحده علشان مش تخمس بالعربية وبتمور العربية وبعدين بتاخد الغيرا اللي متوافق مع السرعة اللي انت ماشي بيها اذا كان الأول أو التاني وده مش فيه خطر على الماتور

هل أثناء التغير بالفتيس أكون بدوس بنزين برضوا ولا برفع رجلى خالص من البنزين. ولا أخفف الضغط بس ولكن ابقى على البنزين برضوا؟

لما يتاخد الغيار بتسيب سنة بنزين علشان تحافظ على الار بي ام بتاعك لكن مش بتدوس قوي وفيه عربيات ممكن تسي البنزين خالص لو الاكسلاتير عالي شوية مش بتحتاج انك تفضل دايس وبعد كده بتدوس بنزين وانت بتسيب الدبرياج بالتدريج توازن بين الاتنين

سمعت عن حاجة اسمها حرق الغيرات وإن دة بيأثر على زيت الماتور ويحرقة فما معنى حرق الغيرات؟؟؟

لا اعلم لكن تقريبا ده مرتبط بالموضوع بتاع الغيرا لاعكسي اللي قولته لو الفرامل سايبه


معلش طولت عليكم ولكن محتاج خبرتكم

تحت امرك يا باشا وهخلي انجكشن يجي يقولك احسن مني هو معلوماته افضل مني كتير

tham1010
03-09-2010, 05:35 PM
العربية هيونداى ماتركس 2001 إستيراد كورى الصنع

tham1010
03-09-2010, 05:51 PM
أنا متشكر جدا يا ساد بيرد. يعنى الحكاية بعدد لفات الماتور (أر بى أم) فى العربية الماتركس فى عداد لدة بس مش كنت عارف بتاع أيه مكتوب علية 1 - 2 -3 4 - 5 -6 والصورة موجود تحت للشكل التابلوة

Injection
03-09-2010, 07:24 PM
زى ما دكتور محمد (ساد بيرد) قال بالظبط:-

1- ألاول كل وظيفته أنك تخلى العربية تتحرك من الثبات بيه, لأنه بيديك عزم عالى, وبتستخدمه فى التحرك على المطالع برضه, وأخره فى السرعة خالص عند 50 كم ويفضل النقل الى التانى عند 30 أو20 كم.

2- التانى بيديك عزم كافى أنك تحرك العربية من السرعات القليلة زى 20 و 30 وهكذا, وبيستخدم فى القيادة داخل المدينة وسط الزحمة,لأن الأول وظيفته تحريك العربية من الثبات وعلى المطالع ومبترجعلوش الا فى حالة ثبات العربية تماما أو أقترابها من الثبات وأخرالتانى فى السرعة تماما 80 ويفضل النقل للتالت عند 40 أو 50.

3- الثالث بيستخدم كنقلة عادية بعد التانى عند الرغبة فى زيادة السرعة, وأخره تماما 120 ويفضل النقل عند 80 أو 90.

4- الرابع برضه لزيادة السرعة, وأخره تماما 160 كم ويفضل النقل عند 140.

5- الخامس مفتوح حتى السرعة القصوى للعربية ويفضل الثبات عليه عند عدد لفات قليل زى 3 .

فى العدادات:-

1- أقصى اليمين عداد البنزين, ويفضل أنك تفول لما مستوى البنزين يوصل للنص أو على الأكثر الربع لأن التنك بتاع البنزين بيبقى فيه شوائب, وعند ترك التانك ليفضى ممكن الشوائب ديه تسد دورة الوقود والرشاشات.

2- الشاشة الموجودة بجانبه كمبيوتر رحلات لأظهار معلومات عن المسافة المقطوعة والمسافة الباقية حتى أنتهاء البنزين وهكذا.

3- العداد المتوسط عداد السرعة طبعا.

4- العداد التالى(من 1 الى 7 ) عداد لفات الموتور أو الأربى أم Rounds Per Minute

5- عداد الحرارة, وده المفروض ميزيدش عن النص ولو زاد بطل العربية فورا وأكشف على دورة المياه لأنه خطر جدا تمشى بالعربية فى حالة سخونة الموتور عن الحد.

بخصوص عدد لفات الموتور, العادى أنك تنقل الأول عند 3.5 أو 4 , وباقى الغيارات عند 3 مثلا, فى حالة أنك على التالت والسرعة قليلة 40 مثلا العربية هتبرجل وعدد لفات الموتور هيقل ل 1.5 مثلا, كده لازم تنزل للتانى علشان العربية متبطلش وتقدر تحصل على تسارع كويس, وخلى بالك لو الأربى أم نزل عن 0.75 أو 1 فى أى غيار وأنت مدوستش بنزين أو نزلت لغيار أقل العربية هتبطل.

وعدد اللفات مش 1و 2 طبعا, هتلاقى تحت على العداد مكتوب 1000* يعنى عدد اللفات الحقيقى 1000 و 2000و 3000 و4000 و5000 و6000 لفة فى الدقيقة.

فيه ناس بتنقل عند عدد لفات معينة, وناس بتنقل عند سرعة معينة وقد تم ذكر الأثنين, ومتخليش العربية تمشى على عدد لفات عالى 5 أو 6 لمدة طويلة علشان خطر على الموتور.

المهم خلى بالك لتنقل غلط وخاصة أثناء النقل لتحت من الغيار 4 الى 3 مثلا علشان متنقلش غلط الى غيار أقل زى 2 وتلاقى العربية بدل ماكانت ماشية على 80 فى ثانية بقت ماشية على 40 والى وراك مش هيلحق يفرمل وطاخ والحركة دى مستفزة جدا للى وراك وغلط جدا على الموتور والفتيس وزى ما أستاذ محمد قال بتستخدم بقصد فى حالة عدم وجود فرامل للتقليل من سرعة العربية.

وبرضه لما تنقل لتحت أو لفوق لازم تدوس بنزين شوية وخاصة أثناء النقل لتحت علشان تماثل سرعة الموتور (عدد لفاته) بسرعة دوران الغيار اللى أنت رايحله.

ونصيحة ياريت تنزل تتدرب بالعربية بالليل( على الساعة 4 أو 5 الفجر), الطرق بتبقى فاضية خالص وهتتعود على السواقة والنقلات وهتفرق معاك جامد قوى, أنا عارف أن الكلام اللى فوق معقد حبتين بس بعد ماتتمشى بالعربية فترة هتلاقى الحاجات ديه بتحصل تلقائيا وبتعملها من نفسك, بس فعلا لازم تنزل بالعربية بالليل, ولو ماسقوتش قبل كده خالص يفضل تاخد معاك حد بيعرف يسوق علشان يساعدك ويكون معاك.

حرق الغيارات ده هو أنك بدل ماتنقل الغيار على عدد لفات 3 أو 4 بالكتير وتمشى بالموتور مرتاح, بتدوس جامد على البنزين وتوصل عدد اللفات الى 5 أو 6 قبل ماتنقل النقلة اللى بعدها, ده بيفيدك فى الشد وسباقات الشوارع أنك بتحصل على كل عزم و هورس باور الموتور وتحصل على تسارع قوى جدا وطبعا بيزود أستهلاك البنزين, بس بيبقى خطر على الموتور فى حالة أنك بتعمل كده كتير عمال على بطال وخاصة فى مواتير عربياتنا الكورى الرهيفة.

وربنا يباركلك فى العربية, ومتحتاجش ميكانيكى أو سمكرى أبدا444546, وأنا متابع لأى أستفسار أو مساعدهROSE4U.

master.formats
03-09-2010, 07:51 PM
علشان تتخيل الموضوع ماشي ازاي...
تعال على عربية واقفة في شارع مستوي (وفاضي) وفك الفرامل وجرب تدفعها (تزقها) لمسافة..
حتلاحظ أن تحريك السيارة من السكون يتطلب منك مجهود كبير.. ثم يقل المجهود كلما اكتسبت السيارة طاقة حركية الى أن يصبح تحريكها سهل جداً تقريباً بدون مجهود عندها تستطيع أن تزيد سرعتها بسهولة...

التروس في صندوق تروس السيارة أقطارها متدرجة لنفس الوظيفة أقل الأقطار الغيار الأول وهو يحول طاقة المحرك كلها الى عزم بهدف توفير الدفعة الأولى للسيارة... وبمجرد تحرك السيارة تنتهي وظيفته لكن لو استمريت عليه شوية يسمى هذا (حرق أو قرص) على الغيار وهو اسلوب قيادة عنيف على السيارة لا أنصحك به -خاصة أنك مبتديء قيادة- وعندما تزداد خبرتك ستفهم تلقائياً ما الذي تحصل عليه من الحرق..
والغيار الثاني هدفه دفع السيارة -لكن من وضع الحركة البطيئة وليس السكون- الى وضع الحركة و بدء اكتساب طاقة حركية كافية لبدء التسارع...
عندما يرتفع الار بي ام أو تسمع صوت السيارة علي تنقل للثالث.. وهذا يعطي تسارع للسيارة ويكسبها طاقة حركية أعلى... ثم الرابع وهو أكبر الأقطار -أو الخامس في بعض السيارات- وهو يحول طاقة المحرك كلها الى تسارع معتمداً على الطاقة الحركية التي اكتسبتها السيارة من السرعات الأقل..
نظرياً لو حالة الموتور جيدة يمكن بدء الحركة على الغيار الثاني -أو حتى أعلى- لكن هذا مجهود كبير على المحرك (كأنك مطلوب منك أن تدفع سيارة من وضع السكون الى وضع الجري مرة واحدة) وهذا يحتاج حساسية معينة للرجل على الدبرياج لا تتوفر الا بعد خبرة كافية و قد تضطر لمثل هذا في حالات طواريء وأعطال معينة...

tham1010
03-09-2010, 08:26 PM
إنتم فعلا رائعون واللهى درس يساوى كتير. أنا سعيد أنى جاءت لهذا المنتدى بقالى كتير عمال أدور على النت على إجابة ولم أجد ما يفيد. وفى كام دقيقة حصلت على كم هائل من المعلومات ربنا يباركلكم \ شكر خاص لإنجيكشن للتوضيح المفصل....

tham1010
03-09-2010, 08:41 PM
سؤال كمان لو سمحتم. العربية زى ما قلت لكم هيونداى ماتركس 2001( لافيتا) صناعة كورى إستراد من المنطقة الحرة. وعاملة 158 ألف كيلوا وشغالة بنظام 12 صباب على 2 كاما وفيها جميع الكمليات بما فيها ABS و TCS. العربية كويسة فى كل حاجة ماعد شوية تجريحات والجنوط الأسبور مستهلكة وممسوحة وفى شوية إستفسارات كمان

1- هل الماتور مع 158 الف كيلوا فى 9 سنين يكون تعب يعنى حالته تبقى كام فى الماية. ممكن نحكم علية من عدد الكيلوات. الميكانيكى اللى جبته علشان يكشف عليها بص على الشكمان ودست بنزين على الأخر مش لقى أى دخان طالع من الشكمان فقال كويس. وسمع صوته وقال كويس بس مش قال حالته تبقى كام فى الماية وهو عامل الكيلوات دى كلها. هى 158 الف كيلوا تبقى شوية صغير بالنسبة للعربيات؟

لو حبيت أدهن العربية دى فى المستقبل هل دة ممكن فى مصر يعنى هى فستقى ميتلك واللى أعرفهم فى الدهان بيستخدموا الطرق البلدى لانى مقيم فى محافظة من الوجهه البحرى فمش عارف هل ممكن أحصل على نفس اللون وميتالك برضوا وترجع زى الجديدة. ولا هذا مستحيل أن يكون الدهان والدوكوا مثل الأصلى. وهذا ممكن يكلف كام؟؟ الدهان البلدى عندنا فى حدود 700 جنية

ما هى السرعة القصوى التى يجب أن أسير عليها لكى أتحكم فيها فى السيارة داخل المدينة كمبتدأ فى السواقة؟؟؟؟

أنا متشكر ليكم كلكم على وقتكم...

Injection
03-09-2010, 08:58 PM
هرد على قدر معرفتى:-

1- مفيش موتور فى الدنيا حالته 100% حتى لو جديد, مواتير العربيات العادية بتاعتنا تعتبر كويسة جدا لو 80% بس.

اللى الميكانيكى عمله كشف أقل مايقال عليه بدائى, سمع صوت العربية علشان يشوف الكرونة والدينامو وعمود الكامة ألخ سلام ولا لأ وبص على الشكمان علشان يشوف العربية بتحرق زيت ولا لأ وبتحرق بنزين كويس ولا لأ, هو كده غطى الحاجات الأساسية بس كان المفروض يكشف على البوجيهات ويجرب العربية ويشوف حالة نظام الباور والتوجيه ونظام الفرامل ومنظومة الكهرباء,وديه للأسف حاجات مهمة جدا أغلب اللى بيشتروا بينسوها.

الكشف اللى أنصح بيه هو أختبار كبس الموتور فى بنزينة نضيفة, ده هيقولك على حالة الموتور وكام فى الميه.

ومتنساش كمان تروح تغير سير كاتينة وبلية كاتينة (لازم أصلى) وزيت وفلتر زيت وفلاتر البنزين والهواء وتيل فرامل(دول اللى فاكرهم) دول لازم يتغيروا عند شراء عربية مستعملة, أسأل الميكانيكى وهو هيقولك تغير أيه.

والعبرة مش بعداد الكيلو لأنه سهل يتلعب فيه ومش بيوضح حالة العربية, العبرة بحالة العربية من جوه وبره وهل صاحبها كان بيهتم بيها ولا لأ وبيعملها صياناتها الدورية بأنتظام ولا لأ, وباين من كلام حضرتك أن حالتها كويسة جدا.

2- هو مستحيل تحصل على دهان المصنع تانى, بس الدهان الصح بيبقى زيه وأحسن منه فى حالات تانية, والدهان بيأثر فيه 3 حاجات, نوع البوية والصنايعى والفرن وهو أهم حاجة, علشان كده أنصح حضرتك لو حبيت تدهنها تروح الحرفيين ومتستسهلش, ودخلها فرن علشان تاخد الدهان الصح.

بالنسبة لمبتدئ داخل المدينة أنا لا أنصح بتخطى حاجز 60 أطلاقا حتى تتعلم التحكم فى العربية كويس جدا, وعلشان على السرعات العالية زمن رد فعلك بيزيد ومش هتلحق تتصرف, وأنت قدامك كتير تتعلمه قبل ماتمشى بسرعة أكبر, سواء كمبادئ سواقة أو مبادئ السواقة المصرية العجيبة.

ولا قدر الله, فرق حادثة بين سرعة 60 و 100 مثلا مفيش وجه للمقارنة, خاصة أن حوادث المبتدئين حوادث غبية ناتجة عن اللخمة وسوء التصرف,أسأل العبد لله خبير فى الحوادث الغبية:), و60 سرعة أمنة جدا.

master.formats
03-09-2010, 09:42 PM
.................... و60 سرعة أمنة جدا.


مع احترامي.. سرعة 60 ممكن تكون قاتلة...
اختبارات التصادم اللي بتتعمل بتكون على سرعة 60 وشوف البهدلة اللي بتحصل لدمى الاختبار فيها..
ربنا يكفينا و يكفيكم شر الحوادث..

Injection
03-09-2010, 10:20 PM
مع احترامي.. سرعة 60 ممكن تكون قاتلة...
اختبارات التصادم اللي بتتعمل بتكون على سرعة 60 وشوف البهدلة اللي بتحصل لدمى الاختبار فيها..
ربنا يكفينا و يكفيكم شر الحوادث..

يا باشا أختبارات التصادم بتتعمل بره بالميل و60 ميل فى الساعة اللى هى 100 كيلو أو 100 ميل فى الساعة اللى هى 160 كيلو وده ميمنعش من أن 60 كيلو سرعة خطيرة, بس السؤال كان أيه هى السرعة القصوى المناسبة لمبتدئ علشان يمشى فى الشارع, مش أيه هى السرعة المناسبة لمبتدئ علشان يعمل حادثة فى الشارع, ولا أيه:)؟.

وعموما سرعة 60 كأقصى سرعة كويسة جدا ورد الفعل على السرعة دى مناسب لأى طارئ, والفرامل على السرعة دى هتبقى كفائتها عالية جدا خاصة أن العربية فيها abs و tcs.

وأنا أصلا منصحش بالمشى فى الشارع لشخص جديد فى السواقة حرصا على سلامته وسلامة الأخرين, أنا كنت بجاوب أجابة على سؤال محدد.

وبرضه عموما أنا شايف أن السرعات البطيئة هى سبب الحوادث, وخاصة فى مصر لما تلاقى ده بيكسر عليك وده بياخد الشارع بالعرض من أقصى الشمال وهكذا وأغلب الحوادث فى مصر سببها الناس, وعلى السرعات العالية بتزيد أحتمالية موتك فى حادثة لكن أحتمالية حدوث الحادثة بتقل, والعكس وأنت ماشى بالراحة أحتمالية حدوث حادثة بتزيد (نظرا لسواقين التاكسى والميكروباص وعشاق نيد فور سبيد) وأحتمالية الموت أو الأعاقة بتقل.

وأنا زعلان أصلا لأنى طول ما أنا ماشى يا فى حالة تسارع أو فرملة, وبحس أن السرعات العالية بتدينى تحكم أكبر فى العربية وبتقلل أحتكاكى مع الناس.

وأنا أسف لتحويل الموضوع لموضوع سوداوى

tham1010
03-09-2010, 11:09 PM
حضرتك يا إنجكشن أفدتنى كتير خالص وخاصة فى حكاية التغير للزيت والحاجات دى. أنا أخدتها وحطتها تحت البيت وخلاص ومستنى لحد ما أتعلم. هأخدها أغير لها الحاجات دى. أنا مش عارف نوع الزيت اللى أحطة للماتور فى العربية لان مش عارف الراجل الكورى صاحبها كان بيستخدم لها زيت معدنى ولا تخليقى. هحط معدنى وخلاص. كمان مش عارف احط لها البنزين 80 ولا 90 ولا 92. المستورد أعطهانى وفى التنك شوية بنزين.

حكاية الحرفيين مش كنت عارفها خالص. فى المنوفية عندنا مفيش افران للدهان خالص. بيعملوا ببخاخة كدة وبتكلف 700 جنية. لو عملت فى افران فى الحرفيين ممكن تكلفنى كام رشة برة . هل هما اللى هيفوكو العربية كلها حتة حتة ويرشوها كلها ولا يرجعوا يجمعوها تانى؟؟؟ أكيد هتكلف الفات بالطريقة دى...

master.formats
04-09-2010, 12:29 AM
يا باشا أختبارات التصادم بتتعمل بره بالميل و60 ميل فى الساعة اللى هى 100 كيلو أو 100 ميل فى الساعة اللى هى 160 كيلو وده ميمنعش من أن 60 كيلو سرعة خطيرة, بس السؤال كان أيه هى السرعة القصوى المناسبة لمبتدئ علشان يمشى فى الشارع, مش أيه هى السرعة المناسبة لمبتدئ علشان يعمل حادثة فى الشارع, ولا أيه:)؟.

وعموما سرعة 60 كأقصى سرعة كويسة جدا ورد الفعل على السرعة دى مناسب لأى طارئ, والفرامل على السرعة دى هتبقى كفائتها عالية جدا خاصة أن العربية فيها abs و tcs.

وأنا أصلا منصحش بالمشى فى الشارع لشخص جديد فى السواقة حرصا على سلامته وسلامة الأخرين, أنا كنت بجاوب أجابة على سؤال محدد.

وبرضه عموما أنا شايف أن السرعات البطيئة هى سبب الحوادث, وخاصة فى مصر لما تلاقى ده بيكسر عليك وده بياخد الشارع بالعرض من أقصى الشمال وهكذا وأغلب الحوادث فى مصر سببها الناس, وعلى السرعات العالية بتزيد أحتمالية موتك فى حادثة لكن أحتمالية حدوث الحادثة بتقل, والعكس وأنت ماشى بالراحة أحتمالية حدوث حادثة بتزيد (نظرا لسواقين التاكسى والميكروباص وعشاق نيد فور سبيد) وأحتمالية الموت أو الأعاقة بتقل.

وأنا زعلان أصلا لأنى طول ما أنا ماشى يا فى حالة تسارع أو فرملة, وبحس أن السرعات العالية بتدينى تحكم أكبر فى العربية وبتقلل أحتكاكى مع الناس.

وأنا أسف لتحويل الموضوع لموضوع سوداوى

يا باشا أهلا بيك أنا بس بعلق على كلمة "و60 سرعة أمنة جدا." لأنها علمياً غلط..
لكن أنا زيك طبعاً بتخنق من السرعة البطيئة..
أما اختبارات التصادم فأنا عارف أنا بتكلم عن إيه.. هي 60 كيلومتر في الساعة وليست 60 ميل في الساعة...
تقدر تتأكد بسهولة من على الجوجل أو بص بسرعة على ده على سبيل المثال

http://www.crashtest.com/intro/

mido_4up
04-09-2010, 12:35 AM
انشكشن لخص الموضوع ببراعه ... مشكور

Injection
04-09-2010, 01:28 AM
يا باشا أهلا بيك أنا بس بعلق على كلمة "و60 سرعة أمنة جدا." لأنها علمياً غلط..
لكن أنا زيك طبعاً بتخنق من السرعة البطيئة..
أما اختبارات التصادم فأنا عارف أنا بتكلم عن إيه.. هي 60 كيلومتر في الساعة وليست 60 ميل في الساعة...
تقدر تتأكد بسهولة من على الجوجل أو بص بسرعة على ده على سبيل المثال

http://www.crashtest.com/intro/

معلش ياباشا أعذرنى, أنا أصلا بتأكد من معلوماتى بجوجل قبل ما أكتبها, وقعدت دورت شوية على معلومات عن سرعة ال tests بس لقيت معلومات كتير مختلطة وكبرت دماغى, بس كنت متأكد بنسبة كبيرة يا باشمهندس أن حضرتك عارف الموضوع ده و مش هتعديها444546.

بس مش معقول برضه ننصح شخص فى مصر أنه يمشى على 40 أو 30, ده الناس بتمشى زى المجانين فى الشارع وأنا منهم, وسواقين التاكسى والميكروباص أجارك الله.

وأنا نصحت العضو الفاضل (ياريت يقول على أسمه ويريحنا:)) أنه يتدرب كويس قبل ماينزل الشارع, علشان الشارع المصرى غير أى شارع تانى.

وفيه جملة كنت بحبها قوى بتقول speed dosen't kill you, stopping instantly does


وزى ماقلت برضه فى ال crash tests سرعة العربية بتبقى ثابتة, أنما الراكب اللى سايق على سرعة 60 هيبقى عنده وقت يتصرف ويقلل من سرعته بأذن الله.

وعموما أى سرعة زيادة عن سرعة الأنسان العادية خطر وبتأثر عليه بشكل أو بأخر, وكلمة "أمنة جدا" كانت مبالغة منى, أعذرنى.

و حضرتك أحرجتنى بردك بجد, شكرا على رد حضرتك المحترمROSE4U.

حضرتك يا إنجكشن أفدتنى كتير خالص وخاصة فى حكاية التغير للزيت والحاجات دى. أنا أخدتها وحطتها تحت البيت وخلاص ومستنى لحد ما أتعلم. هأخدها أغير لها الحاجات دى. أنا مش عارف نوع الزيت اللى أحطة للماتور فى العربية لان مش عارف الراجل الكورى صاحبها كان بيستخدم لها زيت معدنى ولا تخليقى. هحط معدنى وخلاص. كمان مش عارف احط لها البنزين 80 ولا 90 ولا 92. المستورد أعطهانى وفى التنك شوية بنزين.

حكاية الحرفيين مش كنت عارفها خالص. فى المنوفية عندنا مفيش افران للدهان خالص. بيعملوا ببخاخة كدة وبتكلف 700 جنية. لو عملت فى افران فى الحرفيين ممكن تكلفنى كام رشة برة . هل هما اللى هيفوكو العربية كلها حتة حتة ويرشوها كلها ولا يرجعوا يجمعوها تانى؟؟؟ أكيد هتكلف الفات بالطريقة دى... يوم أمس 11:20 الزيت عامة مش هتفرق كتير معدنى ولا تخليقى, طبعا التخليقى أفضل بس أغلى, أهم حاجة تحافظ على مواعيد تغيير الزيت والفلتر معاه علشان تحافظ على الموتور.

وفيه مركب أسمه oil flush وده بيغسل الموتور من الزيت القديم الموجود جواه علشان لما تيجى تحط زيت مختلف عن الموجود فى العربية, وموجود عند معظم البنزينات ومحلات الكماليات وقطع الغيار.

وأنا بنصح بيه لأن لزوجة الزيت القديم أكيد هتبقى مختلفة عن الزيت الجديد وبالتالى مش هيختلطوا مع بعض (بيفضل زيت فى الموتور حتى بعد تنزيل الزيت كله, وظيفة الأويل فلش أنه بيتحط على نص الزيت اللى فى الموتور ويشتغل الموتور شوية ثم يفضى الزيت كله وبكده بيزيل الزيت القديم من الموتور تماما), بس مش لازم أوى الموضوع ده لو حضرتك مش عايز تعمله .

سبب تغيير الزيت (أو أى حاجة عامة) عند شراء عربية جديدة أنك متعرفش صاحبها القديم كان مغيرها أمتى, ولا كان بيتعامل مع العربية أزاى, وطبعا الزيت روح الموتور, وسير الكاتينة ده فى حدود 45 جنيه ولاقدر الله لو أتقطع والعربية ماشية وصاحبها ملاحظش ممكن العربية تجيب صبابات وتكلفة تصليح بحوالى 1000 جنيه, وبيتغير كل 45000 كيلو وطبعا منعرفش صاحب العربية غيره ولا لأ فبيتغير حذرا وحيطة.

العربية بيتحطلها بنزين 92 وهو اللى بينصح بيه للعربية طبقا لنسب أنضغاطها علشان ميحصلش أشتعال سابق لأوانه للبنزين نتيجة لضغط المكبس عليه قبل الشرارة, لو حضرتك عايز تجرب 90 جرب ولو لقيت العربية بتبرجل وبتتهز حول الى 92 تانى,أما لو لقيتها شغالة كويس خليك مع 90.

وعادى ممكن تحط بنزين مختلف على الى فى العربية مش هتفرق.

الرش بيفرق دواخل ولا خوارج, يعنى لوحضرتك هترش صاج العربية كله لازم كل حاجة فيها تتفك من جوه وبره (راشة دواخل)وده مالهوش لازمة فى حالة حضرتك لأنك عايز ترش نضافة زى مابيقولوا, فالعربية هتترش من بره بس, هيشيل شوية البلاستيك اللى بره ويلزق على الزجاج والعجل والحاجات اللى مش هتترش ورق جرايد ويرش العربية بالمسدس من بره, وتدخل بعديها الفرن, أما الفك والخلع التام لكل مافى العربية ورشها أسمه رش دواخل وده بيعيب العربية لأنها كده الناس بتقول عليها عربية حوادث (الصاج كله مرشوش تبقى العربية أكيد عاملة حادثة) وده اللى فعلا بيتكلف كتير.

والفرن مصنعيته قليلة فى حدود 200 جنيه كأقصى حاجة وسعر الرش برضه فى حدود 700 أو800, وياريت حضرتك تشوف طلبات الصنايعى من بوية وتجهيزات وكده وتجيبها علشان ميغشش حضرتك فى السعر وتبقى بكده أديته مصنعيته بس.

رغم أنى أنصح حضرتك بشدة مترشهاش علشان الحسد واللذى منه وأسأل مجرب برضه (اللى هو أنا) وأعضاء وناس كتير أتلسعوا, وكده كده منظر العربية مش هيفرق مع حضرتك كتير, بس فى الأخر اللى حضرتك تشوفه.

tham1010
04-09-2010, 08:59 AM
متشكر جدا يا إنجيكشن. واالهى ما قصرت. أنا اسمى تامر من المنوفية. وأعتقد أنى عمرى ما هجيب سرعة الستين فى بلدنا لان الطرق كلها عندنا ضيقة ومزحومة بالتاكسى أخويا أخرة بيجيب 40 لمدة دقيقتين ويقف علشان إشارة ولا يلف. مش عندنا طرق طوالى زى القاهرة. البلد بتعتنا كلها من أولها لأخرها حوالى 8 كيلوا طول فى 10 كيلوا عرض. وكلها طرق قصيرة

sad-bird
04-09-2010, 09:32 AM
السلام عليكم
انا متأخر كتير في الرد علشان النت كل ما افتح الاقي الدنيا بايظة يدوب بقرا وبس

طبعا انجكشن قال كل اللي يتقال في الموضوع تماااااااااااااااااااااااااام
اما بقى علشان موضوع السواقة دي فنصيحة تشوف عربية صغيرة وتتعمل عليها لغايه لما رجلك تتظبط وبعدين تركب الماتريكس
او انجشكن يتبرع بلولا ويدربك عليها لغايه لما تتظبك واهو لولا تتعرف على ماتريكس يمكن
يبقوا اصحاب

وزي ما قال انجشكن في موضوع الصيانة لازم تعمل الصيانة الدورة بتاعت العربية وكأنك راكبها بقالك 50 الف كيلو وده لان انت مش عارف اللي قبلك كان بيعمل ايه في العربية
والصيانة
تغيير سيور خاصة سير الكاتينة
تغيير زيوت ( فرامل / ماتور / دبرياج / باور ) كله وتغييييييييييييييييييير مش تزويد لانك ممكن تروح لبتاع الزيت تقوله غيرلي يقولك لون الزيت حلو سيبه شوية قوله لا غير
اما بالنسبة لموضوع الدهان بقىفأسأل عليه انجكشن
ههههههههههههههه
وحدث ولا حرج
الباشا سايب لولا تخزي العين بحوادثها بقشرها ده حتى دهن الاكصطدام الامامي اسود بعلبه سبراي من ام 7.5 علشان يوفر اجرة الصنايعي اصله غلبان ياعيني معهوش البت مخلصه على كل اللي معاه
ههههههههههههههههههه
بهزر طبعا
هو مظبط العربية كاساسيات وركن موضوع الدهان ده لغايه الترخيص لاكتر من سبب
اولهم انه خايف من الحسد
ثانيهم علشان تذكره تفكره بالحوادث اللي فيها كل يوم
بس الغريب في الموضوع انه مبينضفش العربية من جوه سايبها بكانزاتها بورقها بترابها بسلاطتها ببابا غنودها كله على بعضه

اما نوعية الدهان فده على حسب وكل الناس بتدهن دهان بلدي المهم الطريقة ازاي
فيه صنايعي تروحله يمسك صنفرة المية وخبطتين ورش وامشي
وفيه صنايعي تروحله يمسكها يصنفرها لما تبقى انعم من الحرير ويدي بطانه ويدهن بعد كده
اما اللون ميتالك او عادي فده نوع البوية مش طريقة الدهان وده انت اللي بتحكم فيه لما بتروح تشتري البوية من بتاع الالوان ولازم يطعهولك افتح من اللون درجة واحده بس علشان بعد الدهان اللون بيغمق درجة او اتنين

اما عن الدهان الاصلي للعربية فلو عاوز تعمله ده موضوع تاااااااااااني خاااااااااااااااااالص
لان ابن خالي كان معاه فورد موندينو شاريها من واحد سايبها على طول في الشميس لما سقفها والكبود لونها بقى عامل سيرياليزم ( لو بصيت في السما وشوف لونها السماوي كده وداخل فيه سحابه معكره اللون وحته صافيه وحته معكره هيا كانت عامله كده بس اللون زيتي )
لما فكر يبعها تاني لقى ان العربية علشان الدهان تتباع زي مهو اشتراها لو رشها في اي مكان تنقص من تمنها مش تزيد لان هو ججايبها بوية بالدها بعيوبها لكن لو اترشت في السوق المصري الحلو بتاعنا تنقص في سعرها
ايه الحل
فكر في موضوع التوكيل
ونزلهم يسأل علي الدهان
قاله 7000 جنية
ليه ياعم انت هترشلي السقف والكبود والشنطة بس
بتتعمل برة ب 500 جنية قول هنا 1000
2000
قالوله لأ
العربية بتتفك كلها حته حتة
ميبقاش فيها غير الشاسيةو الصاج وبسسسسسس
ماتور
عفشة
عجل
كهرباء
كل حاجة بتتفك
وبتتعمل سمكرتها ولو فيها حاجة بترجع لاصلها
وبتنزل في حوض الدهان على بعضها وتاخد البطانه وبعدين بتنزل في حوض تاني تاخد اللون اللي عاوزة وبعد كده بتترش حاجة زي ورنيش كده
وبيرجعوا يجمعوا كل الكلام ده من تااااااااااااااااااااااااني
وهنا بقى المشكلة
اي حاجة فيها اي خلل بسيط بتتغير وكله على حساب الزبون
بس العربية بترجع لحالتها الأصلية خاااااااااالص كأنها خارجة من المصنع مفيهاش مسمار مش بتاعها
الكلام ده انا مشوفتوش انا سمعته من ابن خالي لما راح التوكيل
يا تري بقى لسه ناوي تدهن
انا من رأي بلاش
خليها لما تيجي تجدد الرخصة وعلى ما اعتقد ان المرور عندكم ممكن يفوق موضوع الدهان ده
فريح دماغك وخليها كده خصوصا انك بتقول ان مفيهاش حاجة دي خدوش بسيطة
وخليها على الاقل لما تتعلم عليها شوية











أأأأأأأأأأأأأأأأف جدا على الأطالة

tham1010
04-09-2010, 09:37 PM
متشكر يا يا سادبيرد. وللهى أنتم ناس جدعان ربنا يبارك لكم.


هو فى حاجة أسمها زيت دبرياج؟ أنا أول مرة أعرف ان العربية بيتحط لها زيت للدبرياج. وهل ثمنه غالى؟ وهل هو زيت مخصوص يعنى ولا اللى ينفع للماتور أو البور ينفع للدبرياج. شاكر على التوضيح من اعضاء المنتدى الكرام

حضرتك يا ساد بيرد قلت " تغير السيور" بس اللى أعرفه سير الكتينة أبو 45 جنية اللى قال عليه إنجيكشن. هل هناك سيور أخرى يجب تغيرها.

يا جماعة الواحد حاسس ان دماغة لفت من موضوع العربيات دى. يمكن علشان جديد. دة الميكانيكية هيشتغلونى تماما

sad-bird
04-09-2010, 10:06 PM
متشكر يا يا سادبيرد. وللهى أنتم ناس جدعان ربنا يبارك لكم.


هو فى حاجة أسمها زيت دبرياج؟ أنا أول مرة أعرف ان العربية بيتحط لها زيت للدبرياج. وهل ثمنه غالى؟ وهل هو زيت مخصوص يعنى ولا اللى ينفع للماتور أو البور ينفع للدبرياج. شاكر على التوضيح من اعضاء المنتدى الكرام

حضرتك يا ساد بيرد قلت " تغير السيور" بس اللى أعرفه سير الكتينة أبو 45 جنية اللى قال عليه إنجيكشن. هل هناك سيور أخرى يجب تغيرها.

يا جماعة الواحد حاسس ان دماغة لفت من موضوع العربيات دى. يمكن علشان جديد. دة الميكانيكية هيشتغلونى تماما


اسف يا تامر على الغطلة المطبعية دي التركيز بقى مش ولابد خالص
هو زيت الفتيس
وده بيكشف عليه الميكانيكي لو لقيت الفتيس فيه مشكله تقيل اوبيقفش في الغيار

زيت الباكم ده بتاع الفرامل ومعرفش انت بتزوده وبس والا بتغيره كله انجكشن يفيدك اكتر طبعا

وفيه زيت الباور وده برضة يفيدك فيه انجكشن ( الواد ده خبرة خسارة في تجارة هههههههههه)

بالنسبة لزيت الماتور كان فيه موضوع النهاردة قريته عن تغيير الزيت قلب عليه في الموضع واقراه كويس هتعرف انواع الزيوت وتغييرها لو ان الموضوع اصلا كان على ان تغيير الزيت كل فترة 1000 او 3000 ده مش صحيح والمفروض انك بتغير لما الزيت لزوجته تقل او يعدي عليه 6 شهور في العربية هجيبلك رابط الموضوع وابعتهولك


السيور
سير الكاتينة وسير التكييف وسير المروحة

نسيت كمان اقول على التشحيم للكورونا وده عند اي بنزينه بتزود الشحم بس مش كتير اخره 5 جنية
انت بتروح تقوله عاوز اشحم وهو بيتصرف

وبعدين كل حاجة بالتدريج بتعرفها انت علشان جيت هنا واخدت كل المعلومات مرة واحده لقيت دماغك لفت والموضوع ابسط من كده كتير
عموما انت كل ما تنوي تعمل حاجة قول هتعمل ايه وهتلاقي الف واحد يقولك هنا الموقع ما شاء الله عمران بذوي الخبرة

sad-bird
04-09-2010, 10:10 PM
وبعدين ياعم الميكانيكية عندكم شاطرين وغلابه مش جزارين زي القاهرة ولما كان انجكشن بيقولك على الحرفيين فدي لان كلها صنايعيه ومحلات قطع غيار يعني تدخل اولها ما تخرجش غير ومعاك كل حاجة عربيتك

وان كنت خايف ياعم نبقى نيجلك انا وانجكشن عند البرج بيقولوا فيه فطير مشتلت هناك تحفة
ههههههههههههههههه

elensaan
04-09-2010, 11:02 PM
والله حاجة عظيمة
المنتدي مليان خبراء علي مستوي

tham1010
05-09-2010, 12:17 AM
تشرفوا يا سادة المنوفية.. وشكرا على ردكم. فهمت كمان ان فيه سير مروحة وسير تكيف كمان...

tham1010
05-09-2010, 08:19 AM
فى حاجة عاوز أستفسر عليها منكم... أنا ناوى أجيب غطاء واتر بروف المبطن التقيل للعربية الماتركس... الحقيقة لقيت فى المنتدى هنا محل أسمة " سبير كار" قلت أتصل بيهم أشوف عندهم أو لا، لان فى المنوفية محدش بيجيبة وكله شغال على القماش. فلما سألت الراجل قالى لى 220 جنية وهنعملك خصم طالما جاى من مصرموترز وهيبقى 200 جنية. لما طرحت الموضوع فى المنتدى الكل بيقول لى دة غالى خالص وإن ثمنه مش يعدى 150 وفى بعض الأماكن يمكن أقل من كدة....

اولا: عاوز أعرف لو حد عندة الغطاء الوتربروف المبطن دة يقول لى كان ثمنه كام وأشتراه من أمته

ثانيا ممكن الواحد يلقيه فين فى القاهرة، يعنى أيه المحلات اللى تبيعه بسعر كويس...

الحكاية كمان كانت ناقصة الغطاء دة كمان... الواحد مش سالك فى الزيوت والفتيس والسيور ويطلع له موضوع الغطاء كمان...

شكرا على ردكم الكريم

Injection
05-09-2010, 09:36 PM
هو الغطاء ده بالذات أسعاره بتختلف حسب المكان وحسب نوعيته وكمالياته, يعنى فيه غطاء ووتر بروف خفيف جدا طبقة واحدة, وفيه طبقتين واحدة قماش وواحدة ووتر بروف, وفيه غطاء مسامه كبير وتانى مسامه صغيرة, وفيه بييجى معاه شنطة ليه وفيه لأ.

والسعر مش بالضرورة علشان غالى يبقى بتتخم:), مع أنى أنصح حضرتك تسأل ألأعضاء فى الموضوع التانى علشان أكيد عندهم تجارب أكثر وعارفين مكان كويس بيبيع.

ولما تجيبه الغطاء ده بيتسرق زى الحلاوة, فياريت يا أما تكتب عليه رقم العربية بأرقام كبيرة, أو تجيب ظلطة أو فوطة وتحطها على الغطاء عند الباب وتقفل عليها الباب وهى على الغطاء علشان محدش يعرف يشيله من على العربية من غير مايفتح الباب.

بس معلش أيه اللى جاب الموضوع فى دماغ حضرتك؟

tham1010
05-09-2010, 11:16 PM
يا إنجيكشن ( بالمناسبة أسم حضرتك أيه) اللى جاب الموضوع دة فى دماغى إن العربية بقالها يومين معايا ومرمية تحت البيت ومش بسوقها لسة وجايبها بدون غطاء ولمت تراب الشارع كلة. قربت تبقى شبة العربية اللى فى الصورة اللى حطتتها فى كل مشاركاتك.... ولما سألت فى بلدنا قالوا لى مفيش للمتركس لانه مش مطلوب قوى لأبعاد العربية، بعد العيد هنبقى نوصى علية وهو فى حدود 150 جنية. قلت أختصر المسافة وأنزل القاهرة وأجيبة بنفسى. ففى محل اسمة " سبير كار" سألت عندة بالتليفون قالى لى ثمنه 200 جنية الوتر بروف المبطن بعد الخصم. طبعاً غالى جدا. وأحد اعضاء المنتدى قال لى إنه جاب واحد من 10 أيام من نفس المحل لعربية فرنا بسوستة ومبطن 110 جنية فقط.... مش عارف بقه المحل دة شغال أزى؟؟ يعنى محتاج فصال يعنى ولا أيه...

طبعاً مش أعرف الغطاء يتباع فين فى القاهرة.. وحكاية الجودة والخامة تقلق برضوا لانى مش هعرف الفرق لعدم وجود الخبرة....

Injection
05-09-2010, 11:49 PM
أنا أسمى عمرو ياباشا:)

ممكن حضرتك تتصل تانى تستفسر عن الفرق فى السعر بين حضرتك وبين العضو الفاضل, بس عموما متهيألى الفرق بيرجع لحجم الماتريكس الكبير.

وديه معلومات الأتصال لشركة توب كفر, وديه من أكبر شركات صناعة الأغطية فى الشرق الأوسط, وهما اللى بيعملوا ألأغطية السيلفر بتاعة عربيات التوكيل "النضيفة" وفيه أمكانية التوصيل لحد عندك كمان.

وأدى الموقع,حضرتك تصفح وممكن تتصل بالشركة تسأل على السعر, وهيبقى فى حدود 200 جنيه ومش مبطن, بس غطاء بجد.

http://www.topcoveregypt.com/contact_us_a.php

tham1010
06-09-2010, 12:16 AM
كتبت لتوب كفر إيميل إمبارح وردوا على اليوم وقالوا أن الغطاء ثمنة 230 ومصاريف الشحن 25 جنية وقالوا فعلا أن الغطاء مش مبطن ولكن ثقيل ومصنوع من نسيج مخصوص مضاد للماية، وزنه 2 كيلوا ومعاه شنطة يتحط فيها ومكتوب عليه شعار هيونداى؟ الواحد يا عمرو عاوز حاجة حنينة. بس الأسعار دى يا عم أسعار أصحاب العربيات اللى بمئات الألف...

Injection
06-09-2010, 12:36 AM
يبقى كده فعلا ياباشا الفرق فرق حجم الغطاء والعربية, علشان سعر الغطاء عندهم بيبقى فى حدود 200 جنيه.

متفكر حضرتك تجيب غطاء قماش وتريح دماغك, بس متهيألى برضه هيخلى العربية تترب, بس سعره حنين على الأخر.

tham1010
15-09-2010, 08:33 PM
أنا أشتريت غطاء قماش والفكرة كانت فاشلة بكل المقاييس لانى اسكن فى شارع عمومى 15 متر وحركة المرور علية شديدة. فبعد يومين كان الغظاء كلة تراب. والتراب أتسرب منه إلى العربية فلقيت العربية كلها تراب وفى كل الأماكن حتى فى أكرة الباب. العربية مقفلة تمام علشان كدة مش دخل التراب جوة العربية بس أكيد الكابوت حيث يوجد الماتور دخل له التراب. لهذا أنصح بالغطاء الوتر بروف أو البلاستك أو القماش المبطن ببلستك لان الثمن يستاهل

aymangalal
13-12-2010, 12:40 PM
دلوقتى اكتسب المعلومات يا tham1010
وبقيت تقول نصايح كمان شوفت بقى اتعلمت بسرعة ازاى؟؟؟؟؟؟
والتجرية خير دليل
ربنا يوفقك وشكرا لكل المشاركات والاعضاء اللى بيفيدونا