المساعد الشخصي الرقمي

مشاهدة النسخة كاملة : الى جميع مالكى سوباروووووووووووو فى مصر


dr_ahmed80
31-08-2009, 04:28 PM
اخوانى فى المنتدى سلامو عليكو
انا عاوز اعمل جروب لكل الناس الى معاها عربيات سوبارو فى مصر من سنة 1982 الى 2008 الى معاهم امبريزا و ليجاسىو فورستر و G10 و فيفيو جميع ماركات سوربارو
اخبار العربية معاكو ايه ؟ تعبانين فى قطع الغيار؟ مسريح بالعربية و لا خلاص قرفت منها محدش عارف يصلحلها و مش لاقيلها قطع غيار و هترميها جنب اقرب رصيف
لا لا اوعى تعمل كده العربية دى محترمة و بنت ناس بس معلش هية رقبتها عوجة حبتين و بتحب تتقل على صاحبها
مثلا رحت التوكيل و اتنفخت فى شوية الافااااااااااات و قلت ابقى ابن ستين فى سبعين لو عتبت عندوكو تانى و تلف تلف و تروحلهم و فى الاخر تقرر انك تبع العربية دى فتقوم تبيعها بارخص الاسعار؟ استنى و اصبر
و ان شاء الله هنحل مشاكلنا مع بعضينا
فى انتظار الردود
و ربنا يجعلو عامر

dr_ahmed80
01-09-2009, 02:23 PM
ايه مافيش حد عنده سوبارو و لا مافيش حد مشكلة من السوبارو
و الله الحمد لله

AbOnOrA
01-09-2009, 06:03 PM
اهلاً بيك يا دكتور احمد نورت مصر موتورز

للاسف مفيش حد من مالكى السوبارو متابع المنتدى بصورة دورية فياريت حضرتك تبداء بنفسك وتحكيلنا عن تجاربك مع العربية واكيد ده هينشط القسم ويجذب ملاكها للمشاركة

dr_ahmed80
04-09-2009, 03:54 AM
الاستاد ابو نورا
اشكرك على ترحيبك بيا و انا اعجبت جدا بالمنتدى و استفدت كتير من مشاركات الزملاء و المشرفين و اخص الاستاد محمدمشرف سيات و فعلا كل واحد عنده عربية بيبقى محتاج لحد يقوله خبرته او حاجة مر بيها قبل كده
معلش لظروف الشغل و انشغالى فى الدكتوراه و الجامعة ممكن ابقى مقصر بس انا هحاول ابتدى بنفسى و هحكى قصتى مع السوبارو الى كرهتها ايام بس عشقتها كتييييييييييييييييييييييييييييييييييييير
او ل عربية سوبارة اشتريناها كان فى 99 كانت بتاعة والدى ايامها كنت سمعت عنها بسيط جدا فى كام اعلان فى الجرايد كانت بتنزل عن الامبريزا موديل 97 و 98 و كان ايامها الوكيل ارتوك اوتو فكان يعمل خمسين اعلان لسكودا و اعلان كده على جنب لسوبارو المهم والدى كان فى المانيا و رجع قالى احنا هنشترى عربية قلتله طب كويس نوعها ايه قالى سوبارو قلتله مين؟؟؟؟ و عليك بايه وجع القلب ده ما اللانسر و الكورولا زى الفل مالهم يعنى قالى ركبتها مع واحد صاحبى فى المانيا و عجبتنى جدا و التانى باين قعد يشعر فى العربية و قاله بتتباع فى اجنص كان فى المعادى قدام برج الزينى المهم ماكدبناش خبر روحنا الاجنص و بابا ضرب صحوبية مع الراجل(باين على صاحب الاجنص لبما صدق اصلا حد عاوز يجى يشترى العربية دى) كان عنده كتير لدرجة انه وزع على الى بيشتغلو عنده منها و بالتقفسيط الممل اشتريت العربية فى 99 و هيةموديل 98 و اتفرج بقى فى الشارع على كل واحد يسألك على العربية (السوبارو الابواب بتاعتها سبوور مافيهاش فريم) و السايس يقولى انت شلت حتة الحديدة دى و الله فكرة يا باشا
العربية جميلة جدا ناعمة موتورها مالوش حل الموتور البوكستر ده حكاية فعلا تسارع فظيع تجميع العربية بسرعة العربية لسة موجودة مع والدى لحد دلوقتى و انا بعتبر صانع السوبارو (شركة فوجى للصناعات الثقيلة) صممها على انها عربية عملية رياضية مشاكلها تكاد لا تذكر اصلا يكفى انى غيرت المياه الخضرا بتاعة الرادياتير بعد 5 سنين
ابقى اكمل الحكاية بقى بعدين علشان الناس هتزهق ده لو حد قرا الموضوع يا ابو نورا
و ربنا يجعله عامر

ekramyhamdin
04-09-2009, 02:33 PM
متابع بإهتمام

dr_ahmed80
05-09-2009, 02:15 AM
اشكرك يا باشمهندس اكرامى على الاهتمام و بانتظار رايك
نكمل بقى ان شاء الله مع بعض مشوارى مع الجميلة الامبريزا جيت بعد كده ودتها عند صيانة 5000 عند ارتوك اوتو اعتقد فى اوائل سنة 2000 و كانو هما تقريبا سابو التوكيل بس عندهم قطع غيار و حاجات كده طبعا ماعملش حاجة نظبف العربية و غير زيت كوبيل وان و فلتر الزيت و شكرا و دفعت ساعتها 500 جنيه و قررت انى مش رايحلهم تانى و العربية بسم الله ما شاء الله مافيهاش غلطة و كنا بنسافر بيها كتير لدرجة انى سافرت بيها من المنيا الى مرسى مطروح خبطة واحدة فى عز الصيف و التكيف شغال (العربية مواضفات خليجى كمان كان مكدون فى الكتالوج و دى بيبقى ليها مراوح اقوى و الرادياتير اوسع) و المسافة حوالى 7 ساعات فى عز الصيف بس الكاوتش جه فى اخر المشوار قبل مرسى مطروح ب خمسين كيلو و عملها معايا و ماكنتش عارف بقى مكان اى حاجة ادور على الكوريك فين و قعدت عشر دقايق ادور على الحديدة الى بترفع الكوريك لانهم حاطينها فى مكان كده داخل فى فبرة جنب لكاوتش محترمين برضه بس فيها شوية غباوة و غيرت الكاوتش و اكملت الرحلة و العودة الى القاهرة كمان بسلام و بدون اى قلق لحد سنة 2003 تقريبا ماشتكتش من العربية و لا عملت معايا اى موقف يدايقك حتى بحط بنزين و زيت بس مابحطش مية كمان
جينا فى سنة 2003 حملة فى الجرايد ان ابوغالى اخد التوكيل و قعد يعمل افلام فى الجرايد و بتاع انا اتبسطت و قلت خير بدل ما الواحد قاعد سنتين حاطط ايده عل قلبه احسن يطلع حاجة و لا تحصل مشكلة ماتعرفش تعمل فيها حاجة المهم رحت صيانة 20000 الف باين غيرت سيور و فلتر بنزين و زيت و كده و خدو 900 جنيه و قررت نفس القرار الاول مش هروحلهم تانى بس اتعرفت على واحد بيشتغل هناك اسمه عايد(و هوة دلوقتى اشهر واحد فى السوبارو) و قالى يا باشا انا بشتغل فى السوبارو من زمان و تحت امرك و هوة للانانة جدع يعنىو مررت الايام بدون مشاكل الى ان حدث ان والدى كان ماشى بالعربية ووقع فى حفرة فالكوبلن الشمال الكوتشة بتاعتة اتقطعت و بقى يطقطق طب بسيطة نكلم التوكيل يا ابوغالى الكوبلين بكام الكلام كان سنة 2004 قالى الراس بس 2000 جنيه و الكوبلن كامل ب 3000 انا ماردتش ارد عليه بكلمة مش كويسة و جه فى دماغى صديقنا القديم عايد اتصلت بيه رحب بيا اوى و قالى انا سبت التوكيل و شغال برة ايامها كان فتح فى الحرفيين و كان بيشتغل على اده جابلى كوبلن استيراد كامل ب 550 جنيه طبعا كنت برقص فى الضلمة و فرحت جدا و من هنا بقيت انا و عايد و السوبارو
و الى لقاء و ربنا يجعله عامر

AbOnOrA
05-09-2009, 02:44 PM
متابع يا دكتور بكل الاهتمام

السوبارو حكاية خاصة الجيل الاول اللى مع حضرتك ده فعلا كل الناس بتحلف بادائه واعتماديته وكمان حضرتك اسلوبك جميل جداً ptmnlo123per122

بس انا كنت عايز اسالك هى اللى مع حضرتك كام سى سى ؟؟ انا اعرف اقل حاجة فيها كان 1800

dr_ahmed80
06-09-2009, 10:22 AM
الاستاذ ابو نورا
اشكرك على التشجيع ده بس من حبى و اعجابى للمنتدى الواحد بقى بيحب يكتب و يقول للناس خبرته البسيطة
الموتور 1600 يا باشا زى الموتور بتاع 2003 هوة هوة بس فيه موتورات زى ما حضرتك بتقول 1800و 2400 تيربو بشوفه موجود استيراد بتاع الراليات (صحيح من احسن وة اجمد الحاجات الموجودة فى السوبارو العفشة فعلا العفشة بتاعتها ممتازة جدا و قوية بتستحمل المطبات بتاعة بلدنا الحلوة)
وصلنا الى عايد المهم جه بعد كده كنت بروح عنده فى الصيانة الدوية ( انا كنت مصور الكتالوج بتاع العربية و حاطط نسخة فى الشنطة) و رحتله بعد كده فى ورشة فى الظاهر لانه كان ساب الحرفيين و راح اشتغل مع مستورد اسمه هشام عبد الهادى (مستورد عربيات يابانى وكورى) طب عا العربية مش اى حد يلعب فيها عندك مثلا سير الكاتينة علشان تغيره لازم يتعمل بمقياس معين لو ركبته عند حد عادى مش بيفهم ممكن جدا يركبهولك غلط و بقيت بروح اعمل عنده صيانة العربية 50000 و تم تغيير سير كاتينة ب 450 جنيه و سيور دينامو و تكيف ب 350 جنيه و فلتر بنزين ب 80 جنيه و فلتر زيت ب 35 جنيه ده على ما اتذكر
المهم بقى ان العربية كان بتتخبط منى كتير و طبعا عاوز فوانيس و كده و علشان تروح التوكيل يقولك الفانوس ب 900 جنيه
فكنت بجيب من عايد طبعا فانوس اشارة ب كامل ب 200 جنيه حاجات زى كده
المشكلة فى قطع الغيار بالنسبة للسوبارو مشكلة كبيرة فى مصر نظرا لمغالاه التوكيل فى اسعار قطع الغيار بشكل فظيع و مافيش حد بيشتغل فيها برة التوكيل زى بقية العربيات التانية يعنى مافيش غير عايد و بورسعيد تقريبا
المهم ان عايد بعد كده ساب هشام عبد الهادى و قرر انه يفتح لوحده فى الحرفيين و سافر اليابان خد دورة تدريبة فى مصنع سوبارو و المفاجأة بقى انى عمل لنفسه سايت على النت الى عاجبنى ان الراجل ده بيطور نفسه كل شوية فى حين لاانه ميكانيكى ممكن يفك و يركب و يقولك ماتنفعش او كده لكنه عاوز يتعلم و بيعرف يكسب زبون كويس الى ان اصبحنا صحاب بقى و الفاجعة الى شقتها عنده مرة و انا بقولها و اجرى على الله ان التوكيل بياخد منه حاجات استيراد و يبعها على اساس انها جديدة و دى مصيبة جت فى بالى لان مراكز الخدمة دى مش عليها اى رقابة ثانيا انت بتدخل و حضرتك تقعد تشرب الشاى زى الباشا و هما بياخدو العربية و انت مش بتشوفها و الله اعلم ايه الى بيحصل لحد ما مرة سمعنى مكالمة تلفون من مهندس فى التوكيل ( بس الله اعلم برده المهندس ده مظبط الشغل ده من ورا التوكيل و لا بعلمه) و لا فتيس بيتباع استيراد ب 12 الف يبيعه هوة للزبون ب 25 ده حرام و لا ايه
و ارجو منكم فى المنتدى منافشة قضية الرقابة على مراكز خدمة السيارات المعتمدة لانك فى بطنهم عربيتك دخلت و كده كده هتفع غصب عنك بس مين قال او يضمن الحاجة دى
و ده السيت بتاع عايد http://aiid-subaru.com/index.htm
و ربنا يجعله عامر

hani11
09-11-2009, 06:11 PM
موضوع جميل ومفيد جدا وأنا معايا سوبارو فيفيو

eng.uniqe
09-11-2009, 07:25 PM
انا معنديش سوبارو بس طول عمرى بحترم العربيه دى و بحس انها مش زى بقيت العربيات اليابانى
و الموضوع شيق جدا و طريقه سردك رائعه

lol
10-11-2009, 05:23 PM
موضوع جميل انا لما كنت قاعد فى اسكندرية لحد السنة اللى فاتت كان بيتفتح فرع لمبيعات سوبارو هناك فى داون تاون وكنت اعرف ساعتها الاستاذ محمد عبد اللطيف وعرفنى هو على الاستاذ احمد مش فاكر ايه بصراحة وكنت ايامها بدور على عربية كسر زيرو اجيبها لواحد قريبى المهم قابلت الرجل فى اسكندرية قبل افتتاح المعرض بكام يوم وكان فى هناك عربية تيست درايف وعمك احمد طلعها فى دماغى اجرب العربية
المهم اتفقت معاه انى اجيله فى يوم بليل عشان اخوكم مابيحبش يلعب فى النهار المهم روحت انا ومراتى وقابلت الراجل وخدنا العربية ركبت انا وكان هو جنبى ومراتى ورا
كانت العربية سوداء مانيوال 1500 هاتشباك 105 حصان (صافى ) تكيف فوجات زجاج كهرباء مرايات ضم abs كاملة من غير فاتحة سقف يعنى
المهم اول ماطلعت بالعربية حسيت بهيبة فظيعه لدرجة انى جبت التانى على 20 مكنش ال rbm وصل ل 2500 حتى لقيت عمكم احمد بيقولى ياباشا انت بتجرب عربية رياضية مش عادية امشى ومتقلقش رديت عليه بكسوف ومش عايز اقوله العربية تخض قلته انا بجرب العربية على كل حال حرق غيار وتقصير الغيار عايز اتفرج على العربية ورد فعلها ضحك وسكت
المهم قعدنا محتارين نطلع على فين فجه فدماغى انى اعزم مراتى والراجل على كابتشينو من اون زا رن وده مكانه فى الكيلو 16 او 17 الطريق الصحراوى يعنى قريب
المهم طلعت وبدأـ اخد العربية وبدأت فى حرق الغيارات واسمع صوت الموتور اللى يجنن بجد وبتفرج على تسارع غريب مشفتوش فى عربية ستوك ابدا
وقصدت انى اخد كام نقرة فى الطريق واتفرج على العربية عارف انت احساس الفار لما بيجى جنب الاسد ويقول واحد هايطلع عين امه النهارده كنت انا الفار والسوبارو الاسد ولا اتأثرت بالنقر حتى الملفات اللى موجوده منهم ملفين وحشين بعد اون زا رن اصلى بعد مشربنا قلت اجرب موضوع الثبات اللى فلقونا بيه ده المهم بعد اون زا رن فى كام ملف وحشين العربية اخدتهم على ثبات خرافى وكانت السرعة فوق ال 180 حتى الغرز تاكل الغرزة ومتحسسكش بالهوا
بجد عربية اكثر من جميلة
اللى يعيبها توكيل اسعاره تحسسك انك راكب شبح
وشكرا على الموضوع الرائع

dr_ahmed80
11-11-2009, 08:44 AM
اخوانى مالكى سوباروووووو و الى كل من جرب السوبارو
اشكركم على تفاعلكم الجميل فى هذا الموضوع الشيق و فعلا انها حقا عربية محترمة و بعتذر بقى عن انى اقدر استمر فى الموضوع لظروف الشغل و العمل و الدكتوراه الله يقطعها بس بجد اى حد عاوز اى حاجة تخص السوباروووووو انا فى الخدمة
الى الاستاذ الصديق الى معاه سوبارو فيفيو العربية دى من اجمل العربيات الصغيرة الى ركبتها فى حياتى و الله مالهاش حل و الى مايعرفش العربية دى السعة اللترية للمتور اصلا هى 660 سى سى و طبعا علشان احنا فى مصر هنا محدش بيصدق فبيكتبوها 850 او 900 سى سى زى الماروتى علشان تعرف تبيعها و الا هيقولك راكب موتوسيكل العربية دى فيها طارة دريكسوين تجنن و فيها تسارع غريب جدا و بتعمل حولى 220 كيلو فى 10 لتر كنت بحط فيها بنزين و انساها كنت ايامها ساكن فى وسط البلد ممكن تركنها فى مكان و اى حتة و ربنا يبركلك فيها ان شاء الله
و ربنا يجعله عامر

elmanahry
11-11-2009, 01:34 PM
دكتور احمد بتقول انك سقت السيارة من المنيا لمرسى مطروح ممكن اسالك انت ساكن فى المنيا ولا لا وعلى كل حال اشكرك جدا جدا على مشاركتك هذه الخبرة الرائعة والاسلوب الجميل التى سقت به الموضوع انا لا املك سيارة سوبارو ولكن امنية عندى ان امتلك سيارة اوتوماتيك سوبارو مستعملة او جديدة بسعر معقول ولكن يكون تسارعها مثل السيارة المانيوال او تقترب منها وشكرا جزيلا

akramhasan
12-11-2009, 01:13 PM
السلام عليكم

اخى الدكتور احمد بارك الله فيم و حياك الله
انا اول مشاركه ليا فى المنتدى الجميل دا و انا قرات الموضوع و هوا فعلا موضوع جميل
انا اشتريت من يومين سوبارو امبريزا مونديل 1998 1600 سى سى
و ما شاء الله العربيه انا مبسوط منها اوى على الطريق و موتورها صوتو يجنن بصراحه و الثبات بقى مقولكش كانى راكب مرسيدس و الفتيس الاوتوماتك بتاعها تجميعه رههيب ما شاء الله العربيه فوق الممتازه
بس ان خايف من قطع الغيار بصراحه و ربنا يستر و انا ماشى فى ابلد دى
غندى سؤالين بعد اذنكم

العربيه الى معايا دى جر رباعى؟؟؟ يعنى الاربع عجلات شغالين على طول فى وقت واحد؟؟
فى زورار جمبى عند الفتيس مكتوب عليه AT
دا بيعمل ايه؟؟؟ لما بدوسه بينور فى الطابلون لمبه
تكيف العربيه دى ما شاء الله عليه ملوش تلاجه تلاجه تلاجه
انا سعيد انى بشارك معاكم اليوم و بارك الله فى كل الاعضاء و شكرا

mohd_rafat
14-11-2009, 12:50 AM
لن أزيد كلمه عن الكلام الذي تفضلوا وقالوه الأعضاء المحترمين ... ولن أثري هذه السياره أكثر فإن مكانتها بين الكبار ...
وأرجو من الأعضاء التفاعل بشاكل دائم في هذا الموضوع لإستفاده الجميع وأشكركم جميعآ .
متابع وبشده ...

mohd_rafat
14-11-2009, 12:51 AM
لن أزيد كلمه عن الكلام الذي تفضلوا وقالوه الأعضاء المحترمين ... ولن أثري هذه السياره أكثر فإن مكانتها بين الكبار ...
وأرجو من الأعضاء التفاعل بشاكل دائم في هذا الموضوع لإستفاده الجميع وأشكركم جميعآ .
متابع وبشده ...

akramhasan
15-11-2009, 01:15 PM
السلام عليكم
حياكم الله يا اخوه....اخويا ركب العربيه و جاب بيها 180 اليوم و بيقولى كان لسا فيها كتير اعتقد انها ممكن اجيب ال 200 مرتاح ....و الثبات طبعا مش هنتكلم فيه....انا وقعت فى حفره جامده من حفر ام الدنيا مصر و عوج لى الجانتين الشمال استعدلت واحد و التانى هظبطه و دا بسبب ان الجنوك عندى سبور و راكب عليها كاوتش سبور برده و دا مينفعش فى مصر عشان ناششف ان شاء اله اجيب 4 فرد جداد

انا هتابعكم اول ياول عن حالتى مع العربيه و ان شاء الله يكون خير

Bendary
15-11-2009, 03:05 PM
العربيه دى جامده جدا - وحتى فى اليابان هى فئة عاليه جدا
ومش عارف مش واخده حقها فى مصر ازاى !!

واخيرا قرأت فى ملحق السيارات / الاهرام :
ان ابو غالى عنده قائمة انتظار للراغبين فى شراء سوبارو مستعمل ، على ان يتم تنفيذ هذه الرغبات فى حاله رغبة ملاك السوبارو فى بيع سيارتهم الحاليه او التغيير للاحدث .

اتمنى فى يوم من الايام ان امتلك سوبارو ، بجد تحفة
وربنا يبارك لملاكها فيها.

akramhasan
16-11-2009, 07:51 AM
العربيه دى جامده جدا - وحتى فى اليابان هى فئة عاليه جدا
ومش عارف مش واخده حقها فى مصر ازاى !!

واخيرا قرأت فى ملحق السيارات / الاهرام :
ان ابو غالى عنده قائمة انتظار للراغبين فى شراء سوبارو مستعمل ، على ان يتم تنفيذ هذه الرغبات فى حاله رغبة ملاك السوبارو فى بيع سيارتهم الحاليه او التغيير للاحدث .

اتمنى فى يوم من الايام ان امتلك سوبارو ، بجد تحفة
وربنا يبارك لملاكها فيها.

السلام عليكم
السوبارو مش واخده حقها فى مصر عشان التوكيل كان محتكر قطع غيارها و كانت غاليه جدا كمان مفيش تسويق ليها كويس فى مصر

m_o_sakr
16-11-2009, 11:42 AM
و الفاجعة الى شقتها عنده مرة و انا بقولها و اجرى على الله ان التوكيل بياخد منه حاجات استيراد و يبعها على اساس انها جديدة و دى مصيبة جت فى بالى لان مراكز الخدمة دى مش عليها اى رقابة ثانيا انت بتدخل و حضرتك تقعد تشرب الشاى زى الباشا و هما بياخدو العربية و انت مش بتشوفها و الله اعلم ايه الى بيحصل لحد ما مرة سمعنى مكالمة تلفون من مهندس فى التوكيل ( بس الله اعلم برده المهندس ده مظبط الشغل ده من ورا التوكيل و لا بعلمه) و لا فتيس بيتباع استيراد ب 12 الف يبيعه هوة للزبون ب 25 ده حرام و لا ايه


انها حقاً سياره ممتازه

يا سيدى الفاضل فعلاً التوكيل فى بعض الاحيان بيشترى قطع غيار مستعمله وارد الخارج و لكن بيبيعها للعميل كمستعمله مش كجديده لو مفيش منها جديد فى التوكيل علشان ميوقفش عربيه العميل و الموقف ده حصل مع احد المعارف و شكراً

dr_ahmed80
16-11-2009, 01:56 PM
الاخوة الاعزاء
تحياتى لكم جميعا و اشكركم جدا على كل ما قيل فى حقى و جزانا و اياكم ان شاء الله
بداية عفوا على التاخير فى الرد لظروف الشغل و اااا الخ. اخى ادكتور المناهرى انا اصلا من المنيا و ليا سكن هناك بس حاليا مش بروح كتير يعنى و اى خدمة يا سعادة الباشا و ممكن حضرتك تجيب عربية سوبارو مستعملة بسعر كويس جدا بس نصيحة تخللى بالك جدا لان العربية دى لما بيشتغل فيها اى حد برة من الميكانيكية العاديين مش بيبقى فاهمها فبيبهدلها جدا و بتبقى كنبة مش عربية و لو حضرتك عاوز اى مساعدة انا فى الخدمة و الله الموفق
الاستاذ اكرم حسن العربية الى موديل 98 الى معاك دى مش جر رباعى السوبارو الى نزل منها سنة 97 و 98 كانت جر امامى قليل جدا الى نزل منها جر رباعى و ممكن تكتشف ده بسهولة لما تنزل تحت العربية من ورا من ناحية الشنطة لو شفت كارونة يبقى العربية دى جر رباعى و بامناسبة هوة بيسمى AWD(ALL wheal Drive)that mean ان الدفع بالاربع عجلات فى نفس الوقت بس ده بياخد من عزم الموتور على فكرة يعنى العربية الى AWD تلاقى الشد و السحب بتاعها اقل من الدفع الامامى بتبقى طيارة و الزرزار الى حضرتك بتتكلم عليه ده يخص الفتيس الاتوماتيك مش اكتر
اما بالنسبة للجانبين الى اتعوجو انصحك تروح لعايد فى الحرفيين و انا كاتب هنا رقم الموبيل بتاعه و هوة هيظبط معاك الدونيا ماتقلقش من موضوع قطع الغيار عايد موجود و برضه فيه ناس تانى بدات تشتغل فى السوبارو
مشاكل السوبارو فى مصر متأصلة من قديم الازل و ياما عربيات محترمة جدا و ليها سوق فى كل الدنيا الا مصر زى الفولو و الساب و الامريكانى بجميع انواعه وده ممكن يرجع لطبيعة الشخصية المصرية الى خدت على الفيات 128 ( مع كامل احترامى و تقديرى لها) بس المواطن المصرى عاوز عربية رخيصة وقطع غيارها رخصية و لما يجى يبيعها تتباع بسرعة و يكسب كمان فيها كل العوامل دى لا تتوافر فى السوبارو اساسا و لكن هوة مش بجيب سيرة امان و قوة على الطريق تستحمل ظروف التشغيل الصعبة فى الحر و لمدة طويلة و انت مشغل التكيف فعلى ذلك ريحو دماغكو
و ربنا يوفقنا جميعا و اى حد عاوز حاجة لا يترد و اخوكو فى الخدمة
و ربنا يجعله عامر

akramhasan
16-11-2009, 06:00 PM
الاخوة الاعزاء
تحياتى لكم جميعا و اشكركم جدا على كل ما قيل فى حقى و جزانا و اياكم ان شاء الله
بداية عفوا على التاخير فى الرد لظروف الشغل و اااا الخ. اخى ادكتور المناهرى انا اصلا من المنيا و ليا سكن هناك بس حاليا مش بروح كتير يعنى و اى خدمة يا سعادة الباشا و ممكن حضرتك تجيب عربية سوبارو مستعملة بسعر كويس جدا بس نصيحة تخللى بالك جدا لان العربية دى لما بيشتغل فيها اى حد برة من الميكانيكية العاديين مش بيبقى فاهمها فبيبهدلها جدا و بتبقى كنبة مش عربية و لو حضرتك عاوز اى مساعدة انا فى الخدمة و الله الموفق
الاستاذ اكرم حسن العربية الى موديل 98 الى معاك دى مش جر رباعى السوبارو الى نزل منها سنة 97 و 98 كانت جر امامى قليل جدا الى نزل منها جر رباعى و ممكن تكتشف ده بسهولة لما تنزل تحت العربية من ورا من ناحية الشنطة لو شفت كارونة يبقى العربية دى جر رباعى و بامناسبة هوة بيسمى AWD(ALL wheal Drive)that mean ان الدفع بالاربع عجلات فى نفس الوقت بس ده بياخد من عزم الموتور على فكرة يعنى العربية الى AWD تلاقى الشد و السحب بتاعها اقل من الدفع الامامى بتبقى طيارة و الزرزار الى حضرتك بتتكلم عليه ده يخص الفتيس الاتوماتيك مش اكتر
اما بالنسبة للجانبين الى اتعوجو انصحك تروح لعايد فى الحرفيين و انا كاتب هنا رقم الموبيل بتاعه و هوة هيظبط معاك الدونيا ماتقلقش من موضوع قطع الغيار عايد موجود و برضه فيه ناس تانى بدات تشتغل فى السوبارو
مشاكل السوبارو فى مصر متأصلة من قديم الازل و ياما عربيات محترمة جدا و ليها سوق فى كل الدنيا الا مصر زى الفولو و الساب و الامريكانى بجميع انواعه وده ممكن يرجع لطبيعة الشخصية المصرية الى خدت على الفيات 128 ( مع كامل احترامى و تقديرى لها) بس المواطن المصرى عاوز عربية رخيصة وقطع غيارها رخصية و لما يجى يبيعها تتباع بسرعة و يكسب كمان فيها كل العوامل دى لا تتوافر فى السوبارو اساسا و لكن هوة مش بجيب سيرة امان و قوة على الطريق تستحمل ظروف التشغيل الصعبة فى الحر و لمدة طويلة و انت مشغل التكيف فعلى ذلك ريحو دماغكو
و ربنا يوفقنا جميعا و اى حد عاوز حاجة لا يترد و اخوكو فى الخدمة
و ربنا يجعله عامر\

بااااااااارك الله فيك يا دكتور احمد لا تحرمنا من معلوماتك القيمه فعلا

عايد ان اعرف ورشته و باين عليه كويس و بيفهم فى العربيه هروح له و رينا يسهل

يا ريت اى احد عنده اى عربيه سوبارو يحكيلنا عنها و بارك الله فيكم

madasaid75
16-11-2009, 06:13 PM
شكرا جدا على المعلومات القيمه دى - انا باحترم العربيه دى جدا جدا وباتمنى اركبها بس خايف من الصيانه وقطع الغيار - وخصوصا انها غاليه - اسلوبك جميل جدا فى السرد - ويا ريت ما تبخلش باى معلومه وتواصل

m_o_sakr
16-11-2009, 06:41 PM
انها حقاً سياره محترمه


يا سيدى الفاضل فعلاً التوكيل فى بعض الاحيان بيشترى قطع غيار مستعمله وارد الخارج و لكن بيبيعها للعميل كمستعمله مش كجديده لو مفيش منها جديد فى التوكيل علشان ميوقفش عربيه العميل و الموقف ده حصل مع احد المعارف و انا كده ريحت ضميرى علشان دى امانه
شكراً

akramhasan
16-11-2009, 08:19 PM
انا شاابف يا جماعه ان مشكله قطع الغيار دى ممكن تتحل انك تشوف اى صديق اى قريب لك فى السعوديه فى اى دوله خليجيه يجبلك قطع الغيار من هناك هتكون ارخص و جزاااكم الله خير

akramhasan
18-11-2009, 06:15 PM
السلام عليكم
انا روحت لعايد عشان كنت عاوز تيل فرامل و لاقيت عنده قطع غيار فى علبه حمرا كدا و شكلها مش سوبارو اصلى و بيقول انها اصلى

ارجو الافاده
انا سالت فى التوكيل و قالى التيل ب 410 جنيه و عايد قالى ب 275

يا ترى هل النوع واحد؟؟؟ و ايه النظام بالظبط
بارك الله فيكم

kalabala
04-03-2010, 08:33 AM
السلام عليكم انا عندى سوبارو ليجاسى 1993 و مشكلتى ان الموتور جاب اخره و كنت عاوز موتور ممكن حد يفيدنى ممكن الاقيه فين ماعدا عايد وهل ممكن الاقيهىفى بور سعيد ولا لا بجد هكون شاكر جداااااااااا للرد السريع لان عربيتى واقفه دلوقتى

dr_ahmed80
07-03-2010, 11:24 AM
سلامو عليكو استاذ كلابالا
فيه هشام عبد الهادى الى فى الظاهر عنده مواتير سوبارو و هتلاقى فى بورسعيد بس مين الى هيسقط ليك الموتور يا باشا
هية دى المشكلة انا فى اعتقادى مافيش غير عايد برة التوكيل بيفهم هوة اينعم عايد بقى بيستهبل بس طالما اشتريت سوبارو فانت مش عندك اختيارات كتير
و ربنا يجعله عامر

reda nosery
08-05-2010, 01:30 AM
السلام عليكم واللة يادكتور هي فعلا عربية جامدة بس مش لييها قطع غيار متوفرة حتي واحد صاحبي بيعمر عربيتة وبقالة لحد دلوقتى 3 شهور دايخ على حاجتها ومش لاقييها يظهر برضة انة الاخر هيرميها فى اي مكان ويخلص منها

khaledelzihdany
09-05-2010, 08:46 AM
طبعا زي الناس كلها ما اجمعت ان موضوعك جميل جدا ومسرود بشكل لطيف إلا انك والاخوة الزملاء صعبتوا الموضوع جدا عليا في حين انى من اشد المعجبين بالعربية وكنت هاجيبها 2006 الهاتش باك وكانت بـ 128 الف إلا ان وقتها مكنش معايا فلوس تكفي - وجبت دايو لانوس وبعد فترة في 2009 قررت انى اغير وروحت سالت عليها لاقيتها وصلت حوالي 144 الف برده الفلوس الي كانت معايا مش كفاية واشتريت نيسان صنى سوبر صالون ----- بالموضوع المحترم الي فوق دا انا بحمد ربنا انه كان بيبعدني عنها لان الواحد مش ناقص وجع دماغ ومفيش وقت لان الواحد يدور علي كل قطعة غيار ويعملها كل الحسابات دي مهما كانت العربية جميلة جدا من المفترض ان الواحد جايب عربية جميلة علشان تريحه مش تتعبه في كل قطعة ممكن الواحد يضحي بالتعب في الحجات الكبيرة اه لكن فنوس ايشارة وفنوس عادي ومريات والكلام الي بيتكسر كل يوم الصبح دا مينفعش ولا ايه رايكم .....................

فريدالطوخى
30-06-2010, 09:56 PM
السلام عليكم
دي اول مشاركه لى معكم وانا سعيد جدآ بتواجدى ونفسى فى سؤال
سوبارو امبريزا 1998 حاله كويسه عامله كام

الأثري
19-08-2010, 07:08 PM
السلام عليكم ورحمة الله وبركاته
وكل عام وأنتم بخير
والله كنت بفكر أشتري سكودا 2006 أو لا نسر 1600 وسبحان الله عرضت علي سيارة سوبارو امبريزا 2007 سيدان عامله 29 ألف ك
وبعدين قرات عنها هنا فأعجبتني واشترتها ولله الحمد بس من فضلكم كم رقم الاخ
عايد أو مكانه من أجل الصيانه

mohamedkamel8677
12-10-2010, 03:08 AM
اشكرك يا باشمهندس اكرامى على الاهتمام و بانتظار رايك
نكمل بقى ان شاء الله مع بعض مشوارى مع الجميلة الامبريزا جيت بعد كده ودتها عند صيانة 5000 عند ارتوك اوتو اعتقد فى اوائل سنة 2000 و كانو هما تقريبا سابو التوكيل بس عندهم قطع غيار و حاجات كده طبعا ماعملش حاجة نظبف العربية و غير زيت كوبيل وان و فلتر الزيت و شكرا و دفعت ساعتها 500 جنيه و قررت انى مش رايحلهم تانى و العربية بسم الله ما شاء الله مافيهاش غلطة و كنا بنسافر بيها كتير لدرجة انى سافرت بيها من المنيا الى مرسى مطروح خبطة واحدة فى عز الصيف و التكيف شغال (العربية مواضفات خليجى كمان كان مكدون فى الكتالوج و دى بيبقى ليها مراوح اقوى و الرادياتير اوسع) و المسافة حوالى 7 ساعات فى عز الصيف بس الكاوتش جه فى اخر المشوار قبل مرسى مطروح ب خمسين كيلو و عملها معايا و ماكنتش عارف بقى مكان اى حاجة ادور على الكوريك فين و قعدت عشر دقايق ادور على الحديدة الى بترفع الكوريك لانهم حاطينها فى مكان كده داخل فى فبرة جنب لكاوتش محترمين برضه بس فيها شوية غباوة و غيرت الكاوتش و اكملت الرحلة و العودة الى القاهرة كمان بسلام و بدون اى قلق لحد سنة 2003 تقريبا ماشتكتش من العربية و لا عملت معايا اى موقف يدايقك حتى بحط بنزين و زيت بس مابحطش مية كمان
جينا فى سنة 2003 حملة فى الجرايد ان ابوغالى اخد التوكيل و قعد يعمل افلام فى الجرايد و بتاع انا اتبسطت و قلت خير بدل ما الواحد قاعد سنتين حاطط ايده عل قلبه احسن يطلع حاجة و لا تحصل مشكلة ماتعرفش تعمل فيها حاجة المهم رحت صيانة 20000 الف باين غيرت سيور و فلتر بنزين و زيت و كده و خدو 900 جنيه و قررت نفس القرار الاول مش هروحلهم تانى بس اتعرفت على واحد بيشتغل هناك اسمه عايد(و هوة دلوقتى اشهر واحد فى السوبارو) و قالى يا باشا انا بشتغل فى السوبارو من زمان و تحت امرك و هوة للانانة جدع يعنىو مررت الايام بدون مشاكل الى ان حدث ان والدى كان ماشى بالعربية ووقع فى حفرة فالكوبلن الشمال الكوتشة بتاعتة اتقطعت و بقى يطقطق طب بسيطة نكلم التوكيل يا ابوغالى الكوبلين بكام الكلام كان سنة 2004 قالى الراس بس 2000 جنيه و الكوبلن كامل ب 3000 انا ماردتش ارد عليه بكلمة مش كويسة و جه فى دماغى صديقنا القديم عايد اتصلت بيه رحب بيا اوى و قالى انا سبت التوكيل و شغال برة ايامها كان فتح فى الحرفيين و كان بيشتغل على اده جابلى كوبلن استيراد كامل ب 550 جنيه طبعا كنت برقص فى الضلمة و فرحت جدا و من هنا بقيت انا و عايد و السوبارو
و الى لقاء و ربنا يجعله عامر
متابع متابع

ali_mikana
25-10-2010, 07:29 PM
هو بصراحة السوبارو عمتا فى مصر مش مشهورة اوى زى الهيونداى والشيفورلية ولانسر والكيا بس متشكرين يا باشا
على اضافتك معلومات سوباروفى الموقع

johnny161094
25-10-2010, 09:16 PM
انا عن نفسي من اشد المعجبين بالسوبارو و بجد بعشق شكلها و كمان صوتها و هي معديا من جنبك و بشكركم جزيلا علي الموضوع الرائع :]

almansour
12-11-2010, 03:57 PM
انا عندي سوبارو 82 بقي لها خمس سنين ولم اضع يدي حتي الان في الماتور كل اللي غيرته الكبالن نها حقا سيارة محترمة

YahiaAshraf
01-04-2011, 05:45 PM
احنا يا جماعة معانا عربية سوبارو فيفيو موديل 95 بصراحة احلى من اى عربية صغيرة نزلت لنفس الفئة من جميع الماركات المشكلة الوحيدة اللى ساعات بتقابلنا عدم تواجد قطع الغيار مثلا لغاية دلوقتى بندور على الفانوس الخلفى شمال مش لاقينه ابدا يا ريت لو حد عنده الفانوس ده يدلنا لان بجد احنا بنحترم العربية دى و بنحبها و مش عايزين نبيعها --------محترمة----- و حمالة اسية-- شيك -- قوية - بس بندوخ على قطع الغيار اوعوا تنسوا تدلونا على الفانوس الخلفى شمال و جزاكم الله كل خير و ده ايميلى yoyo_yahia98@yahoo.com شكرا

محمد ابوسريع سعد
15-04-2011, 10:16 PM
انا معايا سوبارو 700 مطلعة عين اهلى ومش لقيلها قطع غيار خالص العربيه دى لوليها قطع غيار ارجوا انكم تدلونى على اللى بيبعها ولو تكون قطع غيارها غالية بس هى فين

a_mounir
25-04-2011, 10:43 AM
السلام عليكم
الأخ الكريم \ dr. Ahmed
فى البداية اشكرك على الموضوع الجميل ؛ انا كمان من المنيا ؛ اليوم الحمد لله اشتريت السوبارو 2007 مانيوال بس عاوز اسأل حضرتك على كام حاجة كدا , انا رحت رفعت العربية فى بنزينة كالتكس عباس العقاد حسييت ان المهندس قلبنا فى 10 دقايق وقاللى العربية كويسة اساسات وماتورها 74 % واالمهم انا اصلا كنت نفسي فى العربية وجربتها حسيت انها تمام وخلصت الحمد لله ؛ بس دلوقتي انا عاوز اعمل طقم السيرفس تنصحني بالتوكيل ولا بلاش وياترى اسعارة ايه ؟ كمان عاوز اركب سبويلر وشوية كماليات وسمعت ان الانذار ووحدات الرفع بتوبوظ كهربة العربية ؛؛
اسف على الاطاله برجاء الافادة وجزاك الله خيراً

hany galant
29-04-2014, 10:34 AM
تحيه طيبه لأهل المنتدي
انا اسمي هاني و لدي سياره سوبارو 2 سيلندر موديل 1983 و اريد لها قطع غيار خرجيه مثل الفوانيس الخلفيه فهل هي متوفره ام ماذا افعل ؟

محمد اشرف
13-05-2014, 01:09 PM
المشكله ان قطع غيار السوبارو القديم مش متوفره فى مصر جامد والمشكله ان ملهاش قطع غيار خالص الا لو لقيت حجات استيراد متقطعه